De Togolese Republiek (Fraansk: République Togolaise) is n laand in West-Afrika. t Lig op t oostn van Ghana, op t westn van Benin en op t zuudn van Burkina Faso. De zuudgreanze wörd evörmd duur n Golf van Guinea, woer't ook de heuwdstad Lomé an lig. Togo hef ne oppervlakte van ongevear 57.000 kilometer in t veerkaant en ongevear 6,7 miljoen inwonners.

Togo op ne kaarte van Afrika

Togo lig oonder n Sahara en hef n tropies klimaat. t Laand mut t vuural hebn van boern, woer as t klimaat zik good vuur leent. t Is ene van de kleainste laandn van Afrika. De offisjele sproake is Fraansk, mer dr wordt verskeaidene aandere sproakn esprökn. De meeste van dee sproakn heurt bie de Gbe-sproakn. De meeste Togoleezn hangt ne natuurgodsdeenst an, mer dr zeent ook redelik wat Kristenen en Moslims. Togo is lid van de Verenigde Nasies, Afrikaanse Unie, Organisasie van Islamitiese Saamnwoarking, Zuud-Atlanties Vreade- en Saamwoarkingsgebeed, La Francophonie en de Ekonomiese Gemeenskop van West-Afrikaanse Stoatn.

Tusken t 11de joarhoonderd en t 16de joarhoonderd treukn dr verskeaidene stamn t gebeed in. Van t 16de töt t 18e joarhoonderd was t kustgebeed n belangriek peunt vuur Europese slaawnhaandel, woerduur't Togo en de umlignde strekke n naam "Slaawnkuste" kreeg. In 1884 verkloarn Duutslaand at Togo oonder öare beskoarming völ. Noa n Eersten Wearldoorlog wör t besteur van Togo oawerdreagn op Fraankriek. In 1960 meug Togo zikzelf besteurn.

In 1967 pleegn Gnassingbé Eyadéma nen stoatsgreep, woernoa't hee presideant wör. Doo't he in 2005 oet de tied köm, was hee n langstzitnden presideant in de moderne Afrikaanse geskiedenisse, met ne regearingstied van 38 joar. In 2005 wör zinn zönne Faure Gnassingbé as presideant ekeuzn.

Oetgoande verwiezing bewark

  Wikiweurdebook: Togo - weurdebook, woordherkumste, variaanten