Verzörgingsplaatse

plekke naost een snelweg of autoweg daor een stop te maken
(döärstüürd vanaf "Verzörgingsplek")

Een verzörgingsplaatse is een plekke naost een snelweg of autoweg daor as volk det der mit de auto (of vrachtwagen enzowieder) op uut is een stop kan maken. Ofhaankelk van wat een bepaolde verzörgingsplaatse te bieden hef, kuj der rösten, tanken, picknicken, de elektrische auto opladen, dingen kopen (eterije, drinken, lectuur en aander gerei), 't toilet bezuken, ofval in ofvalbakken achterlaoten en drek uut 't chemisch toilet van caravans kwietraken op lozingspunten. Veur kiender kan der een speulplekke wezen.

Dubbele verzörgingsplaatse De Lucht an de A2 in Gelderlaand, mit voetgangerstunnel onder de snelweg deur
Tankstesjon en restaurant van een Autohof in Hesse, Duutslaand
't Anbod van Cherwell Valley Services, een motorway service station in Engelaand
Brödtien van een roadside park in Michigan, Verienigde Staoten

Verzörgingsplaatsen maakt zokke activiteiten meugelk zunder det deurgaond verkeer een ende van de grote weg of mut dwalen. Baovendien maakt ze 't veur vrachtwagenchauffeurs meugelk um wettelk veureschreven röstmomenten in acht te nemen.

An 't iene end van 't spectrum hej grote verzörgingsplaatsen mit verscheiden restaurants, winkels en slaopgelegenheid. An 't aandere end hej simpele parkeer- en picknickplekken langs de kaante van de weg mit wat eettaofels en ofvalummers. Zoksoort parkeergelegenheid muj niet in toezel halen mit een vlochtstroke, een asfaltstroke langs de snelweg waor aj uutslutend in geval van neud magt stoppen, zoas bij autopech.

Umme te veurkomen det verzörgingsplaatsen gebruukt wördt as op- en ofrit, hebt ze gien verbiending mit wegen aanders as de auto(snel)weg. Wal kan der een anliggende weg of fietspad wezen veur lu die op de verzörgingsplaatse warkt, die ja miest in de buurte woont.

Begrippen in aandere talen bewark

In sommige talen bint der verscheiden begrippen in ummeloop, ofhaankelk van wat de verzörgingsplaatse an veurzienings te bieden hef.

Duutslaand bewark

't Aoverkoepelnde begrip in Duutslaand is Rastanlage, waor onder vaalt:

  • Rastplatz (parkeergelegenheid zunder wiedere dienstverliening)
  • Raststätte, of technisch: Bewirtschaftete Rastanlage (mit dienstverliening, zoas restaurant/winkel/motel)
  • Rasthof (Raststätte mit tankstesjon)
  • Autohof (niet direct bereikbaar vanof de Autobahn (autosnelweg), mar elegen bij anslutings van secundaire wegen op de Autobahn)

In 't alledaagse spraokgebruuk wördt de woorden Raststätte en Rasthof miest deurnaander gebruukt.

Fraankriek bewark

In Fraankriek hebt ze 't aover une aire d'autoroute. Wieder onderscheid is der tussen:

  • aire de service (mit bepaolde veurzienings)
  • aire de repos (een schiere plekke umme te rösten)
  • aire de stationnement (louter parkeergelegenheid)

Engelstalige laanden bewark

In 't Engels is der spraoke van de rest area. Bint der weinig of gien veurzienings, dan het det beveurbield een parking area of picnic area.

Wieder bint der per laand verschillende begrippen in ummeloop:

  • Verienigd Keuninkriek: motorway service area/station, services, lay-by ('t leste niks as parkeergelegenheid)
  • Verienigde Staoten: travel plaza, rest stop, oasis, en veur schiere parkeer- en picknickplekken: roadside park, wayside park, scenic area
  • Zuud-Afrika: service area, rest and service area
  • Canada: resto, service plaza, lay-by, service centre
  Dit artikel is eschreven in 't Zuudwest-Drèents.