Zwömbad

Een zwömbad is een grote waterholdende kupe, deurgaons in de vloere of de grond inemesseld, um in te zwömmen of veur aandere wateractiviteiten zoas spullegies of gekheid mit vrunden. De baodem is vake onkaant, mit een ondiep ende daor aj in kunt staon en een diep ende um te duken.

Een zwömbad in Hong Kong mit baodemlienden die de banen angeeft, en een badmeister in zien gestoelte

Soortementen

Ie hebt aoverdekte zwömbaden (binnenbaden) en openlochtzwömbaden (butenbaden), en ze kunt particulier of openbaar wezen. Openbare baden wördt vake mit gebruukt veur schoelzwömmen en aoverige zwömles.

Wieder bint der semi-openbare zwömgelegenheden, zoas in hotels en op campings, en hej therapiebaden, beveurbield in ziekenhuzen en kuuroorden. Oceaanlieners kunt heur eigen zwömbad an boord hebben.

Een ondiep zwömbad det bedoeld is veur klein grut nuumt ze een pierenbad. Deurgaons tref ie die naost een dieper bad veur oldere kiender en veur volwassenen.

Kenmarken

Inemesselde baden bint gewoonlijk verveerdigd van beton, netuurstien, metaol, plestiek of glasvezelverstarkte keunststof. Ie hebt ze in alderhaand vörmen en groottes, mar typisch bint ze rechthoekig en standaardiseerd. De grootste zwömbaden hebt olympische ofmetings. Riegels veur sportzwömbaden bint vastesteld deur de Fédération Internationale de Natation (FINA).

Bij 't zwömmen, in 't bezunder bij 't spörtzwömmen, wördt vake baanties etrökken; daorumme bint veul zwömbaden in banen opedield deur nylon koorden mit drievers of deur kleurpetronen op de baodem. Veur 't duken kunt der duukplaanken wezen. Bij (semi-)openbare baden zit der ien of meedere badmeisters langs de kaante um te kieken as de riegels nao-eleefd wördt, en um hulpe te verlienen as een zwömbadgebruker in neud rak.

In 't water zit miestal chloor tegen bacteries. 't Water kan verwarmd wezen, wat in 't bezunder een kenmark is van bubbelbaden en van baden die gebruukt wördt veur balneotherapie en hydrotherapie.

Dit artikel is eschreven in 't Zuudwest-Drèents.