Slag bij 't Teutobörger Wold

veldslag tussen Germanen en Romeinen
(döärstüürd vanaf "Varusslag")

De Slag bij 't Teutobörger Wold, deur Romeinse geschiedschrievers de clades variana (Varusramp) enuumd en in 't Duuts ok de Varusschlacht of Hermannsschlacht, was een veldslag in 't jaor 9 nao Christus die plaatsevund in wat now de Duutse dielstaot Nedersaksen is. Een verbond van mienstens vier Germaanse stammen onder Arminius wus drei Romeinse legioenen en heur hulptroepen, anevoerd deur Publius Quinctilius Varus, te verrassen en finaol te verrineweren.

Reconstructie bij Kalkriese van de deur de Germanen opewörpen walle

Arminius, leider van de stam van de Cherusken, was in Romeinse dienst ewest as anvoerder van de hulptroepen van Varus. Hij had een Romeinse militaire opvoeding geneuten, waordeur e kaans zag Varus um de tuun de leiden en de Romeinse tactieken in 't veuren deur te hebben. De Romeinen mesjeerden in voel weer aover een smal, drekkig pad deur de bos; heur formatie was tussen de 15 en 20 kilometer uutestrekt. De Germanen völlen die an mit speren en zweerden en maakten daorbij gebruuk van plaatselijk aoverwicht. De aoverlevende Romeinen wussen heur nog te verschaansen in een verstarkt kaamp det ze ter plekke bouwden, mar toen ze de aandere dag uutbreuken kregen ze 't weer zwaor op de hoed. De darde dag was 't daon. Zo'n 15.000 töt 20.000 Romeinse troepen mut in totaal esneuveld wezen. Varus en veule aandere officieren völlen op heur eigen zweerd.

De Romeinse geschiedschriever Tacitus identificeerde de plekke van de slag as saltus Teutoburgiensis, 't Teutobörger Wold. 't Hudige Teutobörger Wold lig in de dielstaoten Nedersaksen en Noordrien-Westfalen en hiette töt de 19de ieuw de Osning. 't Wördden ummedeupt umdet ze eerst mienden det daor de slag plaatsevunden had. Nao archeologische zukerije in de 21ste ieuw mient ze det de slag waorschienlijk meer naor 't noordwesten plaatsevund, in de onmiddellijke umgeving van waor now 't dörp Kalkriese lig, even baoven Ossenbrogge.

De Slag bij 't Teutobörger Wold wördt eziene as ien van de slimste nederlagen van de Romeinen in die heur geschiedenis, waordeur de roezige tied van gebiedsuutbreiding onder keizer Augustus töt een end kwaamp. As antwoord op de slag kwaamp 't Romeinse Riek in de jaoren daornao mit vergeldingsinvallen in Germaans gebied, mit name onder de ginneraal (en latere keizer) Tiberius en die zien adoptiefzeune Germanicus. Mar de grèenze van 't Riek bleef bij de revier de Rien, in plaatse van wieder naor 't noorden te wörden etrökken bij de Elve, zoas de bedoeling ewest was.

Dit artikel is eschreven in 't Zuudwest-Drèents.