Wikipedia:Parsberichen/Tweejaorig bestaon/Tweants
Twee joar Neersassiese Wikipedie!
- Wat beent Tweantse skeeldnaamns?
- Wukke Neersassiese skrievers beent dr zo al?
- Hoo zut t Putters, t Riesns of t Westerwoolds dr oet?
- Hoovölle Neersassiese naamns beent dr veur de geetelink en de leppeldeef?
De dialektn van Noordoost-Neerlaand, met mekaar t Neersassisch eneumd, beent de leste joarn in populariteit egröaid. Ze maakt dr popmeziek in, skrieft dr in, maakt regiosoaps en zo wieder. Disn niejn andacht, dee ok veur aandere strektaaln binn en boetn Neerlaand opgeet, neumt ze de Dialectrenaissance.
- Dreedoezend stuks in t Grönns, t Tweants, t Veluws…
Op t internet is dr nog neet zo machtig völle te veendn oaver ’t Neersassies, mear dr beent toch wal wat skiere websteas. De skierste doarvan is zoonder twiefel de Neersassiese Wikipedie, ne vrieje encyclopedie dee at iedereene kan bewarkn in elk Neersassisch dialekt van Neerlaand. Veur twee joar – in meart 2006 – bi-w begunn, en dr beent noe al zowat dreedoeznd artikels! Dreedoeznd stuks in t Achterhooks, Dreants, Grönns, Sallaands, Stellingwarfs, Tweants, Oost-Veluws, West-Veluws en Urkers.
Wat is noe feailik de Wikipedie?
- De Wikipedie is n warkske veur en deur iederene
De Wikipedie, in ’t Hollaands en Engels ‘Wikipedia’ eneumd, is n onmeundig grote encyclopedie op t internet, begunn in 2001. De Engelse Wikipedia hef mear as twee miljoen artikels en de Hollaanse hef dr um en noabiej n half miljoen. Det is meugelik umdet iedereene dr vriej an met mag skrievn. Deankt oew s in: ie skrieft n artikelsken. As dan n aander t verbettern wil, mag-e det op de stean doon. A-j oew neet in ne wieziging köant veendn, goa-j in oaverleg. Gineene is ‘eigenaar’ van n artikel. De Wikipedie is een warksken veur en deur iederene.
- Wikipedie wördt allene mear better.
Hoe warkt det, met mekaar n encylopedie skrievn?
As iederene zomear kan metskrievn, stoat dr dan gin foutn of zwak eskreevn artikels op de Wikipedie? Jaowal, vanzölf. En dr wördt ok vandelisme pleegd deur n hoop leu, dee willemoods onzin skrieft. Mear oaver t algemeen zorge viej dr veur det dr zo völ meugelik foutn verbetterd wördt en zo good meugelike artikels op ebouwd wördt. En vandalisme wördt altied heel rap vort ehaald. Duur de tied hen he-w eleard det de artikels op de verskeidene taalversies van Wikipedia dr al better op wördt. Dr wördt skoarp elett op de artikels, en wat n eenn neet wet, vult n aander an.1
Neersassiese en algemene oonderwarpn
t Meuie is dej op de Neersassiese Wikipedie onmeundig völle informasie oaver Neersassiese oonderwarpn veendt dee aj neet zo gauw arns aanders veendt. Wat bint noe kenmarknde veur- en achternaamns in oons deel van t laand? Woar zegnt ze ‘Moi’ en woar vroagnt ze o-j ‘good te passe’ bint? Wat bint de Iesselakkademie en t Huus van de Taol? Woar ligt Wenters, De Voart, De Wiek en Knoal? Wel skreef t eerste Dreantstalige gedicht? Woar viert ze Stöppelhaene? Hoo gung det versken oaver t peerd van ome Loeks? En goat zo mear deur.
- In t plat kö-j oaver alns skrievn.
D’r bint ok nen heeln hoop artikels oaver neet-Neersassiese oonderwarpn, en det is ok belangriek: da-w zeen loat de-j ok in t plat oaver alns skrievn köant.
Wat kön ieje noe veur de Neersassiese Wikipedie doon?
Viej skrieft dit um eavn stille te stoan biej twee joar Neersassiese Wikipedie, mear ok um dit skiere wark nog wieder an te priezn. Want dr bint nog aait mear heel weinig skrievers, en n antal strekn bint nog neet good verteegnwoordigd deur metwarkers die doar wegkomt. Doarumme mu-j es kiekn of iej neet ok es n stukn wilt skrievn. Oaver oewn dörp of stad, of n oonderwarp woar a-j machtig völle van weet. Mean iej de-j gin Neersassies skrievn köant? Kiekt dan mear es hier:
Mear dr bint nog mear meniern um met te doon. Beveurbeeld deur foto’s en aandere soortn ofbeeldings veur biej de artikels te maakn en dee vriej te gevn veur de Wikipedie. Iej köant zölfs oewn eegn of bestoande artikels insprekn in oewn dialekt!
Gewoon metdoon!
Goodgoan!
- Een veurbeeld gef an det Wikipedia warkt: in 2005 steun dr in t veuranstoande wetenskoppelike blad Nature n oonderzeuk det artikels oaver wetenskoppelike onderwarpn in de Engelstalige Wikipedia vergeleek met de Encyclopædia Britannica. In beidn veundn ze acht grote fouten: veer in Wikipedia en veer in Britannica, en n riege kleine onjuustheedn: 162 in Wikipedia en 123 in Britannica. Kiekt zölf mear es noar oonze Neersassiese Wikipedie hoo of t oe lik.