Rodney Seale

Rodney Seale is een Zuud-Afrikaanse evangelist, peppraoter en schriever. Sinds de vrogge jaoren tachtig treedt hij op as Afrikaanstalige spreker en coach veur schoelen, universiteiten, instituten, jeugdkaampen en gezinskaampen. Hij prat ok veur de radio en tillevisie en gef video- en audiomateriaol uut. In de jaoren tachtig wördden hij in Zuud-Afrika een bekende name wegens zien stried tegen de vermiende gevaoren van rockmuziek en tegen satanisme.

Seale kump uut een Engelstalig gezin uut Rhodesië. As kiend wördden hij deur zien olders miteneumen naor Zuud-Afrika en op een Afrikaanstalige legere schoele edaone. Hij is etrouwd en hef twee dochters en twee kleinkiender.

Andachtsgebieden

Seale is in Zuud-Afrika bekend van zien praoties onder schoelkiender en opvoeders aover de gevaoren, zoas hij det zöt, van rockmuziek. Dizze muziek zet volgens hum de deure lös naor een hiele batse sociale problemen vanuut conservatief christelijke optiek, zoas communisme, draank- en drugsmisbruuk, geweld, homoseksualiteit, lösbaandigheid, pornografie, oosterse godsdiensten, opstaandigheid, satanisme en vrijzinnige politiek.

Ok muzikanten in aandere populaire genres as rock is hij kritisch aover. Bands en zangers die deur Seale bekritiseerd bint um heur imago en/of liedteksten, bint onder meer AC/DC, Black Sabbath, Iron Maiden, Queen, Olivia Newton-John, Bette Midler, Patti Smith, Strawbs, de Eagles, Boney M, Shaun Cassidy en John Denver. Ien van de menieren waorop rockgroepen de jeugd volgens hum beïnvloedt, is backmasking: 't verwarken in liedties van espreuken of ezungen bosschoppen die aj allennig kunt heuren deur de liedties van achter naor veuren te speulen. Aover de vermiende gevaoren van rock schreef hij Rock musiek: die reg om te weet (1988).

Zien boek Satanisme: die reg om te weet (1991) giet aover de deur hum veronderstelde wiedverbreidheid van satanisme in de Zuud-Afrikaanse samenleving, en de bedreiging die det in 't bezunder veur de schoelgaonde jeugd zol vörmen. In 't boek stelt Seale det der in Zuud-Afrika ondergrondse satanische covens bint en det jongern onder invloed van rockmuziek en groepsdwang heur weg naor 't satanisme viendt. De oplössing die hij zien publiek böd is 't annemen van Jezus Christus as persoonlijke verlösser en 't volgen van de raod die de Biebel gef.

Van de Cordis Trust, actief op 't gebied van kuunst en giestelijk wark, kreeg Seale de Orde van die Kruik Award veur een boek aover zölfmoord onder tieners. Pesten is een aander onderwarp waoraover hij epubliceerd hef.

Schrieverije

• Dealing with Generation gaps in the Corporate environment focusing on Sociological behavior and patterns (MBA-proefschrift)
• Developing guidelines to assess the strengthening of parent – child relationships, within the context of family dynamics (doctoraal proefschrift)
• Help my a.s.b.!: tienersatanisme (1990)
• Waarom moet ek bid (1991)
• Rock musiek: die reg om te weet (M.F.Y., 1988, 1990, 1991)
• Satanisme: die reg om te weet (Hans Kirsten Uitgewery, 1991)
• Help my a.s.b.! Is daar oorlewing in 'n seksmal wêreld? (Baruk, 1991)
• Alkoholisme: daar is oorwinning-- verseker (1992)
• Help my a.s.b.! : tiener selfmoord (Evangelie Uitgewers, 1993)
• Liefde, seks & jy: praktiese raad aan jongmense oor God se plan met seks (1996)
• Van zero tot hero (Carpe Diem Boeke, 2002)
• Gehoorsame ouers en streng kinders: 'n vlugplan vir gesinne wat op koers wil kom (Carpe Diem Boeke, 2003)
• Finessemeisie dagbeplanner 2006 (Carpe Diem Boeke, 2005)
• Finessemeisie dagbeplanner 2007: Met oordenkings om jou jaar amazing te maak (Carpe Diem Boeke, 2006, mit Louis Britz en Maretha Maartens)
• Die amptelike boek vir dogters: net wat jy nodig het om 'n oulike dogter te wees (Carpe Diem Boeke, 2006)
• A tot Z van ouerskap: net wat jy nodig het om jou tiener suksesvol groot te maak (2007)
• Boelies: Genoeg is genoeg!
• Help My Asb!: Rebellie en weglopers

Rifferenties

Dit stok is eschreven in 't Zuudwest-Drèents.