Kniepertie

Knieperties of iezerkoekies bint zute, dunne, haarde waofels dei traditioneel umendebie de jaorwisseling bakken wordt. Ze wordt eten in Drenthe, Overiessel, Grunning (Veenkelonies en Westerwôlde) en Gelderlaand (de Achterhoek).

Knieperties wordt bakken in speciaole waofeliezers. Vrogger waren dit geeitiezeren kniepiezers dei boven het heerdvuur holden werden. Nou wordt elektrische waofeliezers gebruukt.

Het meist liekt knieperties nog op oubliehoorns zoas gebruukt veur schepies, maor het recept is aanders: zeuiter en mit keneel.

Prissentaosie

Zie ok: Nijjoarsrollechie

Volgens de traditie heurt de waofelties in december plat, as kniepertie, prissenteerd te worden en vanof neeijaorsdag as neeijaorsrollechie. De gedachte hierachter is dat in december het olde jaor zuk glad en al ontvouwen hef. Op neijaorsdag symboliseert het rollechie het onbekende neie jaor. De platte versie wordt veural in Drenthe en Overiessel eten; de oprolde versie, de rullekes, meer in Grunning en de Achterhoek.

In Koevern weuren in vroggere tieden de iezerkoekies oetdeeld an de armen. In 1770 weur een poging daon dit gebruuk te verbieden, zönder succes.

Citaot

En 't olde mèense, ze dacht niet an knieperties bakken veur neijaorsdag en mèe te maken, det ze aanders nog nooit aover-eslagen had, zo laank as ze etrouwd was ewest.

Uut Harm: boerenlèven an de Riest, roman deur Lucas Jonker (1928, herdrokt in 1988, Zuudwolde: Het Drentse Boek)

Zie ok

Nedersaksisch

Achterhooks: knieperke
Drèents: kniepertie(n)
Grunnegs: kniepertje
Tweants: rul(le)ke

Schreven in het Midden-Drèents