Kroamschudd'n in Mariaparochie

Kroamschudd'n in Mariaparochie is nen korten tekenfilm van twentsen komiek Herman Finkers, emaakt in 1988. Et is et kristelike karstverhaal oaver de geboorte van Jezus Christus, mer dan verteld as of et in Twente geburen. 'n Verteller kuiert Hollands, de figuren in 'n film Twents. Zinsnedes oet dissen film zint dagelikse oetdrukkingen wörden in et Twents.

Noordergevel van de roomse karke van Mariaparochie, woer as Finkers zien idee vandan halen.

Nöast dat et bol steet met allerhande woordgrappen löt Kroamschudd'n ook verskillende kulturele gebroeken zeen. 'n Film vank al an met een gevelteken in 'n titel. In Oost-Nederland goat de leu hen kroamskudden bie leu wat pas nen kleinen ekregen hebt. In 'n film loopt Jozef en Maria in boerendrachten, kump de bakker langs met nen krentenwegge, dut nen engel poesten op nen middewinterhoorn en zint de Watermölle van Eule en 'n kroezeboom te zeen. De skepers in et veld zeet de engelen an vuur witte wieven. Jozef hef nen Twentsen skeldnaam noar zien timmermansberoop: Spieker-Jozef. Mariaparochie is een dorp in Twente, eaven boaven Almelo, de domoalige wonstea van Finkers.

Et tekenwark is van John Croezen en et spul is inkluurd duur Jessica Bakker. Finkers dut zelf et verhaal an mekaar kuiern en ook de stemmekes van de figuren insprekken. 'n Film doert neet mear as 14 minuten.

In 2023 wör ne opfrisde versie vanniejs oetbracht en dreid vuur RTV Oost en oetgeaven as book.

Kulturele beduding

In Twente is dissen film nen klassieker wörden. Doezenden zett zik nog alle joaren vuur de tellevisie, want RTV Oost dreit Kroamschudd'n op Eersten Karstdag, vasten prik. Völle slagzinnen oet 'n film, zo as 'Kö'j mooi helpen drukken', 'A'j den kearl neudig bint is he der ok nooit!', 'Wir sind drei kluge Leute', en '...en doar weer 'n zön van', zint vaste oetdrukkingen wörden in de Twentse sproake.

Oetgoande koppeling

• Et profiel van Kroamschudd'n bie imdb.com