Wietkafee

n Wietkafee of kannabistro (oek wel an-eduud mit t Nederengelse coffeeshop of koffieshop) is n openlik verkooppunt van wiet (oek wel: kannabis). De verkoop van koffie is biezaak. Alkohol mag der sinds 2007 niet verkocht wörden. Naost de funksie van winkel hef n wietkafee oek de funksie van ontmoetings- en ontspanningsruumte en gebruuksruumte veur kannabis. Vrogger wördden de term coffeeshop oek gebruukt veur n koffiehuus of dagkafee; in t Engels wördt dit der nog altied mee bedoeld.

n Wietkafee in Amsterdam

n Amsterdamse wietkafeevergunning

Wietkafee in Groningen (2011)

Teunebanke van n wietkafee mit uutgestalden marihuana

Gedoogbeleid

Hoewel de haandel in kannabisprodukten offisieel is verbojen is volgens de Opiumwet, kan t in Nederlaand onder n antal veurweerden gedoogd wörden. Dit kömp derop neer dat ze bie t gerecht n oge dichtekniepen as n wietkafee mer:

• gien reklame maakt of anplakbiljetten ophangt
• gien zwaore bedwelmingsmiddels verkoopt
• gien overlast veroorzaakt, waoronder oek parkeeroverlast;
• gien jongeluui toelaoten: klaanten mutten op z'n minst 18 jaor oud ween;
• gien hele bulte verkoopt of in veurraod hef. n Wietkafee mag hooguut vuuf gram per dag per persoon verkopen. t Wietkafee mag hooguut 500 gram in veurraod hebben.

A'j je as wietkafee niet an disse regels houwen dan ku'j de tente wel sluten.

In Nederlaand wördt t bezit van hooguut vuuf gram kannabis niet bestraft. Bezit van meer as 30 gram wördt ezien as haandel en dat wördt wel gericht op-espoord en bestraft. De wietkafeehouwer mag wiet wel verkopen mer niet inkopen (t zogenaamde achterdeursbeleid: de haandel an klaanten (an de "veurdeure") wördt gedoogd, terwiel de inkoop (an de "achterdeure") nog altied illegaal is, mer niet an-epakt kan wörden zolange as t niet ontdekt wördt). Herziening van de wet is volgens veulen dan oek hard neudig, mer internasionale drok en verdragen staon n veerdere versoepeling nog in de weg. Der is sinds ongeveer 2004 sprake van n hardere liende vergeleken mit t gedoogbeleid van de jaoren 70, mit t oprollen van wietplantazies en sluting van n deel van t wietkafee. Op 21 november 2008 was der n Wiettop in Almere waor burgemeisters overleegden over de legalisering van toelevering van wietkafees.

Veur toegang tot n wietkafee mu'j in Nederlaand woenen en meerderjaorig ween; dit ku'j bewiezen mit n uuttreksel van de Gemeentelike baosisadministrasie persoonsgegevens (GBA) van de woenplaotse en n geldig identiteitsbewies. Dit is n versoepeling van t eerdere systeem van de wietpasse, en is overenekeumen in t Regeerakkoord van 2012.

Verspreiding en antal

Behalve in de vier grote stejen in de Raandstad (veural Amsterdam) he'j der veule an grensstreken zitten. Vanwege de overlast van drukstoerisme proberen gemeenten de antallen te minnezeren. Dat blik de leste jaoren oek te lokken.

Jaor	Antal wietkafees	in antal gemeenten	waorvan in Amsterdam
1968	1*	1
1973	2*	2	1
1975	4	2	3
1991	1200-1500
1995	1460 + 600 illegale		450, waarvan 350 gedoogd
1996	1290
1997	1179		340
1999	846	105	288
2000	813	103	283
2001	805	105	280
2002	782	107	270
2003	754	105	258
2004	737	103	249
2005	729	105	246
2006	719	105
2007	702	106	241
2008	700	105	228
2009	666	101	223
2010	650	100	214
2011	653	104

Rookverbod

Sinds t rookverbod veur de horeca, dat op 1 juli 2008 ingung, is t roken van wietsigretten (waor oek tabak in zit) oek in wietkafees verbojen. t Roken van pupen, waoterpupen, verdampers en wietsigretten (van pure wiet) blif toegestaon. Grotere wietkafees hebben n amparte rookruumte. t Rookverbod in wietkafees is umstrejen umdat de Nederlaandse Voedsel- en Waorenautoriteit niet de bevoegdheid hef um wietsigretten op de anwezigheid van tabak te kontroleren. Der bin tabaksvervangende middels op de markt, zo as Hoefblad (Petasites Habitus), waormee de hennepprodukten emengd kunnen wörden.

Wietkafees in aandere laanden

• In Zwitserlaand bin openlike verkooppunten van "geurkussentjes", die in feite porsies wiet bin. De anpak van disse winkeltjes is regionaal arg verschillend.
• In Kanada bin enkelde wietkafees nao n paor maonden deur de pliesie esleuten.
• In Tsjechië hef t liberale druksbeleid eleid tot min of meer openlike verkooppunten mer gien wietkafees.
• In de Verenigde Staoten van Amerika is t beleid per staot zeer verschillend. In sommige staoten bin der op uutgebreide schaole medisinale-wietwinkels. t softdruksbeleid in Kalifornië is zeer liberaal mer bie n rifferendum in 2010 wördden de legalisasie van verkoop in Kalifornië aofewezen mit 54%. Colorado en Washington besleuten in 2012 bie n rifferendum wel um kannabis te legaliseren.

Uutgaonde verwiezing

Commons: Wietkafee - plaatjes, filmkes en/of gelüüdsbestanden.

• An welke veurweerden mut n wietkafee voldoon ?, zied bie t Openbaor Ministerie.

Dit artikel is eskreaven in et westveluwsk.