Rudolf Kinau

Rudolf Kinau (Finkwarder, 23 meert 1887 - 19 november 1975) was een Platduutse schriever, ok Rudl Kinau enuumd.

Toe as de schipperszeun Rudolf Kinau van de volksschoele kwaamp, hölp e een paar jaor laank mit de Elbevisseri'je mit. Hi'j bezöcht de matrozenschoele en dienden bi'j de marine. Daornao warkten e bi'j de Hambörger visveiling.

Zien eerste vertellegien schreef e in 1916 bi'j 't hengaon van zien oldere breur, Johann Wilhelm (Jan) Kinau, Gorch Fock enuumd, die ok in 't Platduuts schreef en die as marinier in 't Skagerrak sneuvelden. Rudolf Kinau wördden ok bekend deur zien wark bi'j de radio. Lange tied warkten e mit an de Platduutse riege Hör mal 'n beten to van de NDR. Van zien radiowark verscheen in boekvörm onder aandere Kamerad und Kameradin. In totaal schreef e 33 boeken en verscheidene heurspullen en tenielstokken.

Kinau sprak zien gedichten en vertellegies ok in veur langspeulriegen as Wort und Stimme en Niederdeutsche Stimmen. Hi'j hef een antal priezen ewunnen veur zien schrieveri'je, waoronder in 1962 de Fritz-Reuter-pries veur Platduutse literatuur. Ok kreeg e de eremedallie van de Verdienstorden der Bundesrepubliek Deutschland.

De Nedersaksische activist Arnold Rakers schreef op 13 jannewari 1954 an zien collega Willem Diemer: "In Münster hek Maondagaovend 'nen mojen Platdüütschen Aovend mit Rudel Kinau (bröör van "Gerd Fock") met maakt - wat 'n unwies mooj plat van Finkwaarder bi Hambörg."

Citaot

Doe hest oens wol toropen, wie schoelen man ne troerig wezen?
Dat zund wie jao doch, Jan, - ober wie wult man getroost wieder leven un wult ook af un an maol lachen. Wult ne jummer jammern um die, wult die dien rauh man gunnen. Doe hest jao ook lacht un lewt, hest 'n kort leven vol meucht un arbeid ober ook vol zunschien un lachen had. Un hest wol ook 'n scheunen dood had. Slop nu man scheun, bust good uphoben!
Bust jao ook jummer bie oens! Zitst noe jao ook hier blangen mie in 't gras. Un wie kiekt beid nao dat lut scheune dörp mit de roden dakken un de greunen buim. Un allns roendum is zo stil un zo fijn! ----
Dat is 'n fijnen plats hier! Hier mag ik geern zitten.

Uut: 'Achtern Diek', in Rudolf Kinau (1923), Blinkfüer, Hambörg: Quickborn Verlag (oaverezet in de Drèentse schriefwieze)

Bronnen

Bolko Bullerdiek (red.) (2004), Schrievwark. Plattdeutsche Literatur im Deutschunterricht Hamburger Schulen, Hambörg: Quickborn-Verlag
Willem Diemer (1984), Eendracht & twist. Uit het archief van het letterkundig tijdschrift "'t Swieniegeltje" (1954-'59), Stad: Stabo/All-Round, p. 150

Uutgaonde verwiezings

Dit artikel is eschreven in 't Zuudwest-Drèents.