Loki

gud in de germaanske mytology


Loki is nen gud in de germaanske mytology. In wat brunnen is Loki de söäne van Fárbauti en Laufey en nen bröder van Helblindi en Býleistr. Loki is etrouwd med Sigyn en se hebbet ne söäne, Narfi of Nari. Med de röäsinne Angrboða hevt Loki de dochter Hel, den wulv Fenrir en de wearldslange Jörmungandr.

'Den straf van Loki'. Vöärstelling van Louis Huard.

Do as Loki es in de gedaante van ne maere was, wör hee beswangerd döär den dekhengst Svaðilfari. Sou wörp Loki et achtbeynige paerd Sleipnir. In de verhaal-edda wördt hee ouk de vader van Váli nöömd, al steyt der ouk twey mål in dat Woden de vader van Váli is.

Wo as Loki sik töt de andere guden vorholdet, hangt van et verhaal af: mangs helpet Loki de guden, mangs is he kwådwillend. Loki kan sik van gedaante veranderen. Mangs is hee nen salm, ne maere, ne vlege en möägelik ouk ne olde vrouwe med name Þökk (oldnoorsk vöär 'danke'). In de goodwillende verhalen med de andere guden bedecht hee den doud van den gold Balder en bindet Váli Loki vaste med de ingewanden van eyne van syne söäns. In beide de dicht- en verhaaledda set de gudinne Skaði ne groute slange boaven em as dat geböärt. De slange seywelt vorgif boaven em, wat Sigyn upvangt in ne skåle. Toch müt see mangs de skåle löädig smyten, en van de dröppels dee as Loki dan raket vorwringet hee sik van seyrde, wårdöär as mangs aerdbeavingen untståt. By den anvang van Ragnarök sal hee sik vry weaten te wringen en med de röäsen teagen de guden medvechten. Dårby löpt heeHeimdall teagen et lyv en söält de beide mekander ümme brengen.

Loki kümt vöär in de dicht-edda, et bookwark wat in de 13. eywe upstelled wör uut öldere traditionele brunnen en vortelkünst. Ouk wördt hee nöömd in de verhaaledda en de Heimskringla den as in de 13. eywe döär den domåligen geskeedkünnigen Snorri Sturluson wör daleskreaven. Hee steyt ouk tüsken de Noorske Runedichtsels, wördt besüngen in de dichtsels van de Skalds en hevt ne rulle in skandinaviske volksverhalen. Et kan good Loki weasen den as steyr up de runesteynder van Snaptun, Kirkby Stephen en et Krüüs van Gosforth. Volgens de meyste geleyrden is Loki den gud van de undöägende. In vöäle populäre media wördt når Loki verweysen.