Martin ter Denge

Martin ter Denge (op internet ok wa gaanks as Woolters) (geboren 11 december 1985) is nen muzikant, skriever en dichter oet et Tweantse Riessen. Hee dut skrieven en zingen in et Riessense dialekt en dregt dit ok in dee sproake oet. Ok is hee nen aktieven biedreager op de Neersassische Wikipedia. As geborene Riessender hef Woolters völle Tweants metkreagen en doar is hee greuts op. Zien wark dreit veurnamelik um et behold en 'n anjacht van de streektaal. Hee meant dat dat et beste wil op ne moderne wieze.

Bienaam

De naam Woolters is ne familie-bienaam of skeldnaam. In bepoalde delen van Tweante kump et gebroek van bienamens völle vuur en zo ok in Eanter en Riessen, woar at Ter Denge vortkump. In Enter stund vroger ne olde boerderieje, et Wooltershoes. Nen betoavergrotvader van Ter Denge treuk doar in en nam zo de biename oaver.

Woark

Nedersaksisch activisme

Ter Denge stiet bekend um zien activisme veur 't Nedersaksisch, wat hij uutdrag as een moderne taal die prima geschikt is veur 't leven van vandage de dag. Bij de Universiteit Utrecht studeerde hij in 2012 of in Engelse Taal en Cultuur en Interculturele Communicatie. In zien masterscriptie Linguae Intergermanica (2012) betaogt hij det 't Nedersaksisch dient, en nog vaker zol kunnen dienen, as broggetaal tussen platpraotende Nederlaanders en Duutsers. Zien ideeën aover 't Nedersaksisch drag Ter Denge onder meer uut mit zien 'neadersassisk internettydskrivt' Werldspråke, in zien podcast Wearldspråke (sinds 2018), en in de podcast WATATA die as e sinds 2020 prissenteert mit Gerben Voortman.

Ter Denge is iene van de ontwerpers van de internationale Nysassiske Skryvwyse en drag die uut in zien eigen communicatie.

Skrieverieje

Et meeste van Ter Denge zien skriefwark is in et Riessens, een dialekt van et Twents. Vuur de Neersassiese Wikipedia hef he seend 2006 honderden artikels in t Riessens skreawen; wieter skrif hee ok verhalen, gedichten en proza. Verskeidene joaren had hee nen kollumn in 'n Niejen Bodbreef, een blad van de Kreenk vuur de Twentse Sproak. Zien rubriek "Plat op et Web" gung oaver et gebroek van Tweants op internet.

Doarnöast hef he ok de tekst eskrewen van de nummers Skriefmesjiene en Bleu Man dee duur Tonny Nijland en Martin Ter Haar espöld zint op onder andere de Tweantse Jazzerieje. Op de tweede Jazzerieje skreef hee Kræng op een arrangement van Jan Wessels, oetvoord duur Petra ter Denge (gin familie). Dat nummer haalden de eerste pries. Op de darde Jazzerieje skreef hee et nummer Veni, vidi, vici op een arrangement van Joris Bolhaar, ezungen duur Nadya Bolhaar.

In 2021 köm bie AFdH Uitgevers Ter Denge zien book Tukkerspotten. Een ABC-boek over de ziel van de Twentenaar oet, woerin at hee op alfabetische volgörder typisch Tweantse zaken en hooldings beskrif. Foto's bie de stukskes zint skötten duur Cyril Wermers. n Kreenk vuur de Twentse sproak skreef oawer t book: 'Mangs met egene inzichten, mangs met lecht-wetenskoppelike onderbouwing. Herkenboar en mooi vuur de Tukker zelf, verhelderend vuur de boetenmaarksen wat met ons te maken kriegt.' In 2023 verskeen van Tukkerspotten een doarde, oetbreide druk.

Muziek

As achtjöärig junken begun Ter Denge met lessen op de kleine tromme bie Muziekvereniging Wilhelmina Rijssen, woer as hee zowat 24 joar lid van was. As spöller bie de drumfanfare en dweilorkest De Kamgoarn Klösse deed he völle spöl- en podiumervaring op. Ondertusken learden hee zikzelf gitaar spöllen. Zien eerste zelf eskrevene nummer was in et Engels, al is dat nooit publiceerd.

Wieders bekwoamen zik Ter Denge in muziekproductie (muziek maken met 'n komputer), terwiel hee ondertusken mear en mear reggae begun te lusteren. Dat leidden der to dat hee vöärnamelik reggae geenk maken. Tegelieke begun hee zik vuur et Twents en et Nedersaksisch te interesseren. Zo ontstund et idee um Twentse reggae te maken. In 2012 köm hee met et protestleed oaver veurmoalig minister Liesbeth Spies, umdat dee et Nedersaksisch gin heugere erkenning wol geven.

Tegelieke wol hee zik nit vaste leggen in enen stiel en zorget ziene brede muzikale interesse vuur oetstäpkes noar hiphop, dance, rock en soul.

Lieste met muziek

Loat Kuuln (Loat Toch Goan) (2008)
Boulevard Sauntering (2009)
Dreumt Mer Lekker (Sweet Dreams) (2009)
Fruity Loops Reggae (2009)
Sleepless (2009)
Verlöarn (2009)
Earlikheaid (Honesty) (2009)
Tukkermars (2009)
t Eande van Augustus (2009)
Doot es Heanig an (2010)
Wat een Woark (2010)
Wearldhearskoppieje (2010)
In This Love (2010) - cover van Bob Marley
Daanske (2011)
Basic Rockers Reggae in FL5 (2011)
Liquid Dub Revised (2011)
Wat een Woark (2011) - verniejde versie
Afrika (2011)
Deankt (Vuurde'j Skreewt) (2011)
Pieker Dub (2011)
Liesbeth Spies (2012) - Protestversken teegn de doomoalige Minister van Binnlaandse Zaakn
Hardcore Vibes (Reggae Remix) - cover van Dune (2014)
Reur den Pot (2014)
Zoaterdag (2014)
Keunink van Twente (2015)
Doot Plat en Rap Wat (2020)

Bronnen

Ter Denge, Martin (2012), Linguae Intergermanica: The Use of Low Saxon, English, Dutch, German, and Receptive Multilingualism in Northern Dutch – Northern German Communication, Utrecht: Universiteit Utrecht
'Jonge ondernemer uit Rijssen zweert bij het Twents', in Tubantia, 14 jannewaori 2017
'Tukkerspotten? Martin ter Denge geeft tips in zijn eerste boek', in Tubantia, 24 juli 2021
'Streektaalfanaat Martin ter Denge ging op zoek naar de ziel van de Twentenaar: Tukkers zijn net Drenten (maar ze weten het nog niet)', in t Dagblad van het Noorden, 30 juli 2021
Kreenk vuur de Twentse sproak oawer Tukkerspotten

Zeet ok

Gebruker:Woolters - Woolters zien Wikipedia-ziede

Oetgoande verbeendige

Dit artikel is eskreaven in et twentske dialekt van Riessen, in de Algemene Nedersaksiese Schriefwieze.