Pompeii

Pompeii is ne olde, archeologisk vöärname stad in de italiaanske streake Kampanie. Med jårliks sou'n 2,5 miljoon besökers is et eyne van de drukst besöchte turistentrekkers van Italie.

Uutsicht oaver et amfiteater van Pompeii en de rest van de stad, med den Vesuvius up den achtergrund.

De stad wör wårskynlik stichted döär de oskanen, sou'n 800-900 jår vöär Kristus. Rund et jår 740 vK. nöämen et de greken in, as deel van öär ryk Magna Graecia. Teagen 524 vK. nöämen de etrusken de streake in, mär de stad selv bleav selvbeskikking holden. Et sint vöäral de romeinen eweasd dee et wyder uutbouwden töt wat der nu van bekend is.

Vulkaanuutbörsting

Pompeii is vöäral bekend üm de groute vulkaanuutbörsting van et jår 79 nå Kristus. De kortby de stad liggende vulkaan Vesuvius pleyrden med sou'n geweld uut mekander dat de heyle stad binnen körten tyd under ne låge van ses meter püün en aske begraeven wör. De uutbörsting duurden twey dage. Vöäle inwoaners wüsten vord te kummen, anderen neet. Up den tweyden dag küm der vanuut den Vesuvius ne heyte gloodwulke (pyroklastisken ströym) van sou'n 250 gråd Celsius. Achterblyvers in ne stråle van ungeväär teen kilometer rund de Vesuvius kummen up de steade uut de tyd. Wåras Pompeii vöärtyds ne regionaal vöärname steade was in et romeinske ryk, wör de stad nå de uutbörsting verlåten.

Getügen

Van de uutbörsting is eyn getügenverslag, upteykend döär Plinius den Jungeren. Hee skreav et 25 jår nå de tyd vöär syn kameråd, den geskeedkündigen Tacitus, den as wolde weaten wo as Plinius den Ölderen an syn ende kummen was. Syne beskryving is sou akkuraat dat vulkanologen dit type uutbörsting noch altyd når em nöömt.

Nå de uutbörsting

Uutgraeving van een huus in Pompeii (aend 19de eeuw)

Direkt nå de uutbörsting böäd Keiser Titus hülpe an de vordkummelingen en besöchteden de stad twey mål, mär löät et nooit weader upbouwen. Ouk wör de stad löägeröyvd döär gravrouvers, dee bealden, münten en anderen rykdom stöälen. By latere uutbörstingen van Vesuvius küm Pompeii noch deper under et püün te liggen en wör händigan vergeaten. De stad rakeden bedölven en oavergroid. Et silhouette van de stad bleav noch lange sichtbår, mär lüde meynden dat et landskap tovallig sou was egroid. Et stünd lokaal te book as La Civita (De stad).

Pas in 1592 wör Pompeii vöär et eyrste heruntdekked döär nen bouwkündigen den as nen watertünnel wolde anleggen, mär den seade der niks oaver. Pas in 1693 begünde Giuseppe Macrini wat müren te untblouten, nå at Francesco Picchetti in 1689 ne gravüre vünden had med decurio Pompeiis ("wetholder van Pompeii"). Mär see meynden noch at et verweys når et dörpken Pompey.

In 1738 wörden oaverblyvsels van Herculaneum weadervünden döär warkvolk dat et nye paleis van köäning Karel van Bourbon, van et Köäningryk Napels must bouwen. De vündste warren sou gewaldig dat den spaansken laegerleider Roque Joaquín de Alcubierre de meyr wark van makede in 1748. Köäning Karel selv tröäk når Spanje, mär bleav interesseerd in de upgraevingen ümdat et et anseen van et köäningryk verstarkede. Pas in 1763 wörden der gravüres med den name van de stad evünden. Den switsersken architekt en bouwkündigen Karl Weber leidden in 1764 de eyrste archeologiske upgraevingen.

Under de fransken wör der tüsken 1806 en 1815 pas echt wark emaked van de uutgraevingen. Med sou'n 700 man warkvolk wörden al rap et noorden en süden van de stad med mekander verbünden. Ouk groute deylen van de Groute Stråte, de Via dell'Abbondanza, wörden bloutelegd. Vanaf dee tyd wör düdelik wo grout de stad feitelik was. Geld vinden vöär de uutgraevingen bleav et gröätste probleem, wårdöär et wark mär langsaam vörderden. Toch wörden in disse tyd en paar vöärname vündste dån, sou as et Huus van de Faun, et Huus van Menander, den Tragisken Dichter en den Dokter.

Giuseppe Fiorelli nöäm et wark in 1863 oaver. By de uutgraevingen kümmen mangs gaeter in de askelåge tevöärskyn med menskelike resten der in. Hee was den eyrsten den as bedacht dat et gaeter van untbündene lyken warren. Et was syn idee üm der gips in te geten üm sou nen afdrük van de slachtoffers te krygen. Dit wördt rechtevoord noch altyd dån, al wördt nu künsthars bruked. Dat geyt ja langer med, verknoiet de beynder neet en gevt meyr geleygenheid vöär wyder undersöök. Fiorelli was ouk den eyrsten wat de sake weatenskappelik beskryven deade. Hee verdeylden de stad in de hüdige neagen gebeden (regiones) en blükke (insulae). Hee gavven de afsünderlike hüse (domus) nummers, soudat allens makkelik weaderevünden worden kan. Ouk gavven hee regelmåtig rapporten uut oaver de voordgang van de uutgraevingen.

Belang van de uutgraevingen

Müürskildering in de Villa dei Misteri

Pompeii is eyne van de vöärnaamste archeologiske steades vöär kennis oaver de leavwyse van de Romeinen, ümdat de stad van et eyne up et andere ougenblik konserveerd wör döär de aske. Selvs de lyken van de achterblyvers wörden vulleydig inslöäten. Öäre lyven vergüngen, wårdöär der in de lavaströymen nen mal untstünd. Dårmed kunden archeologen med cement en gips afdrükken maken, wårup as selvs de gesichtsuutdrükkingen noch te seen sint. De upgraevingen spröäken töt de verbealding ümdat der ryk versyrde hüse, teaters en oapenbåre gebouwen under de aske vordkömmen. Ouk kümmen der heyle müürskilderingen, mosaiken en allerhande gebruuksvöärwarpen tevöärskyn dee en good beald geavet van de rykdom van de stad.

In de groute antallen pötte, krüken en anderen upslag wörden eatensresten vünden. Dårmed kunden weatenskappers herleiden wat de romeinen in dee tyd atten. Andersümme gavven et soort eaten informaty oaver de jårtyd van et ungelükke. An de dikkere kleyder en de soorten vrüchten in de krüken is te seen dat et rund oktober of november geböärd müt weasen.

Problemen

Döärdat de stad sou'n 2000 jår luchtdichte afeslöäten leade, bleav et al dee tyd good bewård. Do as de upegraevene deylen eynmål bloutestelled wörden an de butenlucht en direkt sünlecht, begünden müürskilderingen te vervagen. De stad hevt flink te lyden had van vandalisme, weaderskade, erosy, unvöärsichtige upgraevingswysen en deven. En ander swårweagend probleem is de druk van de vöäle turisten dee as alle jåren når de stad kummet. Konservators klaget voordan oaver te weinig geld. Et meyste van de fundsen geyt in de beskarming van wat der al upegraeven is en döär umköyperye kümt vöäle geld in de verkeyrde tasken.

Wydere informaty

Pompeii steyt up de wearldarvgoodlyste van UNESCO. Et ligt kort by de metropoolstad Napels en is good med den trein te bereiken.