Woodhenge van Zwolle
De Woodhenge van Zwolle was een nederzettinge uut de Bronstied die evunnen is op 21 april 1990[1]. De oaverbliefsels van disse nederzettings bint evunnen in die Zwolse wiek Ittersumerbroek. Er leavden zo'n tien töt twintig meansen per ginneraosie. De huzen lagen in kleine gruupies kortbi'j mekare of wieder uut mekare. De boeren die hier leavden, leavden van de akkerbouw en veeteelt, määr de jacht op dieren en de visvangst was niet onbelangrieke[2].
Uut verkleurings in de grond was of te leiden dät er hier vrogger paalkulen en ofvalkulen waren. Ook bint er onder aandere boederi'jen evunnen met bi'jgebouwen. Een antal van de paalkulen kunt meugelik onderdiel ewest wean van twie cirkels. De deursnede van disse twie cirkels bedrög ongeveer tien meter en zie bint volgens dezelfde principes ebouwd. De twie cirkels liekt op Stonehenge. Tiedens de Midden-Bronstied waren er contacten met Engelaand, wat de geliekenisse kan verklaoren. De cirkels kunt meugelik kalenders ewest wean die belangrieke waren veur de landbouw (zunnewendes). Ook bint er resten evunnen uut et Neolithicum, nämelik pielspietsies van bewärkt vuurstien.
Zo'n 2500 jaor eleden bint de leste bewoners vot egaon op zuuk naor heuger elegen zaandruggen deur meer activiteit van de Iessel.
Verwiezings
bewark- ↑ Trouw, 23 september 1993. https://www.trouw.nl/nieuws/stonehenge-ontdekt-in-zwolle~b141fd78/
- ↑ Van et boek Zwollerkerspel deur Wim Coster (2017).
|
Dit artikel is eskreaven in et sallandsk. |