Leevde

Leevde ümvat ne rygel starke en positive gevölens en gedachtes vöär en tüsken lüde en vöär tastbåre en neet-tastbåre saken. Et gevööl kan deepgånd weasen, mär ouk ervaren wörden vöär et simpelste vöärval of ding. Leevde van nen moder vöär en kind is wat anders as tüsken twey geleevden, wat weader anders is as ne leevde vöär byvöärbeald sport, musik of eaten. Döär mekander bedolet wy med leevde en starke antrekking en gevöölsmåtige vereynselviging.

Leevde kan beide gode en kwåde uutwarkingen hebben. Vanuut leevde untståt an de eyne kante menskeliken sorg en andacht, medleaven en geneygenheid, ouk wal et 'unselvsüchtige loyale en walwillende sorgen vöär et walweasen van nen ander". An de andere kante kan leevde leiden töt moreel falen, ydelheid, selvsüchtigheid en egoisme. Ouk kan et lüde töt many, begeyrigheid, besitterigheid en afhangelikheid dryven. Med leevde künnet wy ouk handelingen van medleaven en geneygenheid vöär andere mensken, unsselv of deers beskryven. In öäre verskeidene förme drivt leevde verholdingen tüsken lüde an. Ümdat et sou ne belangryke gemoodstostand is, is et ouk eyne van de meyst vöärkummende tema's in de kunsten. Vanuut de biology bekeaken is leevde ne funkty dee lüde by mekander höldt teagen gevår en wårdöär as de soort blivt bestån.

Oldgreekske filosofen saggen ses förme van leevde: leevde vöär de family (in et greeksk, Storge), vreandskappelike of uppervlakkige leevde (Philia), romantiske leevde (Eros), selvleevde (Philautia), leevde vöär gäste (Xenia), and goddelike leevde (Agape). Moderne skryvers hebbet wydere leevdesförme beskreaven: unbeantwoorde leevde, löädige leevde, geselskapsleevde, uutvorende leevde, kalverleevde, selvleevde en höävse leevde. Andere kulturen hebbet weader aparte wöörde vöär specifike leevdersümstandigheiden, sou as Ren, Yuanfen, Mamihlapinatapai, Cafuné, Kama, Bhakti, Mettā, Ishq, Chesed, Amore, Charity en Saudade.

De lätste twentig jår is der voordan meyr weatenskappelik undersöök når leevde. Et klörenrad van de leevde is nen teory wårin as an de hande van et traditionäle klörenrad dree höyvdleevdes, dree sekundäre en neagen tertiäre leevdes beskreaven wordet. In de teory van de leevdesdreehook wördt leevde upedeyld in "intimiteit, passy en towyding". Leevde hevt dårby ouk religiöse en spirituäle bedüding.

Döärdat leevde sou breyd gebruked wördt en de gevölens dee as der med samenhanget sou ingewikkeld künnet weasen, is et in vergelyking med andere gevölens fråi lastig üm der wat samenhangends oaver te seggen.

Woordverklåringen

Et woord leevde kan in verskillende ümstandigheiden verskillende dinge bedüden. Vöäle andere språken hebbet verskillende wöörde vöär wat by uns allemål 'leevde' heat. De greken hebbet byvöärbeald lösse wöörde vöär veer soorten leevde: agape, eros, philia en storge. Ümdat 'leevde' in yderen kultuur wat anders kan weasen is et håste neet möägelik üm der ne slutende verklåring vöär te geaven.

Skounwal den ård van leevde vake bedisseld wördt, künnet verskillende syden van et woord verklård worden döär vaste te stellen wat leevde neet is. Leevde as algemeyne uutdrükking vöär en positiv gevööl (starker as 'möägen') steyt meysttyds teagenoaver haat (of neutrale unverskilligheid). As minder-seksuelen en starker-emotionelen form van romantiske verbinding steyt leevde vake teagenoaver lust of gealheid. As verholding tüsken lüde wårby as der spoars van romantyk sint, steyt leevde mangs teagenoaver vreandskap. Al kan, med name in de engelske wearld, et woord leevde ouk gebruked worden vöär nauwe vreandskappen en platte leevde. Et gebruuk van de wöörde 'vreandin', 'vreand' of 'gode vreanden' maket et der neet makkeliker up.

In abstrake beskryvingen is leevde en beleavenis dee eyn menske by en ander menske (en mangs ouk sikselv) vöölt. By inbegreapen in et woord sint handelingen en holdingen as 'sorgen vöär' en 'sik stark verynselvigen med'. Nöäst kulturele verskillen, is et begrip leevde ouk döär de jåren hen veranderd. Wat geskeedkündigen settet moderne upvattingen oaver romantiske leevde af teagen wat der in de middeleywske adelike höve as romantiske leevde seen wör, al sint der oorolde leevdesgedichten van wyd vöär dee tyd bekend.

Döärdat leevde sou lastig en teoretisk te verklåren is, wördt ne deepgånde bespreaking der van doudehöwwen med klisjees. Der sint heyl wat standaard uutspråken oaver leevde, sou as Virgilius syn "Leevde oaverwint allens" en "All you need is love" van de Beatles. Thomas van Aquino meynden nå vöärbeald van Aristoteles dat "leevde is et gode vöär nen ander willen." Den filosoof Gottfried Leibniz meynden dat leevde is "vergenöögd te weasen med et gelük van nen ander." Volgens Meher Baba is der in leevde "en gevööl van eynheid" en ne "aktive achting vöär de intrinsike waerde van et leevdesobjekt." Den bioloog Jeremy Griffith nöömt leevde "unvöärwaerdelike unbaatsüchtigheid".

Neadersassisk

Achterhooksk, drentsk, sallandsk, stellingwarfsk: liefde
Twentsk: leefde
Grönningsk: laifde

De Nysassiske Skryvwyse dekket al disse uutspråkverskillen af med den woordform leevde.