Ne pillewegge (ok wal krentenwegge eneumd) is ne grote krentenstoete, van zon 30 cm breed, en van 50 cm tot wal 2 meter lang.

In den Achterhook en Tweante, was (en op sommige plaatsn is) t tradisie, dat de noabers ne pillewegge metbrachten (onder n krommen arm), as dr in de buurte ne kleinen geboarn was, en zee hen kroamschudden gingn. Bi-j t bestelln bi-j dn bakker kreeg e meestieds te heurn, dat e neet te knieperig met de krentn wean mos, want ne echte krentnwegge is meer zwart as wit.

Volgens deezelfde traditie, mos den earsten noaber de wegge ansnieden, woarnoa iederene ne beste plakke kreeg, besmeerd met duftig roombotter. As t tied van noar hoes opan goan was, kreeg iedern noaber n stuk wegge met, zo lang as t heft van t broodmes, woarmet de wegge esneden wodden. Dr bunt nog steeds Achterhookers, dee't lever een stuksken pillewege hebt as beschuute met muuskes.

T woard wegge kump van de vorm van de stoete: t zut er oet as n soort karststol, moar dan zonder spijs, en meestieds völle groter. Wegge kö-j in t Nederlands vertaaln as wig, spitsvormig dus.

De leste joarn, wödt de tradisie minder stark, en kö-j de wegge ok antreffen bi-j andere feestelekheedn, en wödt e ok an-eboaden in de horeca, veur toeristn.