Grietje Clewits

Grietje Clewits (Nietap, 24 september 1883 - Grunning, jannewaori 1962) was een Drèentse onderwiezeres, dichteres en verhalenschriefster.

Lèven

Grietje Clewits was van onderwiezersvolk. An de normaalschoele op Tolbert, krek oaver de grèenze mit de pervincie Grunning, haalde ze heur onderwiezersakte. Ze gaf les in Nei-Dörd (1902), Hesseln (1903), Nei-Roon (1910-1938) en Roon (töt an heur pensionering in 1943). Ze was veurzitster van de Bond van Plattelandsvrouwen (ofdieling Roon), was gangs in 't dörpshuuswark en warkten in de biebletheek.

In 1960 kreeg Clewits van de gemiente Roon een zulvern erepenning veur heur jaorenlange dienst in 't leger onderwies en heur verieningswark. Ze hef nooit etrouwd ewest.

Schrieveri'je

Sund 1947 publiceerden Clewits gedichten in 't dialect van Roon (diel van 't Noordenvelds) in Maandblad Drenthe; vanof 1956 ok in Oeze Volk. Mit Peter van der Velde har ze in de Leekster Courant van 1948 töt 1950 een brievenfulleton, 'Op en om de Helterbult'. In 1954 stelden ze mit Jan Naarding en Hans Heyting de in Assen uutekomen bloemlezing Drentse versjes; vergaard voor 't bestuur van de afd. Drenthe van de Nederlandse Bond van Plattelandsvrouwen samen.

Peter van der Velde hef veur de Historische Vereniging 'Roon' in 1982 heur gedichten ebundeld onder de titel Zummeraovend. Bekende gedichten van Grietje Clewits bint 'An mien Drenthe' en 'd’ Elterbult'. Op 't leste schreef Hans Heyting een komische variaant.

In Roon is een Juff. Clewitsstraat.

Citaot

Mouder, wat hoelt daor?

Döt dat de wind?

Jao, gao mor rustig

Slaopen mien kind.

Mouder, wel laacht daor

Zo haard boeten deur?

Dat döt de wind, leivie,

Slaopen gaon, heur!

’t Wichie gaait slaopen,

Mor mouder is bang.

Heurt ze in boeten

Neit dudelk gezang?

Uut 'd’ Elterbult', in: Scheupers van de taol (kiekt bi'j de Bronnen)

Bronnen

• Rouke Broersma (red.) (2003). Scheupers van de taol: Bloemlezing van de Drèentse Schrieverij 1837-2003. Zuudwolde: Het Drentse Boek. Blz. 51.
• Encyclopedie Drenthe Online
• Historische Vereniging 'Roon'
• Dr. H. Nijkeuter (red.) (2006). De dichter en de wichter. Verzamelde gedichten van Hans Heyting. Zuudwolde: Stichting Het Drentse Boek. Blz. 99 & 114.

Uutgaonde verwiezingen

• Veurdracht van Clewits heur gedicht 'd'Elterbult'
• Lied 'De Helterbult' deur Ab Drijver, ebaseerd op Clewits heur gedicht 'd'Elterbult'

Dit stok is eskreven in 't Zuudwest-Zuud-Drèents van de Drèents-Oaveriesselse grèensstreek.