Vas

Vas is n doarp in de gemeente Tubbig, in et noorden van Tweante. Et hef ongevear 900 inwonners en de meesten der van bint Roomsk.

Vas in de gemeente Tubbig

Vas is ene van van de öldstbewoonde sties van Nederlaand. Dat blik oet oalde grafheup dee kort biej Vas te vinden bint, zo as et Vasser Grafveald. Doar li-jt graven van tusken de 2000 en 4000 vuur Christus. Bie opgreavingen is biejvuurbeeld 'n Maanderkearl böwwengroonds kommen. Den is rechtevoord in et Rieksmuseum van Tweante in Eanske te bekieken.

Toerisme

Watermöl De Mast

Vas lig der kaant biej, tusken olde essen, holtwallen, bos en heed. Doarmet is et ne geleefde stie um wandel- en fietstochten an te vangen. Meesttieds geet et dan deur et Dal van de Mosbek, et Streu en et Springendal. Ok könt toeristen mooi kieken biej watermöl De Mast, den an de deurgoande weg op Oatmörsken an lig. Et mer effen treaden en dan bint de leu biej de watermöllen van Bels in Maander en Fraans in Hezing.

In et döarpke zölf steet de R.K. Sunt Jozefkeark. Arzitekt J.G.G van Roosmalen hef den nog tekend.

Wied en zied bekend was Tante Sien oet Vas. Veur een paar honnerd joar stun dit pankokenhoes hoog anschrevven um de dikke pankoken wa'j der kriegen konnen. In 2021 gung et spul owwer 'n kop deur 'n corona. Der bin nog andere winkels woar'j terecht könt, zo as nen supermarkt, bakker, iessalon en hoarsnieder.

An de weg noar Hezing, onneran 'n Tutenbearg, biej Restaurant de Liskoel, was veureer et tichelweark van Deppe, nen steenbakker oet Lip. Et spul is moderniseerd en verhuusd noa et kortbiej liggende Lemke biej Ulzen in Duutslaand.

Vas is ook de endstie veur de poasgebroeken van Oatmörske: op 'n tweeden Pinksterdag komt de acht oatmörskense poaskearls 's morgens met de fiets noar de mis ik de keark van Vas. Doarmet sloet ze ear taken of.

Teerput

Op ongeveer anderhalven kilometer onder Vas he'j de zoneumde teerput. Biej mekaar bestriekt dee een oppervlak van um en noabie de 24.000 m² woarmet et een va de grötste versmeerde sties van Nederland is. Töt an de joaren zövventig van et twentigste joarhonnerd deuden ze hier zoerteer en annere chemischen pröttel lozen in ne olde zandgroov. Der wördt kuierd van at ze et wier oprumen doot. Mer umdat dat nog wa oardig in de klamotten löp, hebt ze et veurlopig indamd.

Noaberschop

De leu van Vas vermaakt zich nog wa bie verskillende verenigingen:

• De carnavalsvereniging, CV de Spekscheeters. Doar hangt ook de dweilorkesten De Spekhest'n en Tiedt Zat biej umhen.
• St. Cecilia, et muziek van Vas, met fanfare en slagwearkgroep
• SV Vasse, döt voetballen en haandballen
• Esch Stars, de volleybalvereniging
• De Kameleongroep, de padveenderiej
• In Vas doot de verskillende gasthuuz de Herfsttintentocht opzetten. Doar zet ze speciale wandel-, fiets- en autoroutes veur oet.

Bekende leu

• Rob Groener, voetbaltrainer en spöllersgadderaar
• Sien Wermelink (Tante Sien)