Westermeer (Fries: Westermar) is een dörp in de gemiente Scharsterlaand van de Nederlaanse perveensie Frieslaand. Et dörp zat krekt in et oosten van et hudige centrum van De Jouwer.

Westermeer binnen De Jouwer en Scharsterlaand
Karktoren op et begreefplak Westermeer

Westermeer was tegere mit aandere karkdörpen Ni'jehaske, Ooldehaske, Haskerhorne en Snikzwaog as grieteni'j Haskerviefge (Haskerfiifgea) de dörpskoeme van de laetere gemiente Haskerlaand. De kattelieke perochie dee daor sticht is, was de eerste in et gebied. In 1580 wodde de eerste protestaanse karke sticht.

In de 15e ieuw ontston in et westen van et dörp de uutbuurt De Jouwer. Dit gruuide al gauw zo groot dat Westermeer in verval raekte. Uutaenlik slokte De Jouwer et oorspronkelike moederdörp op. De nog bestaonde middelieuwse karktoren op et begreefplak Westermeer (et karkgebouw wodde al in 1695 sloopt) is hierdeur et ooldste bouwwark van De Jouwer.

Naost et begreefplak verwiezen allienig nog de naeme van een basisschoele en een ni'jbouwwiek uut de jaoren '80 mit daordeur lopend de Westermarwei (Westermeerweg) naor et bestaon van dit dörp. De gelden en bezittings van et veurmaolige Aarmbestuur van de Karkvoogdi'j Westermeer binnen onderbrocht in de stichting Westermeer. Disse stichting subsidieert sociaol-kulturele doelen in de gemiente Scharsterlaand.

In 1954 is et dörp Westermeer opneumen in et dörpsgebied van De Jouwer.