Willem Jan van Dedem

Mr. Willem Jan baron van Dedem, heer van de Rollecate (Zwolle, 18 meert 1776 - Den Hulst, 21 november 1851) was een laandeigenaar die de vervening van grote dielen van Noordoost-Aoveriessel en Zuudoost-Drenthe ter haand eneumen hef. Langs 't kenaal de Dedemsvaort det hij leut graven ontstunden neie plaatsen, of wördden kleine boerenkernen wieder ontwikkeld, zoas Den Hulst, De Balk, De Vaort en Lutten. De baron was der iene van de Van Dedems.

Willem Jan baron van Dedem in 1840

Ieuwenlaank was törf in Nederlaand de belangriekste braandstof; daorumme wördden grote veengebieden ofegraven of vurtebaggerd. In Frieslaand gunk det vrij makkelijk deur de bestaonde infrastructuur. In aandere dielen van 't laand mussen speciale waterwegen anelegd wörden. In Noord-Aoveriessel gebeurde det onder toezien van Van Dedem, toen as die de plannen van wijlen zien schoonva mr. G.W. van Marle ten uutvoer bracht. Op 9 juli 1809 wördden der begund mit 't graven van een kenaol van veertig kilometer, det vernuumd wördden naor de stichter: de Dedemsvaort. 't Centrum van de törfstikkerije wördden 't dörp Dedemsvaort.

Van Dedem, die rechten estudeerd had, was vanof 1811 president van de rechtbaanke van eerste anleg van Zwolle. Wieder wördden e in 1813 anesteld as directeur van de directe belastingen in Aoveriessel.

Van Dedem trouwde in 1802 mit Judith van Marle (1782-1842); uut 't hielijk wördden vier kiender geboren. In 1821 leut hij 't huus Rollecate op Veno ofbreken en weer opbouwen op Den Hulst (det later diel zol wördden van Neilusen) an 't kenaol, umme der mit zien gezin te gaon wonen. Vanuut de uutgebouwde kamer had e mooi kiek op "zien" kenaol.

Van Dedem lig begraven op begraafplaatse De Mulderij, net buten 't dörp Dedemsvaort. 't Opvalende graf lig centraol onder een grote treurbeuke. In 't dörp stiet een gietiezern neoclassicistische gedenknaolde ter andèenken an Van Dedem.

Uutgaonde verwiezingen

• WIE IS WIE in Overijssel: Willem Jan baron van Dedem (1776-1851)

Dit artikel is eschreven in 't Zuudwest-Drèents.