Olst

Olst is een dörp van 8205 inwoners in de hudige gemiente Olst-Wieje, in de Nederlaandse provinsie Oaveriessel. Töt 2001 was Olst de heufdplaatse van de gelieknamige olde gemiente. Sunds et samengaon met Wieje mut et die eer dielen met die woonplek.

Verleden

Et dörp wörd veur et eerste enuumd in 947, as Holsto. Keizer Otto I nuumde de heuve Olst, Archem en Yrthe as bieheurend bie et klooster te Essen.

Um de Koolde Oorlog wier der in Olst op laandgoed De Haere en belangriek diel van de Iessellinie ebouwd, met ofzinkbaoren dam in de revier en ne sluus in de revierdiek. Daorbi'j wier der oaver en grote strekke bunkers ebouwd veur soldaoten en verdediging. Hiermet wollen ze een meugelike Russiese invasie teagenholden, deur et hiele Iesseldal onder wäter te zetten. Dit wier strikt geheim ehölden. Pas an et ende van de jaoren negentig wier de echt bedoeling van al die bouwsels dudelik. Sunds die tied bint een antal bunkers vrie toegankelik.

In 1997 wier der in Olst op anvraoge van de Herensociëteit v/h De Nut's Neut deur Wim T. Schippers en old-Tros-presentatrize Willy Dobbe et Willy Dobbeplantsoen lös edaone. Dit was eers een gräppien van Schippers uut zien tellevisieriege De lachende scheerkwast.

Töt an et ende van de jaoren zeuventig van de twintigste eeuw mos Olst et wat centen angiet veural hebben van boeren, tuunderieje, vleisverwärking en stienfebrieken.

Onder de verzoeling was Olst zowat geliekmaotig oaver de protestaantse Rooms-Katholieke en sosjalistiese zoelen verdield. Et dörp hef een Romaans protestaantse kärke uut de därtiende eeuw, waorvan de onderbouw diels emaakt is met tufstiender van een older kärrekien

Olst is noe een forensendörp. An de diek staot twee möllens, de Bökkers Mölle en de Mölle van Boks. An de Veerweg stiet et kunstwärk "Baken van Oaveriessel".

Ligging

Olst ligt an de revier de Iessel. Langs et westen kom ie in Olst oaver de kabelveerboot et Olsterveer. Met de wagen kom ie in Olst oaver de N337. Olst hef een eigen treinstasjon an de liende Ernhem-Leeuwarden (de Iesselliene). Wiedters kö'j der met de busse oaver busliende 161 kommen (Deaventer-Zwolle).

Geboren

• Arnold Jan Bernard van Suchtelen (1770-1849), börgemeister van Deaventer en Twiede Kamerlid veur Oaveriessel
• Reinhart Frans van Lansberge (1804-1873), koloniaal besturder
• Johannes Hendrikus Aberson (1857-1935), eerste rector-magnificus Laandbouwhogeschoele in Wageningen
• Willem van Rappard (1946), börgemeister Noordoostpolder
• Evert van de Poll (1952), godgeleerder, predikaant en redakteur

Fotoriege

• 
  Protestaantse kärke
• 
  Gedenkteaken Iessellinie
• 
  De Iessel
• 
  Laandgoed de Haere
• 
  Willy Dobbeplantsoen
• 
  Boake bie Olst
• 
  Uuterweerden
• 
  De Duursche Weerden bi'j Fortmond
• 
  Het baoken van Oaveriessel
• 
  Ga'k, Ga'k nie! in et sentrum
• 
  Watertoren
• 
  Diekmagazien of Diekstool
• 
  Mark- of peilsteen in gevel met NAP-peil (Normaal Amsterdams Peil) an de Rieksstroatweg 8 in Olst

Dit artikel is eskreaven in et sallandsk.