Eerdgas
Eerdgas is n fossile braandstof dat veural bestaait oet Methoan. Doarnoast bestaait t maisttied oet koolwotterstoffen, swoavelwotterstof, stikstof en koolstofdioksied. t Is ontstoan bie t zulfde proces as dat woarbie eerdeulje vörmd wuir, woardeur t ook voak bie eerdeulie vonden wordt. n Verschil mit eerdeulie is dat eerdgas n leger percentoage orgoanische stoffen bevat.
t Grootste gasveld van Nederlaand ligt in t Grunnegse Slochter. Sunt 1963 is doar gas wonnen, moar dij kroan is sunt 1 oktober 2023 òfsloten[1] (omreden eerdbevens). In de Waddenzee en in klainere velden in onder andern Beem, Waarvum, Saaksum en Ol Pekel wordt nog wel gas wonnen.
Bie t vervuiern van eerdgas mit vrachtwoagen wordt t soamenperst, om de dichtte te verlutken en meer tegelieks vervuiern te kinnen. Vanòf Ruslaand, ain van grootste gasleveranciers, wordt t gas via pieplaidens noar landen in Europa vervuierd. Sunt de inval van Ruslaand in Oekraïne het de Nederlaandse stoat dit stop zet, om de Russische oorlogskas nait meer te spekken en om nait meer van heur òfhankelk te wezen.[2]
Eerdgas wordt veural bruukt veur t koken en verwaarmen van t hoes of n ander gebaauw. Dit wordt doan, deur middel van t verbranden van dit eerdgas, woardeur de wotterstofdailkes mit zuurstof binden en bie t vörmen van wotter, energie (waarmte) vrijkomt. De koolstof bindt ook mit zuurstof, wordt koolstofdioksied en komt mit de overge dailkes in de locht. Dit droagt bie aan t bruikaseffekt.
Pure wotterstof is dus schoon. t Komt nait in natuur veur, dus in tegenstellen tot eerdgas is wotterstof n energiedroager en gain energiebron. Deurdat allìnd de wotterstofdailkes verbraand worden, wordt pure wotterstof ook zain as t perfekte alternatief veur de fossile braandstoffen.
Hìnwiezen
bewark
|
Schreven ien t Noord-Oldambtsters |
- ↑ RTV Noord - Gaskraan dicht. Archiveerd op 19 oktober 2023.
- ↑ Rijksoverheid.nl - Minder Russisch gas. Archiveerd op 19 oktober 2023.