't Klepperklömpke

Wei bin ik ?

Geboren en getogen in t mooie dörpke Eanter. Doar kuiern ze plat, wiej wussen neet aans. Ok biej miej op de kleuterskole kuiern de meesten plat. Mangs a’j good luustern heurden iej der ene aans proaten, Eduard van de measter, Eef van’ domie of Esther van’ dokter. Met Esther spöllen ik wa-l-s en ik kan oe wa vertellen dat de sproak vuur oons gin verskil maken. In’t spölketeer smaken eur “boterham uit een trommeltje” net zo lekker as mien pläkken stoete oet’n tuutje en as zee “viel met haar step” dear’t eur net zo zeer as dat ik met mien autopet pleerden. Wat’ Nederlaands betröf: Wiej warren joonk, wiej learden vlot en zo pröat iederene in de läste klasse van de kleuterskole netjes “netjes”.

Woar he'k oawera oet ehängen

De leagere skole in Eanter. College Noetsele in Nijverdal. Waarkt in Zwolle en seens zowat dartig joar won ik now in Eanske.

Mien dialect

A'j t boawn stoande hebt eleazen ku'j oe vuurstellen dat mien dialect nog a verbasterd is, mer ik doo mien beste. Op de leagere skole en ok in t vuurtgezet oonderwies ha’k der dan ok weanig last met. Allenig biej oons in thoes en met könnigen wörden der Eanters esprökken en boeten de dure Nederlands.’t Wörden aans toew’k zeelf wichter kreeg. Netuurlijk kan’k netjes ABN, mer a’k hellig wor dan waart oe mer! Miene meakens bint der wa groot umme wörden, a hebt wiej um sommige weure verhitte debatten ehad.’t Weurdje -wiedwagens- vertalen ik noar -wijdwagens- mer in’t Nederlands is dat wagenwijd. Kleane dinge könt’n groot verskil maken.Seends da’k met IEKUS bezig binne, vergiewt zee’t miej gelukkig. Ik proate now “geoorloofd” plat.Stiekem hopt ze netuurlijk dat’t nog wier oawer geet, mer ik wet wa better: “Eens’n Eantersen, aait’n Eantersen.”

Wat der oet miene haande is ekömmen

-Illustroasies in n book met gedichten vuur n biejaardencentrum in Eanske.
-Exposities in t MST 2006 en in t Fysiocentrum 2007 in Eanske.
-Winnaar van t Talens Palet 2008, dan bi'j vuur 3 joar de beste amateurskeelder van t laand.
-A drei moal in nen expositie in t CODA museum in Apeldoorn. http://www.gejoja-art.nl/expo
-t book "Ik hete IEKUS" eskrewen en de plaatje eteeknt.http://www.iekus.nl

Oawer IEKUS

A met skriewn begönnen in 1995 toew miene meakens nog op de basisskole zatten. Eers in, een vuur mien geveul, good Eanters. Toew in 2003 Jipke en Jannoaken oetkwam he'k de hele tekst herskrewen. 't Vuurdeel is da'j dan consequenter könt skriewn, iej hebt nen droad woar a'j met vearder könt breien. Mer a vlot köm der nen wieziging: “Twents, hoo schrief iej dat” van Uitgeverij TwentseWelle. Nog nen moal de hele tekst zovöl meuglijk an-epast. Wat n waark. ‘t Eanters is net ietskes aans dan’t Tweants en sommige weure stoat neet in de richtlienen van’t beuken. Um’t ietskes herkenbaarder te maken he’k oonze “Viej zint” vervangen duur “Wiej bint”,wat gangbaarder Tweants is. Ok har’k meuite met de -sch- en umdat wiej nog ech nen -sk- oetsprekt blif dat in dit book dus gewoon -sk- : skole, skone, sköape, enz. Waarkweure he’k voloet eskreewn: lopen, loeren, enz. Behaalve weure met as oetgaank -wn- dat he’k zo eloaten: giewn, leawn, bliewn, skriewn enz.“Ik hete IEKUS” is zo duur iederene good te leazen, helemoal netuurlijk met de Nederlaandse versie der biej nöast. Doarumme wol ik ok geerne dat' op de Wikipedie köm te stoan zodat leu kunt zeen dat ok oale sproaken in 'n niej beukske past.

Wa'k vuur Wiki kan doon

Ik zagge dat der behoofte is an ene met kennis van kunst. Biej disse he'j der ene vunden.'t Klepperklömpke (overleg) 13:22, 20 nov 2011 (CET)