Havixhorst

De Havixhorst is een in 1618 erkende havezate op een laandgoed in de gemiente Möppelt in de Nederlaandse pervincie Drenthe. 't Laandgoed lig in de buurtschop De Schiphorst; véur de gemientelijke herindieling van Drenthe op 1 jannewaori 1998 heurden de Havixhorst bi'j de gemiente De Wiek. 't Vroggere laandhuus gebruukt ze now as hotel. 't Laandgoed Havixhorst viej an de noordkaante van 't Drèents-Oaveriesselse reviertien de Riest.

De Havixhorst in De Schiphorst bi'j De Wiek, 2010

Geschiedenis

De Havixhorst in 1732 etiekend deur Cornelis Pronk

De Havixhorst is veur 't eerst enuumd in 1371. Töt in de 17e eeuw was 't in 't bezit van leden van de femilie Van den Clooster. Vanof de 15e eeuw harren de heren van Havixhorst 't collatierecht, 't recht umme de geestelijke veur te dragen ter benuming, in de karke van De Rieverst. De femilie Van den Clooster bezat ok de havezates Rheebruggen en Vledderinge. In 1580 hebt ze de havezate Batinge in Dwingel veroaverd, mar die mussen ze weer ofstaon.

In de 17e eeuw verarfden de Havixhorst naor de femilie Van Munster. Deur gebrek an centeri'je mus Reinold van Munster in 1658 ofstaand doen van de Havixhorst. Hi'j wisselden zien bezit umme mit arve Ibinge in Echten van Johan de Vos van Steenwijk. De adellijke femilie De Vos van Steenwijk hef de havezate krapan dreihonderd jaor, van 1658 töt 1956, in bezit ehad. In 1956 verarfden de Havixhorst naor twei achternichten, de dames Van Mourik, die de Havixhorst in 1963 verkocht hebt. Daornao hef 't wisselnd in gebruuk ewest as bejaordenhuus, vekaantieoord veur jongelu en opvangcentrum veur Vietnamese asielzukers. In 1982 is, onder meer mit hulpe van Het Drentse Landschap, een begun emeuken mit de restauratie, waornao 't een hotel is ewörden.

Nationaol bieldenpark De Havixhorst

De Stichting Het Drentse Landschap hef in 2005 een projectplan eschreven mit de name 'Nationaal beeldenpark De Havixhorst'. De bedoeling is um in samenwarking tussen 't hotel en 't restauraant in de tunen van de Havixhorst een vaste oaverzichtstentoonstelling in te richten van de figuratieve bieldhouwkeunst in Nederlaand in de 20e eeuw. 't Drents Museum in Assen en 't Museum voor figuratieve kunst De Buitenplaats in Eel ondersteunt 't plan. D'r is ok samenwarking ezöcht deur Stichting Groep van de figuratieve abstractie in Oethoezen. D'r is een begun emeuken mit 't bieldenpark.

Eileuverstesjon

Vlakbi'j Havixhorst lig 't eileuverstesjon De Lokkeri'je, daoras 't hiele jaor deur eileuvers bint. In de zomer zuukt een paar honderd veugels voedsel an de oevers en in de weilaanden van 't Riestdal; in de winter wördt d'r een paar dezien eileuvers verzörgd.

Bron

• Jaap Bos (et al.) (1989), Huizen van stand: geschiedenis van de Drentse havezaten en andere herenhuizen en hun bewoners. Möppelt: Boom