Verskil tüsken versys van "Paulus"

 

'n Blangrieke keerl veur de orthodoxie is Paulus ewest. Over hum he-j te lezen in 't Biebelboek Haandelings van de Apostels toe he nog Saulus (Hebreews: Sja'oel) hietten. Daor he in 'n begun 'n stark vervoolger waren van de aldereerste kristenen. Maa, toe he 'n maol op Damascus an göngen, daor he 'n antal kristenen wollen vervoolgen, wördden he van zien peerd of-esmetten deur dat he verblind wördden deur 'n aldermachies stark licht. En 'n stemme uut 'n hemel vreug an hum worumme as he Hum vervoolgen, toe wördden he bekeerd en hef he zich later bi'j Ananias deupen laoten. Daor hef he de name Paulus an-enömmen. Hiernaor wördden he 'n stark veurvechter van 't Kristlike geleuf, en hef he buuten Palestina völle heidenen bekeerd en 'n bulte gemienten esticht. In de Biebel bint in 't Ni'je Testement 'n flink antal brieven te vinnen waor ezeg van wöd dat hi'j ze schreven hef. Hi'j wördden later dan ok de 13e Apostel enuumd.

De leer die hi'j verspreidden, met zien brieven, en de daor uutvleuiende geleufsopvattings nuumt men Paulinisme; waor as alle karklike stromings uuteandlik uut bint egreuit. Zo haren he aandere ideen over de Tora, in verbaand met de geleuvigen uut aander volker, as de aandere Apostels. Met Jakobus (Hebreews: Ja'akov), leider van 'n gemiente op Jeruzalem, hef he ok 'n maol trammelaant ehad; worumme as Jakobus veurstaander waren veur 't behoald van de jeudse wetten en tradisies (en disse ok an niet-jeuden wol opleggen, waor Paulus 't nie met iens waren). 't Is veural Paulus ewest worumme as 't kristendom zich ofdeud van 't jeudendom; Paulus hef de Tora en de jeudse traditsies uut-ewisselt veur geleuf en vergivving van zunden deur 't kruus.