Madagaskarplan

Et Madagaskarplan was en idee van Nazidüütskland üm europääske jöäden under dwang af to voren nå Madagaskar. Höyvd van de Jöädske Afdeyling van et düütske Ministery van Butenlandske Saken Franz Rademacher küm in juni 1940 med et idee, kort vöär den Val van Frankryk. In et vöärstel stünd den uproop an Frankryk üm de franske kolony Madagaskar up to geaven, as deyl van de vreadesunderhandelingen.

Den fransk-poolsken vöärlouper van et plan had al steades up Madagaskar aneweysen wåras de jöäden sik good redden kunden.

De poolske regeyring had in 1937 al es undersocht of et neet kun med poolske jöäden. Nen taakgrupe dee der hen estüürd was üm et to bekyken, meynden at der mär 5000 töt 7000 familys up et eiland kunden woanen. De nazi's probeerden vöär den Tweyden Wearldoorlog an al länger de jöäden et land uut to krygen, mär dat lükkeden töt dan to mär halv. In 1940 wör der düs når swöärdere måtregelen esöcht. Sou küm et madagaskarplan weader up tåfel to liggen.

Rademacher skreav up den 3. juni 1940 vöär dat Madagaskar ne bestemming vöär de europääske jöäden worden must. Nazileider Adolf Hitler vünd et en mooi plan, un Adolf Eichmann küm up den 15. augustus 1940 med en memorandum dat veer jår lange alle jåren nen miljoon jöäden up de boot solden gån. Et eiland solde dan nen polityståt under de SS worden. Et idee was dat vöäle jöäden wal solden beswyken an de swåre leavensumstandigheiden as et plan döärgüng. Mär der küm niks van up den klos, ümdat de britten up sey allens vanuut Düütskland blokkeerden. Do as de nazi's in september 1940 de Slag üm Grout-Brittanie verlöären küm et plan up de planke to liggen. Vanaf 1942 wör et vergeaten, do as de nazi's med de Enduplössing kümmen: de stelselmåtige volkermoord up de jöäden. Et Madagaskarplan dröäg dåran by as vöärnamen psychologisken trad.

Oorsprung

De Nazis warren ja neet de eyrsten med plannen üm de jöäden argens anders hen to voren. Paul de Lagarde, nen orientalist, küm al in 1878 in syn wark Deutsche Schriften med et idee üm jöäden når Madagaskar af to voren. Ouk de jöäden selv wolden der wal oaver nådenken: leyden van de Sionistiske Beweaging makeden seriöös wark van et Ugandaplan. Russiske jöäden wörden voordan vaker lastig evöllen by pogroms in et Russiske Ryk, un sochten nen uplössing döär argens anders hen to trekken. Se keaken nauw når en deyl van de britske oustafrikaanske beskarmståt (wat nu Kenia is). Ouk dat plan güng neet döär.