Snoop Dogg

Calvin Cordozar Broadus Junior (geboaren up den 20. oktober 1971), better bekend under synen artistenname Snoop Dogg (dårvöär ouk wal Snoop Doggy Dogg en ouk noch nen set as Snoop Lion) is nen rapper uut de Vereynigde Ståten. Hee düt ouk musik vöär anderen uutgeaven en hevt ouk wal es akteerd. Syn oorsprungeliken faam hevt he te danken an en bydrage vöär Dr. Dre synen solosingel "Deep Cover" en syn medwarken an Dre syn eyrste album The Chronic. Broadus hevt 23 miljoon albums verkofd in de Vereynigde Ståten in 35 miljoon wearldwyd. In syne prysenkaste ståt under meyr nen American Music Award, nen Primetime Emmy Award en 17 Grammy-nominatys.

In 1993 küm Doggystyle uut, Broadus syn eyrste studioalbum. Et wör uutegeaven döär Death Row Records en wör heylemåls produceerd döär Dr. Dre. Et stünd al rap boavenan in de Billboard 200. In de eyrste wekke wör et album al 800.000 mål aneskaffed. Et jår dårup kreag et ne veerdubbel platinum-prys van de Recording Industry Association of America (RIAA). De singels "What's My Name?" en "Gin en Juice" stünden verskeidene wekken in de top 10 van de Billboard Hot 100. In 1994 gavven Death Row den film Murder was the Case uut, wårvan as Broadus de titelmusik makeden en ouk in den film to seen was. Syn tweyde album, Tha Doggfather (1996), stünd ouk weader boavenan de hitlysten. Dissen was good vöär dubbel platinum. In 1998 skeiden hee der uut by Death Row en begün by Master P syn No Limit Records, wåras hee syne suksesryge uutbreidden med syne albums Da Game Is to Be Sold, Not to Be Told (1998), No Limit Top Dogg (1999) en Tha Last Meal (2000). Dårnå satteden hee de handteykeninge by Priority, Capitol en EMI Records en küm med syn sesde album Paid tha Cost to Be da Boss (2002), den as meyr up kommerciääl sukses uut was. Dårnå skreav hee sik in by Geffen Records, wåras syne volgende dree albums uutkümmen: R&G (Rhythm & Gangsta): The Masterpiece (2004), Tha Blue Carpet Treatment (2006) en Ego Trippin' (2008). Den eyrsten leyverden em nen wearldhit up med "Drop It Like It's Hot" (Wåras Pharrell Williams ouk an medwarken). Hee meldden sik weader by Priority en Capitol en güng as höygsten baas by et eyrste label an et wark. Dår makeden hee syn teende en elvde albums, Malice 'n Wonderland (2009) en Doggumentary (2011), dee as et beide neet slecht deaden.

Underwyl spöälden Broadus med in verskeidene films en presenteerden verskillende televisyprogramma's, sou as Doggy Fizzle Televizzle, Snoop Dogg's Father Hood en Dogg After Dark. Do as hee in 2012 Jamaika besöchteden, bekeyrden hee sik töt et rastafarianisme en nöäm de name Snoop Lion an. Sou gavven hee et reggae-album Reincarnated (2013) uut en ouk nen film der by under denselvden name oaver syne ervaringen in Jamaika. Syn darteende studioalbum Bush (2015) wör volleydig emaked döär Pharrell Williams, wårmed as hee wal vaker warkeden. Syn veerteende studioalbum Coolaid (2016) küm in etselvde jår uut as dat hee in de WWE Hall of Fame wör upenöämen. In 2018 bekeyrden Broadus sik weaderümme töt et Kristendom en gavven Bible of Love, syn eyrste gospelalbum uut. In etselvde jår kreag Broadus ne steare up de Walk of Fame in Hollywood. Nå at in 2019 syn söäventeende album I Wanna Thank Me en in 2021 et achtteende From tha Streets 2 tha Suites uutküm as vryen artyst, kofden Broadus in 2022 et olde Death Row Records up en gavven dårmed syn negenteende album BODR uut.

Persöönlik

Broadus is trouwd med syne skoolverkeyring, Shante Taylor. Up 14. juny 1997 vöär et eyrste, mär in 2004 güng se uut mekander, ümdat se et volgens Broadus oaver wat vöärname saken neet eyns kunden worden. Toch kümmen se up den 12. january 2008 weader by mekander en trouwden vannys. Med mekander hebbet se dree kinder: söäns Cordé (1994) en Cordell (1997) en ne dochter Cori (1999). Wyders hevt Broadus noch nen söäne, Julian Corrie Broadus (1998) med Laurie Holmond, wåras hee ne verholding med had.

Sportgek

Broadus is gek van sporten. Vöäral amerikaansk vootbal, mär ouk yshockey. Vöär den eyrsten hevt he papyren as träner. Dårnöäst is he ouk leevhebber van gewoan vootbal, en dan vöäral den skotsken klub Celtic F.C. Wyders düt he gaerne hardloupen. By de Olympiske Spöllen van Parys in 2024 was hee vlammendraeger vöär de Vereynigde Ståten.

Smöykerye

Al seyd et begin van syne loupbane is Broadus grout vöärstander van et smöyken van weed. Et is syn handelsmark ewörden. In 2002 hülp hee et pröätjen de wearld in dat he der med uutskeiden, mär höld dit neet lange vul. In 2013 dea he volgens emselv rund de 80 weedsigaretten up nen dag rouken. Seyd 2007 hevt he binnen Kalifornie ne vergünninge vöär medisken kannabis vöär synen kopseyrde. In 2023 sea he vöär sociale media dat he der lange oaver nådacht had en uutskeidden med 'röyken', mär dat was reklame vöär nen röykvryen vüürkorv.