Ria Westerhuis
Ria Westerhuis, ok wal op zien Drèents Ria Westerhuus enuumd (Old-Averiest, 1959) is een schriefster van gedichten, liedteksten en verhalen in 't Drèents en 't Nederlaands.
Westerhuis is op-egruuid op Old-Averiest en verhuusde in 1980 naor De Wiek. Sinds 2004 is ze mit schriefwark bezig; ze publiceert onder meer in 't Drèentse literaire tiedschrift Roet.
Veur zanger-pianist Geert Jan Brader zien cd Nog zoveul doen (2009) hef Westerhuis een köppel liedteksten eschreven. Ok schrif ze teksten veur de Stichting Drentse Muziek Maatschappij.
In 2009 kwaamp bi'j Het Drentse Boek Minnezinne uut, een bundel mit een kleine vieftig erotische gedichten die ze mit Delia Bremer hef emeuken. De bundel maakten hiel wat lös; d'r wördden in een jaor tied zowat duzend exemplaren van verkocht, en de schriefsters kwamen op de laandelijke tillevisie. Westerhuis en Bremer schreven beiden al vaker licht erotische gedichten, al dan niet in 't Drèents, daoras ze mekare mit uutdaagden, mit as risseltaat dizze bundel.
In oktober 2009 kwaamp de cd Dichter bij elkaar uut, mit vier Drèentse en zes Nederlaandse gedichten, veurelezen deur Westerhuis mit gitaarbegeleiding van Rob Zandgrond.
In febrewaori 2011 verscheen de bundel Zundags goed mit zeuventig ni'je Drèentse gedichten. Ok in 't Nederlaands kwaamp der een bundel uut, in 2013 was daor Teugelloos in eigen beheer. Daorna schreef ze nog Nachtsleutel in 2015, mit gedichten in 't Drèents en in 't Nederlaands. Westerhuus heur viefde dichtbundel, Dwaalstroom, verscheen in 2022. Veur dizze bundel leut ze heur inspireren deur de netuur bij De Wiek en heur kuiertochten in 't Riestdal. Naost Drèentstalige gedichten staot der tien Nederlaandstalige in; bename podiumgedichten die as ze veurdrag bij optredens deur 't hiele laand.
Wieder organiseert en prissenteert Westerhuis veurdrachtaovends, vertaalt ze gedichten in 't Drèents, schrif ze gedichten in opdracht en ontwarpt ze wenskaorten.