Stichting Stellingwarver Schrieversronte
De Stichting Stellingwarver Schrieversronte is een instituut veur de Stellingwarfse tael, literetuur, geschiedenis, volkskunde en identiteit van de Stellingwarven. Mit zoe'n 1.300 leden is et naor verholing de grootste Nedersaksische streektaelorganisaosie in Nederlaand. De Stichting Stellingwarver Schrieversronte is vestigd in de gemiente Ooststellingwarf in et dörpien Berkoop. Et instituut wodde opricht in 1972.
Warkgebied
bewarkDe Schrieversronte gaot allienig over et Stellingwarfse taelgebied in de perveensie Frieslaand. Et Stellingwarfs-praotende gebied in Overiessel vaalt onder de verantwoording van de IJsselacademie (Iesselakkedemie) in Kampen, wiels dat in Drenthe verzorgt wodt deur et Huus van de Taol in Beilen. Alle drie de organisaosies bin ansleuten bie de SONT, de Federaosie van Streektaelorganisaosies in et Nedersaksische Taelgebied.
Publikaosies in et Stellingwarfs
bewarkDe stichting maekt verschillende uutgiften van Stellingwarver boeken mogelik. Zowel veur volwassen as veur kieders verschienen jaorliks verschillende titels. De Stellingwarver Schrieversronte geft ok et Stellingwarfs tiedschrift De Ovend uut. Et blad verschient zes keer per jaor. Et tiedschrift is zo oold as de stichting zels. Wieder is der een full-colour boekekraante, Twie pond 'n Stuver, mit alderhaande Stellingwarver ni'js, die in augustus huus-an-huus verspreided wodt in Oost- en Weststellingwarf.
Et Stellingwarfse Woordeboek
bewarkVanof 1975 het et Instituut veur Stellingwarver tael en kultuur, dat insteld is deur de Stellingwarver Schrieversronte, in saemenwarking mit et Nedersaksisch Instituut an de Rieksuniversiteit Grunningen, warkt an de uutgaove van een groot Stellingwarfs woordeboek. Nao een jaorenlange anloop kwam in 1994 et eerste diel van et Stellingwarfs Woordeboek uut, diel II, dat de letters F tot en mit K besleug en 843 bladzieden bevatte. In 1997 verscheen diel III, van de letters L tot en mit R (1.151 bladzieden) en in 2001 diel IV, van de letters S tot en mit Z (985 bladzieden). Et laeste diel om uutgeven te wodden, in 2004, was diel I, dat de letters A tot en mit E besleug en 821 bladzieden het. Mitmekeer bestonnen de vier dielen uut percies 3.800 bladzieden, mit naor schatting 70.000 tot 80.000 woorden. In september 2005 verscheen d'r ok een inkotte edisie, et Stellingwarfs-Nederlands Verklarend Handwoordenboek, dat 704 bladzieden bevatte.