Kampereilaand

(döärstüürd vanaf "Kampereiland")

t Kampereilaand (in Kampen ook wel t Binneneiland[1])is n Nederlaands eilaand in de monding van de Iessel bi'j Kampen, t grenst an de Iessel, t Kattendiep, t Ketelmeer, t Zwärte Meer en t Ganzediep. t Eilaand is 3.000 bunder groot en ligt in de Overiesselse gemeente Kampen.

In de 19e eeuw beston Kampereilaand uut drie eilaanden: Kattenweerd, Raos-Pieperstärt en Binneneilaand. De drie eilaanden waren van mekare eskeiden deur t Rechterdiep en t Noorddiep. In de 20e eeuw kreeg t Kampereilaand de vörm die t now ef. t Rechterdiep wier edempt, t Noorddiep wier bi'j de Iessel of-esleuten, t Kattendiep wier egraven en der kwamen ni'je inpolderingen op de Zuderzee (Rechterveld, Willem Meijerpolder, Stikkenpolder en Zwärtemeerpolder).

Töt veur kort a'j op t Kampereilaand alliend maar boeren (melkveeolderi'jen), maar deur alleraande ontwikkelingen is dät stärk an t veraanderen. Op t eilaand wonen ongeveer 500 mensen. Der is n buurtskap met n kärke en n basisskole. Der is n kämping en der bin wat rekreatieve avens. t Kampereilaand is verbunnen met de Ganzesluze, de Eilaandbrugge en Ramspolbrugge. n Klein gedeelte van t Kampereilaand eurt bi'j de Flevolaandse gemeente Noordoostpolder.

Grondbezit Kampen bewark

In 1363 skönk de bisschop van Utrecht Jan van Arkel de eilaanden in de Iesselmonding an de stad Kampen in ruul veur de rechten van de stad in de polder Mastenbroek.[2] Kampen kreeg niet alleend de eilaanden, maar ook t recht-van-anwas. Uutbreidingen van de eilaanden op de Zuderzee waren daordeur ook eigendom van de stad. Deur ofzetting en aktieve inpoldering breidde Kampen zien grondbezit in de loop van de eeuwen stärk uut. t Uuteindelike boerengrondbezit van de gemeente was 5.000 bunder. t Beston naost t Kampereilaand uut de Mändtiesweerd (600 bunder), de Pieper (200 bunder), de Melm, Butendieks en de polder Broeken en Maoten. t Ele bezit wier um t kort te olden ook wel t "Kampereilaand" enuumd. De pachtinkomsten waren zo goed dät de gemeente Kampen in de 19e eeuw gien belastingen meer oefde te effen. Ier zag t bedriefsleven wel brood in. Dit leidde onder aandere töt de vestiging van de ThuK in Kampen. In oktober 2007 droeg de gemeente Kampen t eigendom van zien ele bezit over an Kampereilaand Vastgoed NV. De gemeente is de ienigste andeelolder. t Verspreidingsgebied was deur stadsuutbreidingen inmiddels of-eneumen tot 4.000 bunder.

Laandskap bewark

t Kampereilaand van now nemp n ampärte plaatse in in t Nasionaal Laandskap Iesseldelta. De Iesseldelta is ien van de meest unieke rivierdelta’s van Nederlaand.[3] Typerend veur t eilaand is dät de oldere boerderi'jeen op terpen ebouwd bin. Dit was neudig umdät t eilaand véúr de ofsluting van de Zuderzee in 1932 bi'j n oge waterstaand väke overstroomde. An t Kampereilaand in t Ketelmeer en Zwärte Meer liggen rietvelden.

Referensies bewark

  1. Reeks Nederlandse dialectatlassen. Dialektatlas van Zuid-Drenthe en Noord-Overijssel
  2. Webstee van de gemeente Kampen/stadsärven
  3. Webstee van de gemeente Kampen/geskiedenisse


  Dit artikel is eskreaven in et sallandske dialekt van Kampereilaand, in de Algemene Nedersaksiese Schriefwieze.