Ohnsorg-Theater

't Ohnsorg-Theater is een schouwbörg en theatergezelschop in de Duutse stad Hambörg. De tenielstokken van 't gezelschop wördt opevoerd in 't Platduuts.

't Ohnsorg-Theater zit sinds 2011 in 't Bieberhoes in Hambörg.

Ingaank van 't Ohnsorg-Theater mit standbield van "Oens Heidi" (actrice Heidi Kabel)

Per speulseizoen wördt der töt zes stokken eproduceerd. 't Ohnsorg-Theater stiet bekend um zien komedies, waorvan der veule in Noord-Duutse milieus van boeren, vissers en koopluden speult. Ok wördt der serieuze literaire warken, musicals en Platduutse bewarkings van wark uut 't butenlaand opevoerd, van Shakespeare töt Stephen King.

Geschiedenis

't Ohnsorg-Theater hef zien oorsprong in de Dramatische Gesellschaft Hamburg, in 1902 opericht deur de Hambörger bibliothecaris en latere theatermanager, tenielspeuler, heurspölspeuler en regisseur Richard Ohnsorg (1876-1947). In 't begun was 't nog een club van vrunden die tenielteksten an mekare veurdreugen en dreide 't niet um Platduuts. Toen Ohnsorg in 1910 veurzitter wördden, begunden der Platduutse stokken espeuld te wörden. De eerste kats Platduutse tenielaovend was in 1914. In 1936 kreeg 't gezelschop een eigen gebouw in de Grote Bleken in Hambörg. De name Richard-Ohnsorg-Theater stamt uut 1946. In 2011 verhuusde 't gezelschop naor 't Bieberhoes. Vandage de dag is de stad Hambörg eigenaar van 't Ohnsorg-Theater.

Radio- en tillevisiewark

Al vrog begunde 't Ohnsorg-Theater ok Platduutse heurspöllen veur de radio te maken. Stokken die ze in 't Ohnsorg-Theater speult wördt sinds 1954 ok bewarkt veur tillevisie. In de stokken veur tillevisie wördt gien Platduuts epraot, mar Missingsch: een mengelmoes van Hoogduuts mit Platduuts, oorspronkelijk ontstaon toen Platduutsers perbeerden Hoogduuts te leren. In 't bezunder deur de tillevisie-uutzendings in de jaoren zestig en zeuventig wördden 't Ohnsorg-gezelschop laandelijk bekend. De acteurs waren ok vertegenwoordigd in bioscoop- en tillevisiefilms. Heidi Kabel (1914-2010) was in die tied een bekende speulster van 't gezelschop.

In 1996 was der veur de NDR de femilie-tillevisieserie Die Ohnsorgs, waorin destiedse speulers van 't Ohnsorg-gezelschop mitspeulden.

Dit artikel is eschreven in 't Zuudwest-Drèents.