Streumoog

Streumoog (Faeröers: Streymoy) is t grootste (373,5 km²) en dichtstbevolkte eilaand van de Faeröer, waor oek de heufdstad Tórshavn ligt.

Geografie

t Eilaand hef n langwarpige vorm en strek zich roewweg uut over n noordwest-zuudoost-asse, mit n lengte van 47 kilometer en n breedte van zwat 10 kilometer. Der bin twee diep insniejende fjorden in t zuudoosten: Kollafjørður en Kaldbaksfjørður. Veural in t noordwesten is t eilaand bargachtig, mit t hoogste punt, Kopsenni (789 m). Dat gebied wörden deur tot 500 meter hoge kliffen edomineerd. Liek as in de rest van de archipel bin der veule kleine streumpjes en kleine meren (vandaor de naam Streumoog). De belangriekste vegetasie is gres, en der bin haost gien bomen.

Streumoog wörden van t naobie-elegen Oosteroog (t tweede grootste eilaand van de Faeröer) escheien deur de smalle Sundini-zeestraote in t oosten. Aandere eilaanden die dernaost liggen bin Vágar (westen) en Zaandoog (zujen). Dree kleindere eilaandjes liggen an de zujelike punt van Streumoog: Koltur, Hestur en Nolsoog.

Bevolking

Zwat 21.000 meensen woenen op t eilaand, wat neerkömp op meer as 40% van de bevolking van de Faeröer. De meerderheid van dervan woent in de heufdstad Tórshavn, mit zo'n 15.000 inwoeners. Naost de regeringszetel is t oek de belangriekste haven, de lokasie van de universiteit en t kommersiële sentrum van de eilaanden. Aandere belangrieke plaotsen bin Vestmanna, de veurmaolige veerhaven in t westen, Kollafjørður in t sentrum en de pittoreske darpen Saksun en Tjørnuvík in t noorden. Vanuut histories oogpunt is t darp Kirkjubøur an de zuudpunt van t eilaand van belang, deurdat t n bisschopszetel was in de middeleeuwen.

Vervoer

Alle kernen bin via wegen mit mekaar verbunnen. De belangriekste weg naor Tórshavn leit deur n 2,8 kilometer lange tunnel. De verbiending mit Oosteroog verlöp via n brogge over de Sundini-straote, terwiel sinds 2002 n 4 kilometer lange tunnel Streumoog mit t eilaand Vágar verbient, waordeur de wegen van de dree heufdeilaanden mit mekaar verbunnen wördden.

Der bin regelmaotige veerdiensten naor de eilaanden Zaandoog en Zujeroog. Zoemers gaon der oek regelmaotig veerdiensten naor Hanstholm in Denemarken, Lerwick op de Sjetlaandeilaanden (Schotlaand), Bargen in Noorwegen en Seyðisfjörður in Ieslaand.

De Lochthaven Vágar, die op t gelieknamige eilaand ligt, is t enigste vliegveld van de Faeröer. Daorvandaon ku'j naor welende internasionale bestemmingen vliegen in Denemarken, Ieslaand, Noorwegen, t Verenigd Koninkriek en Zweden. Veerder wörden vanaof t vliegveld helikopterverbiendingen onderhouwen mit welende Faeröerse eilaanden.