Henny Hamhuis

Henny Hamhuis (Almelo, 14 april 1927 - Eanske, 7 augustus 2011), as schriever ok bekend onder de bijname Hennik van 'n Scheenken, was een Twèentse journalist, reclamemaker, spreker, schriever, dichter, vertaler en publicist. Hij woonde in Ossel, gemiente Eanske. As journalist warkte hij bij de Enschedese uutgave van de kraante Het Parool. Ok was e assistent van concertmeister Jo Juda van 't Koninklijk Concertgebouworkest en besprak e films.

Nao zien tied as verslaggever begunde e mit 't schrieven van teksten veur cabaret- en revuegezelschoppen en veur heurspöllen. Hamhuis, wie zien bijname Hennik van 'n Scheenken verwis naor de 'ham' (schinke) in zien achtername, schreef zien teksten in 't Twèents en in 't Nederlaands. Nogal ies warkte hij in de maande mit Joop Stokkermans, die zien liedteksten op meziek zette. In 1962 wördden Hamhuis zien lied Kleine kokette Katinka een hit toe as 't duo De Spelbrekers der 't Nationaal Songfestival mit wunnen.

Van de Twèentstalige zanger Ben ten Donkelaar (ok: Ben Donkelaar) verscheen in 1979 op 't label Telstar de plaat Oonze volk: Ben Donkelaar zingt teksten van Hennik van'n Scheenken, mit twaalf nummers. De muzikant Harm oet Riessen vertolkte Hamhuis zien gedicht 'Grèèdske'.

Hij publiceerde onder meer in Nedersaksisch blad De Moespot, weekblad Twente Intiem en 't Jaarboek Twente. Zien dichtbundel Oonze volk (1978) waren de lu bezunder drok op, mit tienduzend verkochte exemplaren. In 1988 was Hamhuis mit-oprichter van de Stichting Literaire Manifestaties Enschede, waor e best wat jaor veurzitter van ewest hef.

In de bundel Rilke: Sieben Nedersaksisch (2007), mit zeuven gedichte van Rainer Maria Rilke aoverezet in 't Grunnegs, Drèents, Twèents en Nederlaands, naamp Hamhuis de Nederlaandse vertalings veur zien reken.

Citaot

[...]
Willemien, Willemien,
diene beenkes goat roond,
Willemien, Willemien,
zo joonk en gezoond,
Willemien, Willemien,
't lèèm is luk kòt,
Willemien, Willemien,
Willemien
is a vot.

Uut 'Willemien', in de bundel Hèènig an

Uutgaves

Oonze volk (dichtbundel, 1978)
Hèènig an (dichtbundel, 1979)
All'ns te hoope! Wèèrk oet beukskes en heukskes (verzamelbundel, 1987)
Rilke: Sieben Nedersaksisch (2007)
Nöstrig zwiegen / Grimmig zwijgen (?)

Bronnen

Dit artikel is eschreven in 't Zuudwest-Drèents.