Holocaust

De Holocaust was nen volkermoard up europääske jödden tydens den Tweyden Wearldoorlog. Tüsken 1941 un 1945 brachten Nazidüütskland un öäre bundgenouten stelselmåtig ungeväär ses miljoon jödden ümme. Dat was souwat twey-darde van alle europääske jödden. De meyste lüde wörden of massaal afeskötten of med gas vergivtigd in vernetigingskampen. De vöärnaamste kampen warren Auschwitz-Birkenau, Treblinka, Belzec, Sobibor en Chełmno in et besette Polen.

Köäring van hongaarske jödden in Auschwitz-Birkenau. Dee neet kunden warken güngen subyt når de gaskamers.

Name

De name Holocaust kümt uut greeksk un bedüdt 'brandoffer'. Et is rechtevoord et bekendste woord üm de stelselmåtige uutroding van jödden döär de nazi's te beskryven. Eyrder wör der noch underskeid emaked tüsken den jödsken holocaust en andere holocausts wårby ouk roma en sinti, homoseksuälen en lüde med ne geystelike beparking et lyden musten. De nazi's selv nöömden et de Endlösing, de enduplössing vöär et Jöddenprobleem.

In et hebreewsk heat et השואה (ha-sjoa), wat vernetiging bedüdt.

Achtergrund

Jödden woanden al meyr as tweydusend jår in Europa. De heyle middeleywen musten jödden et lyden. Volgens kristelik denken hadden see ja Jesus Kristus, den Sönne van God, vermoard. In de 19. eywe kreagen de jödden in völle landen ståtsbörgerskap, in de hoppe dat se sik wal an solden passen. Teagen de 20. eywe hadden de meysten in West- en Middeneuropa dat ouk wal, mär in Ousteuropa spröäken de meyste jödden noch jiddisk en hüngen noch ortodoks jöddendom an.

Blik up de rivyr de Pegnitz in Neurenberg med up den achtergrund de Groute Synagoge, verwöösted in 1938.

In de polityk wör der in de 19. un 20. eywe eküerd oaver de Jöädske Sake. Dat güng der dan oaver dat de jödden internationaal samensweyrden üm lokale europeanen te plükken en der selv better an te worden. Dår küm noch by dat der voordan meyr stüürd wör up de natyståt, en nen düdeliken vyand dårvan was et 'eygenwyse' jödske volk. Ouk de industrialisaty gavven spanning tüsken jödden un neet-jödden. Wat weatenskoppers begünden mensken in rassen in te deylen en seaden dat der nen rassenstryd was. Volgens völle weatenskoppers hadden jödden as afsünderlik ras in Europa niks te söken.

Rund de 20. eywwesseling was Düütskland druk üm et koloniale ryk uut te breiden. Dat voorden al töt nen volkermoard van de Herero en de Nama en dårupvolgend et skeiden van witte un swarte lüde in de Apartheid-samenleaving in süüdwestelik Afrika. Döär den Eyrsten Wearldoorlog (1914 - 1918) güngen lüde de natyståt as warkelikheid beleaven en anhangen. Et eygene land was good, de rest minder waerd. Dårmed untstünden ouk racistiske ideen. In Ousteuropa wörden jödden in pogroms uutemoard. Düütskland had in den Eyrsten Wearldoorlog twey miljoon soldåten verlöären un heyl wat land. Den oorlog was ouk med en verdrag beslötten wat vöär Düütskland ungünstig was. De düütskers kunden et der underling good oaver eyns worden dat dat niks waerd was, ungeacht politiken achtergrund. Vanuut et leager slöög de misvatting an dat Düütskland neet up et slagveld verslån was, mär by den buk edån döär socialisten en jödden.

Oustenrykske ansichtkaarte uut 1919 med nen teykening van ne jödde wat nen düütsken suldåt in de rügge stekt.

Kort nå den oorlog wör de nazipartye stichted. Öäre denkwysen wordet vake seen as de vöärnaamste anleiding vöär de Holocaust. Van anvang an dröymden de nazi's van ne wearld sunder jödden. In völle andere landen was dat neet anders. Volgens öär warren de jödden 'de belichaming van allens wat der mis was in de moderne tyd'. Volgens de nazi's was de düütske naty ne rassüvere gemeynskop dee düütsklands grensen oaversteyg. Alle butenlandske rassen un sociaal andersdenkenden musten vertrekken. De nazipartye en öären leider Adolf Hitler warren voordan druk med nådenken oaver et terüggewinnen van de verlöärene steades un dårby et innemmen van 'Lebensraum' (leavensrüümde) in oustelik Europa üm te koloniseren. Völle düütskers saggen dår wal wat in. De nazi's beloavden dat se de europääske beskaving solden beskarmen teagen de dreiging van de sovjetten. Hitler meynden dat de jödden in samenwarking med westelike machten de bodel bestüürden in de Sovjetuny, en van plan warren üm Düütskland af te brekken.

Upkumst Nazidüütskland

Et "Groutdüütske Ryk", düütske landinname tüsken 1933 en 1941.

In de ekonomiske slechte tyd en politike versnippering tüsken de beide wearldoorlöge in kunde de nazipartye rap meyr anhang krygen. In de verkesingen van 1932 kreagen se selvs 37 procent van de stemmen, döär in te setten up saken as antikommunisme en ekonomiske verbettering. Hitler wör kanseleer in january van 1933 nå en achterkamerbesluut wårin meyrere rechtse politikers mekander de hande dån hadden. Binnen en paar månd wörden alle andere partyen verböäden, de media ekaped, teendusenden politike teagenstanders arresteerd en en systeem van kampen vöär butenrechtelike gevangenskop upesat. Et naziregime must vöäral kriminelen un sociale butenliggers hebben: roma en sinti, homoseksuäle kearls, en lüde dee volgens de nazi's neet warken wolden. De nazi's makeden 400.000 lüde under dwang unvrüchtbår en dwüngen vrouwlüde töt abortus as se genetiske seekdes leyken oaver te draegen.

De nazi's wollen vulleydig grip up yder deyl van et oapenbåre un persöönlike leaven. Toch hadden lüde dee neet rechtstreyks buten de norm völlen en netjes meddeaden der weinig last van. De meyste lüde vünden selvs dat et stükken better güng, want de nazi's tröäken de ekonomy uut et dal döär ståtsingreypen as herbewåpening. De besetting van Oustenryk un Sudetenland in 1938 un Bohemen en Moravie in 1939 gavven de lüde noch meyr et gevööl dat de nazi's good gangs warren. Et düütske volk wör den gansken dag döär oaverspööld med propaganda teagen jödden en andere minderheidsgrupen.

Vervolging

De ungeväär 500.000 düütske jödden warren minder as 1 procent van de bevolking van et land in 1933. In döärsneyde hadden se meyr up de banke as andere düütskers un warren good anepasd. Ne minderheid warren noch neet sou lange leaden uut oustelik Europa et land inekümmen. Verskillende düütske regeyringsambten, nazipartygenouten en lokale oaverheiden kümmen med ungeväär 1500 anti-jödske wetten. In 1933 wör jödden verböäden wisse ården wark te doon. Nå de jödden uut et oapenbåre leaven te verdryven stelden et regime in 1935 de Neurenbergwetten in: völle ståtsbörgerrechten warren vöärbeholden vöär dee "med düütsk of anverwant blood", jödden mochten up ekonomisk gebeed weinig meyr doon, en trouwen tüsken jödden en neet-jödden wör verböäden. A'j dree of veer jödske groutolden hadden wa'j ne jödde. A'j deyls jödsk warren kreag y et stempel 'Mischling' (Mengeling) en beperkingen upelegd. Et regime probeerden de jödden alvoordan meyr af te sünderen, med as uutendelik dool se et land uut te setten. Ouk wörden se voordan meyr uut et skoolsysteem ewäärd. Wat gemeyndes güng oaver wåras de jödden wal en neet mochten woanen of handeldryven. In 1938 en 1939 wörden se ouk uut de lätste beropen ewäärd. Öäre saken un winkels wörden öär afenömmen üm se uut de ekonomy te setten.

Ravage in de synagoge van Aken nå den kristalnacht van 1938

Tüsken 1933 en 1939 was der noch nüms ümmekümmen by geweld teagen jödden. Jödske winkels, vöäral in landelike strekken verlöären de klanten en wörden vake afebrökken. In völle kleine städen tröäken jödden vord en eyndarde van jödske saken musten edwüngen dichte. Antijödsk geweld was noch et slimst in de gebeden dee Nazidüütskland inenömmen had. Van 9 up 10 november 1938 satten de nazi's de Kristallnacht up, nen landeliken jöddenjacht. Meyr as 7500 jödske winkels wörden eplünderd, meyr as 1000 synagoges verneeld of verwoost. 90 Jödden wörden vermoord en 30.000 jödske kearls arresteerd. De meysten wörden nå en paar wekken weader vryelåten. Düütske jödden kreagen ne speciale belasting upelegd wat meyr as 1 miljard Reichsmark upleyverden.

De naziregeyring wolde alle jödden et land uut hebben. Teagen et ende van 1939 hadden de meysten wat dat kunden et ouk al edån. De achterblyvers warren vöärnamelik te old of te arm, of kunden ginnen visum krygen. De meysten, souwat 110.000, tröäken når de Vereynigde Ståten hen. Kleinere köppelkes tröäken når Süüdamerika, Sjanghai, Palestina en Süüdafrika. De emigratytaks leyverden de ståtskasse noch es 1 miljard Reichsmark up, vöärnamelik van jödden. Töt an 1940 bleav et edwüngen emigratybeleid in stand.

Nöäst Düütskland deaden heyl wat andere landen der ouk de demokraty achterhen en kreagen der nen diktator of fascistiske regeyring vöär weader. Vöäle landen, wårunder Bulgarye, Hungarye, Polen, Romenie en Slowakye nömmen ouk antisemitiske wetten an tüsken 1930 en 1940. Oktober 1938 satten Düütskland nen houp poolske jödden et land uut, as reakty up nen nyen poolsken wet wårmed as poolske jödden up den vrömden et ståtsbörgerskap afenömmen kunde worden.

Begin van den Tweyden Wearldoorlog

Inwoaners van et poolske Danswyk begrotet Hitler nå synen inval in Polen.

Up den 1. september 1939 tröäk et düütske leager Polen binnen. Dårup verklården et Vereynigd Köäningryk en Frankryk Düütskland den oorlog. In de vyv wekke vechten wörden ungeväär 16.000 börgers, gyselaars en krygsgevangenen afeskötten döär de düütskers. Ouk wör der flink eplünderd. Speciale eynheiden, de Einsatzgruppen, volgden et leager üm möägelike weaderstand uut de weg te rümen. Rund de 50.000 poolsken en jödsk-poolske leiders wörden arresteerd en afeskötten. Et koncentratykamp Auschwitz wör upesat üm de poolske elite up te vangen dee noch neet vermoarded warren in de eyrste gulv geweld. Rund 400.000 polen wörden verdreyven uut et Wartheland in Westpolen üm woanrüümde te beden an etniske düütskers uut Ousteuropa.

De rest van Polen wör inenömmen döär de Sovjetuny. See oavervöllen Polen uut et ousten up den 17. september, up afspraak nå et Molotov-Ribbentroppakt. De sovjetten voorden hunderddusenden poolske börgers af de Sovjetuny in. Dårby ouk 260.000 jödden, dee den oorlog dårdöär oaverleavden. Al warren de meyste jödden ginne kommunisten, sommigen nömmen ne bane in de sovjetambtenarye. Dårmed dröägen se by an et al bestånde beald under neet-jödden dat de sovjetoaverheyrsking ne jödske samensweyring was. In 1940 völ Düütskland en grout deyl van Westeuropa binnen, wårunder Neaderland, Belgie, Luksemburg, Frankryk, Dänemarken en Noorweagen. In 1941 warren ouk Jugoslavie en Grekenland an de böärde. Deylen van disse besatte gebeden wörden inelyvd by Düütskland, andere deylen kreagen en börger- of leagerleiding.

Den oorlog was tegelyke nen dekmantel vöär et vergassen van souwat 70.000 düütskers med verstandelike of lyvlike bepärkingen in speciaal dårvöär inerichte moardstations. Dårunder warren ouk alle van de veer töt vyvdusend jödden. Undanks dat et sou good möägelik stille hölden wör, lekkeden et toch uut. Hitler bevöl et moarden te stoppen in augustus 1941, mär noch es 120.000 störven döärdat se in den oorlog neet meyr verpleygd wörden of gin etten of medicynen meyr kreagen. Völle van et moardpersoneel en de technyken wörden later gebruked vöär et uutmoarden van de jödden.

Afsündering en tewarkstelling

En lyk ligt up de stråte van de jöddenwyke van Warsjau.

Düütskland kreag seggenskap oaver 1,7 miljoon poolske jödden. Dee probeerden se tehoupe te brengen in et distrikt Lublin van et Generale Governoraat. 45.000 jödden wörden afevoord un achterelåten in november. Völle oaverleavden dat neet. Et afvoren hölde up vöärin 1940, ümdat Hans Frank, den leider van et Generale Governoraat, syn gebeed neet as dumpsteade vöär jödden wolde. Nå et innemmen van Frankryk dachten de nazi's der oaver üm de jödden stelselmåtig når Madagaskar af te voren. Ümdat et land groutendeyls unbewarkbår was, solde dat et de jödden lastig maken üm te oaverleaven. Mär de britten warren te stark up sey, wårdöär et plan up de planke küm te liggen.

By de invasy wörden synagoges afebranded. Dusende jödden vlüchteden of wörden et besatte sovjetgebeed inedreyven. Dårup wörden rap verskillende antijödske regels inesteld. In oktober 1939 musten vulwassene jödden dwangarbeid doon. In november musten se nen witten armband ümme. Öär besit en winkels wörden öär afenömmen. Dårnå wörden se in jöddenwyken underbrachted.

De eyrste getto's stelden de nazi's in in et Wartheland en et Generale Governoraat in 1939 en 1940. De grötsten warren in Warsjou en Łódź, in bestånde verendeylen van disse städen. De getto's wörden afeslötten med täkkedråd en müren. In kleinere getto's musten jödden in armere wyken woanen. Dwangarbeid gavven öär noch wat inkummen en beskarmden in wat gevallen selvs teagen deportaty. In de meyste getto's wörden fabryken en warkplaatsen ebouwd, in sommigen musten de jödden ouk buten de getto warken. In disse getto's kunden familys noch samenleaven. Nen jöddenråd must et oapenbåre leaven regelen en tegelyke rekkening holden med de eysken van de düütskers. Üm te oaverleaven probeerden völle råden de getto's unmisbår te maken as warkkracht. Westeuropääske jödden hoovden ginnen getto in, mär musten wal allens wat se hadden upgeaven.

Völle jödske en neet-jödske vrouwlüde wördden verkracht.

Inname van de Sovjetuny

Up den 22. juni van 1941 völlen Düütskland un öäre strydvreanden Slowakye, Hungarye, Romenie en Italie de Sovjetuny binnen. Den oorlog was meyr begünnen vanuut strategisk as ideologisk ougpunt, mär Hitler meynden dat de 'endstryd' teagen et jödsk bolsjewisme enkel sunder acht up wetten un gebruken van oorlogsvoring ewünnen kunde worden. Ne rappe oaverwinning stünd al up papyr. Dårnå must der ne groute volksverplaatsing kummen, wårby sou'n 31 miljoon lüde vervüngen worden musten döär düütske kolonisten. Üm de oaverwinning rapper te låten verloupen, löäten de nazi's et leager selv etten plünderen, bykummend voodsel weaderümme stüren når Düütskland hen, en lokale bevolking afsketen soudat se sik gin gekke dinge in den kop solden halen.

Publyke terechtstelling van Masha Bruskina, ne witrussiske jöddevrouwe wat sovjetgevangenen had helpen vordkummen

De nazi's verwochten dat de invasy een tekort an etten solde upleyveren. Se hölden in de plannen düs al rekkening med ne massale verhungering van sovjetstäden en sommige gebeden. Et plan was minder effektiv as wat se hopped hadden, mär toch störven noch miljonen an uuthungering, med name in städen in Ukraine, Leningrad en jödske wyken.

Sovjetkrygsgevangenen under düütske leager musten in groute antallen vermoard worden. Sestig procent, 3,3 miljoon lüde, störven an uuthungering, wårmed as se up de jödden nå de grötste grupe slachtoffers van nazimoorden warren.

Jödske krygsgevangenen wörden stelselmåtig afeskötten. Souwat en miljoon börgers wörden noch es vermoarded as vergelding of vöärkumming van verset, wårunder meyr as 300.000 in Witrusland. Vanaf 1942 brandden se dörpe vulleydig af wårvan as se meynden at der versetsstryders woanden. Jöddenwyken en öäre inwoaners wörden 'uperüümd'. Üm 1943 wörden anti-versetsoperatys inesat üm heyle lappen grund van Witrusland te untvolken. Jödden en lüde wat neet kunden warken wörden up de steade afeskötten of afevoord.

Massaal afsketen van jödden

Jödske vrouwe med kaputetrökkene kleyder wördt upejagd döär twey kinder, by nen pogrom in Lviv. Souwat 3000 jödden kümmen ümme by disse pogroms in Lviv in 1941.

Et stelselmåtig vermoarden van jödden begün in de Sovjetuny. By de invasy wörden völle jödden ineskreven by et Roude Leyger. Van de 10 töt 15 miljoon sovjetbörgers dee når et ousten hen et binnenland invlüchteden, warren 1,6 miljoon jödsk. Lokale inwoaners vermoardden minstens 50.000 jödden in pogroms in Letland, Litouwen, oust-Polen, Ukraine en de romeenske grensgebeden. Skounwal de düütskers pogroms anmodigden, is öäre rulle in et geweld umstreaden. Romeenske suldåten vermoardden teendusenden jödden uut Odessa rund april 1942.

Oorsprungelik nazibyskrivt: "Jammer van den koagel... Disse jödden wörden subyt afeskötten." 28 juni 1941 in Witrusland.

Vöär anvang van de invasy wörden de Einsatzgruppen vannys upesat üm se vöär te bereiden up massamoarden. See kreagen den boadskap med dat se sovjetambtenåren en jödste ståtsmedwarkers subyt musten afsketen. Et afsketen wör goodeküerd up grund van et idee dat jödden et kommunistiske systeem andreyven, mär alle sovjetjödden douddoon was neet et oorsprungelike plan. De besetters löäten lokale inwoaners jödden anwysen. De eyrste düütske massamoarden warren ericht teagen vulwassen jödske kearls dee as beambten un höygere beropen hadden ewarked. Teagen ende july warren dusenden afeskötten. De grötste grupe börgerslachtoffers warren jödden. In july en augustus besöchten SS-leider Heinrich Himmler verskillende doudseskaders en gavven updracht üm meyr jödden af te slachten. Vanaf dee tyd warren ouk jödske vrouwlüde en kinder dool. Teagen augustus en september wörden in Litouwen 40.000 lüde de månd ümmebracht. In oktober en november was et moarden in Witrusland in vullen gang.

Et afsketen geböärden vake en paar kilometer buten de woansteade. Slachtoffers wördden tohoupe bracht, musten dan når de afskeetsteade loupen un sik dår de kleyder uuttrekken. In vöäraf egraevene kulen wördden se dan afeskötten. De meyste lüde kreagen eynen koagel in den nekke. In de chaos wörden wat lüde geheyls neet eraked mär leavend begraeven. De kulen wörden nåtyds noch bewaked, mär toch lükkeden et sommige slachtoffers noch vord te kummen. By de slachtingen warren vake tokykers by. As dee de lyken neet plükkeden, dan de suldåten wal. In de Sovjetuny unstünden rund de 200 jöddenwyken, al wör der al rap med de inwoaners afekaarted. Gröttere getto's sou as dee in Vilnius, Kovno, Riga, Bialystok en Lwów hölden et uut töt 1943, ümdat der vöäle emaked wör in de fabryken.

Under de slachtoffers warren ouk jödden dee vanuut andere strekken anevoord warren. Nöäst Düütskland wörden der in Romenie de meyste jödden vermoarded. Tüsken 1941 en 1943 voorden Romenie tüsken de 150.000 en 170.000 jödden af vanuut Bessarabie en Bukovina når jöddenwyken in Transnistrie. Et doudental kan dår good 160.000 man eweasd hebben. Hongarye satten dusende ruteniers uut de Karpaten en butenlandske jödden et land uut in 1941, dee kort dårup in Ukraine afeskötten wörden. Vanaf september dat jår musten alle düütske jödden ne geale steare up de börste en vanaf oktober löät Hitler se afvoren up et ousten an. Vanaf half oktober töt et ende van 1941 wörden 42.000 jödden van et Darde Ryk en 5000 romani vanuut Oustenryk afevoord når Łódź, Kovno, Riga en Minsk. Achterin november wörden 5000 düütske jödden buten Kovno afeskötten en noch es 1000 by Riga. Himmler vünd dat et must uutskeiden te moarden en wat höygere nazileiders hadden der ouk sou öäre gedachten by. In 1942 güng et in de Baltiske Ståten weader verdan med jöddenmoarden.

Afsketen deaden se vake van achteren döär den kop. Dan hoovden de skütters de slachtoffers neet an te kyken en völlen se vöäroaver et grav in.

Do as beslöäten wör üm alle sovjetjödden uut te roden, kunden de 3000 man van de Einsatzgruppen et neet meyr bybeynen. Himmler trummelden 21 bataljons van de Ordnungspolizei up üm öär te helpen. Dårby sköyten suldåten van de landmacht, wåpen-SS en lokale hüürlingen noch meyr jödden af. Teagen et ende van 1941 was meyr as 80 procent van alle jödden in et midden van Ukraine, oustelik Witrusland, Rusland, Letland en Litouwen uutemoarded. Mär minder as 25 procent, sou'n 900.000 ,van dee wat meyr når et westen woanden kunden et nåvertellen. Teagen et ende van den oorlog warren der 1,5 töt 2 miljoon jödden daleskötten en noch es 225.000 roma. De skütters vünden et en verveylend karwei en et kosten tevölle sleppen, wårdöär up den duur beslötten wör üm andere moardmetodes te gebruken.

Stelselmåtigen afvoor in Europa

De meyste geskeedkünnigen meynet dat Hitler nen rechtstreyksen updracht gavven üm alle jödden in Europa ümme te brengen. Wanneyr precys, dår sint se et neet oaver eyns. Volgens wat kenners müt et vöär december 1941 eweasd weasen, do as Hitler en nazileiders upporkende opmarkingen makeden teagen jödden en håste direkt dårup de eyrste massamoard up serviske jödden küm, plannen vöär vernetigingskampen in Polen en den anvang van et afvoren van jödden. Anderen meynet dat lokale leiders der med begünnen en dat et later van höygerhande döärevoord wör. Up den 5. december van 1941 begün de Sovjetuny de eyrste groute teagenanval. Up den 11. december verklården Hitler de Vereynigde Ståten den oorlog, nå den japansken anval up Pearl Harbor in Hawaii. Den anderen dag seade hee teagen nazipartyenleiders: "Den wearldoorlog is anebrökken; de uutroding van de jödden müt de noudsakelike uutkumst weasen."

Dårnå hadden de nazi's verskeidene månden nöydig vöär ne volkermoard oaver et heyle wearlddeyl. Reinhard Heydrich, höyvd van et Reichssicherheitshauptamt (Ryksveiligheidshöyvdkantoor) rööp de Wannseekonferenty tehoupe in january 1942. Dår wörden de antijödske måtregelen beküerd. De meyste Holocaustmoarden wörden in 1942 uutevoord. 20 töt 25 procent van alle Holocaustslachtoffers völlen al vöär dat jår, dårnå in etselvde jår noch es eyns souvöäle.

Vernetigingskampen

Jödden wordet den trein når Chełmno in edreyven.

Al seyd 1939 wördden geystesseken med speciaal untwikkelde gaswagens ümmebracht. Dee technyk wör döäregeaven an de Einsatzgruppen en vöär et eyrste gebruked in 1941. Slachtoffers musten in de wagen gån sitten en wörden med de uutlåtgassen van et voortüüg ümmebracht. Et eyrste vernetigingskamp was Chełmno in et Wartheland. Den lokalen gemeyndebeambten Arthur Greiser starten et up, med goodköäring van Himmler. In 1941 begün et te loupen, do noch med gaswagens. In oktober van 1941 begün den höygeren SS- en polityleider van Lublin, Odilo Globotsnik, med den bouw van Belzec, et eyrste vernetigingskamp med vaste gaskamers. Achterin 1941 in oustelik Oppersilesie warkeden noch völle jödden edwüngen in de Smelterye. Dee wat neet meyr warken kunden wörden in grupen når Auschwitz hen edån üm vermoard te worden.

De kampen leaden an et spoor üm de jödden makkeliker te vervoren, mär vake in afeleygen steades üm neet up te vallen. De stank van massale moardoperatys was good te ruken a'j kortby kümmen. Meystal wörden de lüde in vuleproppede veywagens når de kampen ebracht. Mangs med wal 150 de wagen. Völle störven al underweg, ümdat der wyder niks an vöärseningen an board warren. Mangs warren der meyr lüde as wat der med kunden wårdöär se lange musten wachten. By ankumst wörden de slachtoffers allens afenömmen, musten sik uuttrekken, kreagen de höäre der af en wörden dan de gaskamers inedreaven. Den gasdoud was ne swåre geystelike un lyvlike kwelling en kunde mangs wal 30 minuten duren. Heyl good warkeden de gaskamers ouk noch neet, wårdöär as se et mangs neet deaden. Dan wörden de gevangenen afeskötten. By andere vernetigingskampen oaverleavden de meysten et transport al neet. In Auschwitz wörden tüsken de 20 en 25 procent van de lüde der tüskenuut epikked üm te warken, al oaverleavden heyl wat lüde dat ouk neet.

In öäre administraty noteerden Belzec, Sobibor en Treblinka med mekander nen winst van 178,7 miljoon Reichsmark (ümmerekkend sou'n 804 miljoon euro) an inenömmene besittingen van de slachtoffers. Dårmed was et ne heyle winstgeavende undernemming. By mekander draiden de kampen up minder as 3000 jödske gevangenen, 1000 travniki (vöärnamelik ukrainske hüürlingen) en en händkevul düütske wachters. Ungeväär de hälvde van de jöddenslachtoffers in de Holocaust störv döär givgas. Ouk dusende romani wörden der ümmebracht. Döär gevangenupstanden musten Treblinka en Sobobir eyrder dichte as epland.

Vöärnaamste vernetigingskampen

Kamp	Steade	Vermoarde jödden	Moardtechnyk	Anvang plannen	Duur
Chełmno	Wartheland	150.000	Gaswagens	Juli 1941	8 december 1941–april 1943 en april–july 1944
Belzec	Distrikt Lublin	440.823–596.200	Gaskamers, gaswagens	Oktober 1941	17 määrt 1942–december 1942
Sobibor	Distrikt Lublin	170.618–238.900	Gaskamers, gaswagens	Achterin '41 of määrt 1942	Mei 1942–oktober 1942
Treblinka	Distrikt Warsjau	780.863–951.800	Gaskamers, gaswagens	April 1942	23 july 1942–oktober 1943
Auschwitz II–Birkenau	Oustelik Oppersilesie	900.000–1.000.000	Gaskamers, Zyklon B	September 1941 (Anvangelik bedoold as kamp vöär krygsgevangenen)	February 1942–Oktober 1944

Uutroding van poolske jöddenwyken

Uploup van doudentallen in Belzec, Sobibor en Treblinka tüsken january 1942 en february 1943

Et plan üm de jödden uut te roden in et Generale Governoraat van Polen, Operaty Reinhard, was afhangelik van verskillende dolen van de SS, et leager en de ambtenårye. See wolden et etten van jödden afnemmen, an de neet-jödske polen geaven en sou den swarten markt teagengån. In määrt 1942 begün et moarden in Belzec, wåras jödden uut Lublin henevoord wörden dee neet kunden warken. Et wör bewäärd at dat hülp teagen den swarten markt en dat et düs good was üm et up andere steades ouk te doon. Midden 1942 beslöät de nazitop at der 300.000 jödden mochten oaverleaven in et Generale Governoraat, dee dan under dwang tewarkesteld wörden. Vöäral dee wat verstand hadden van wåpens maken mochten blyven leaven. De meyste jöddenwyken wörden uperüümd in massale afsketingen in de nöägde, vöäral as se neet kortby en treinstation woanden. Gröttere getto's wörden in etappen afevoord richting de vernetigingskampen. Dit was de grötste moardupgave van de Holocaust; 1,5 miljoon poolske jödden wörden vermoard.

Üm upstand un verset teagen te gån wörden de wyken sunder ankundiging oavervöllen, meysttyds 's morgens. De readen van den oaverval wör dan sou lange möägelik under de mütse holden. Trawniki's förmden en vangnet üm de wyke. Jödske wykpolity must vake helpen med et ümmebrengen, wårnå se kort dårup selv afeskötten wörden.

Dee wat up transport musten wörden vake willeköärig uuteköäsen. Völle jödden wörden underwyl al afeskötten, wårnå de wyken besaid med lyken achterbleaven. Jödske dwangarbeiders musten et dan uprümen un waerdevulle saken van de douden afnemmen en inleyveren.

Oorsprungelik byskrivt: 'Med geweld uut de bünkers ehaald.' Et is eyne van de herkenbårste foto's van de Holocaust ewörden.

tüsken 22. july en 12. september van dat jår wör de getto van Warsjau uperüümd. Van de oorsprungelik 350.000 jödden wörden der 250.000 ümmebracht in Treblinka. 11.000 afevoord når warkkampen, 10.000 up stråte afeskötten, 35.000 mochten blyven nå uutwaal en noch es 20.000 töt 25.000 wüsten sik te verstekken. Töt up et ougenblik dat et al te late was wör de inwonners wysemaked dat se neet afevoord solden worden. In ne tydsspanne van ses wekken vanaf begin autustus wörden 300.000 jödden vanuut distrikt Radom når Treblinka eskikked.

Tegelyke musten et ouk andere getto's et lyden. Teendusende jödden wörden afevoord vanuut de Wartegau en oustelik Oppersilesie når Chełmno and Auschwitz. 300.000 jödden - med name vaklüde - wörden afeskötten in Volhynia, Podolia en et süüdwesten van Witrusland. Ouk in Bialystok en Galicia wörden heyl wat jödden vermoard. De jödden deaden döärgåns nauweliks wat terügge. In de Sovjetuny draiden se selv improvisatywåpens in mekander üm teagen de uutroders in et gewäär te kummen. Dit soort upstanden kümmen der enkel as de inwonners echt meynden at öär anders de doud te wachten stünd. In 1943 musten de nazi's grovver gesküt insetten teagen gröttere upstanden in Warsjau, Bialystok en Blubokoje. Üm wydere upstanden te vöärkummen beslöät de nazitop ouk andere getto's uut te roden.

In 1944 warkeden noch 70.000 jödden under dwang in et Generale Governoraat.

Afvoor vanuut andere strekken

Nazi's dryvt jödden vanuut et düütske Würzburg når distrikt Lublin in Polen.

Anders as de moardgebeden in et ousten wör et avoren van jödden in andere deylen van Europa centraal eleided vanuut Berlyn. Wo good of dat güng en up wat vöär ne wyse hüng af van underhandelingen med walwillende regeyringen en wat der et gewoane volk van meynden. In en antal gevallen begünnen lokale bestüürders de dår woanende jödden te vermoarden as se vernömmen dat se deporteerde jödden under te brengen kreagen. As de deporteerde jödden al neet ümmekümmen van de barre ümstandigheiden, störven se in de vernetigingskampen. De eyrste lichtingen jödden wörden noch officiääl registreerd in et kamp. Et by ankumst selekteren en de rest direkt vermoarden begün pas in juli 1942. Wörden düütske en slovaakske jödden eyrst noch når Lublin vervoord, Vanaf mei en juny wörden se rechtstreyks når de kampen hen edån.

In Westeuropa störven de meyste jödden pas nå transport. De besetters musten et hebben van lokale politylüde dee de jödden arresteerden. Dårmed wörden der minder lüde transporteerd. In 1942 wörden der souwat 100.000 jödden vanuut Belgie, Frankryk en Neaderland vervoord. Van de franske jödden kümmen 25 procent ümme. Et doudental in Neaderland was nå verholding höyger as andere landen. Volgens de geleyrden kümt dat döärdat et lastiger was üm under te duken of dat de neaderlandske polity meyr medwarkeden.

De düütske regeyring wolde at andere landen öäre jödden når Düütskland hen deaden. Et eyrste land wat dår an gehöyr gavven was Slowakye. In dat land wörden 58.000 jödden arresteerd en afevoord tüsken määrt en oktober van 1942. De ståt Kroatie had de meyste jödden in et land al afeskötten of in koncentratykampen ümmebracht (nöäst noch heyl wat serviers). In 1942 en '43 güngen der noch es en paar dusend jödden up transport. Bulgarye voorden 11.000 jödden af uut Grekenland en Jugoslavie, wat Bulgarye beset hölden. Dee kümmen ümme in Treblinka. Jödden uut öär vöäroorlogse grundgebeed hoovden neet vord.

Romenie en Hongarye deaden gin jödden up transport. See hadden de grötste grupe oaverleavers nå 1942. Vöär de düütske inname van Italie in september 1943 an wörden italiaanske jödden neet stelselmåtig afevoord. Ouk vanuut italiaansk-besette gebeden löät Italie gin jödden afvoren. Van finske jödden en noordafrikaanske jödden under fransk of italiaansk bewind bleaven de nazi's af.

Helpers en profitöörs

SS-wachters van Auschwitz hebbet der skik an up vakanty in Solahütte.

Når skatting sou'n 200.000 töt 250.000 düütskers hadden rechtstreyks te maken med jöddenmoarden. A'j ouk dee medrekkent wat hülpen organiseren stigt dat antal når 500.000. Miljonen düütskers en andere europeanen köärden et oapenlik good of hölden sik stille. Wårümme of de helpers meddeaden is ümstreaden. Undersöök når SS-leiders, de grötste organisators, weys uut dat dee stark achter dee ideen van et nazisme stünden. Nöäst ideologiske motiven meynden völle lüde at se der better an solden worden, in centen of in ståtus. De düütske SS, polity en leagereynheiden hadden gin moide üm genog kearls te vinden üm te helpen jödden afsketen. Weigering wör neet töt nauweliks bestrafd.

Buten Düütskland hülpen nå verholding völle neaderlandske, franske en poolske politykearls, romäänske suldåten, butenlandske SS'ers en polityhülpen, ukrainske partisanen en en antal börgers. Sommigen wörden der to dwüngen, anderen vermoarden jödden vöär de wille, üm der better an te worden of günstiger by de besetters to liggen. Anderen understütteden de nationalistiske of antikommunistiske oavertügingen. Volgens geskeedkünnigen Christian Gerlach dröägen neet-düütske lüde by an sou'n 5 töt 6 procent van jödske starvgevallen. Ouk warren se döärslaggeavend up verskillende andere wysen.

Miljonen düütskers en anderen wörden better an de volkermoard. Der was unwys völle korrupty binnen de SS, undanks dat de upbrengsten van de Holocaust ståtsbesit warren. Verskillende afdeylingen van den düütsken ståt probeerden de stöllene goderen in handen te krygen. Völle lüde kreagen better wark döär de banen van de vermoarde jödden in te nemmen. Sakenlüde hadden gin last van jödske konkurrenty en kunden jödske bedryven oavernemmen. Anderen nömmen hüse en besittingen oaver. Ouk afevoorde jödden buten Düütskland öäre besittingen wörden verdeyld. Selvs vasalståten sou as Fransk Vichy en Noorweagen kunden med gemak jödsk besit oavernemmen. In de jåren nå den oorlog kreagen switserske banken nen slechten name döär gold te beheyren wat nazi's by de Holocaust van jödden egapped hadden. Ouk geld wat vermoarde jödske klanten neet meyr up kümmen halen stöäken se in eygene taske.

Dwangarbeid

Jödske dwangarbeiders müt ne stråte in et witrussiske Mogilev uprümen in 1941.

Vanaf 1938 wördden vöärnamelik in Düütskland en besette gebeden völle jödden in warkkampen underbracht. Disse kampen warren tydelik en wörden beheyrd döär börgerleidingen. By anvang störven der noch neet souvölle an. Nå midden 1941 wör dat rap minder. Bedryven löäten se bewüst un doolmåtig leavensgevöärlik wark doon. Vanaf 1941 wörden jödden dee as kunden warken voordan meyr apart ehölden van de rest, dee later vermoard wörden. Disse lätste musten vake dum wark doon en as der eyne doudgüng hadden se sou nen vervanger. Dee wat et gelük hadden in klokere beropen te warken, hadden meyr kans üm in leaven te blyven. Der was völle verskil in wo as et der in de kampen to güng, mär de jöddenkampen hadden et vake wal et slimste.

Midden 1943 beslöät Himmler dat oaverleavende jödske warkers de kuncentratykampen van de SS in musten. Wat van de warkkampen vöär jödden en getto's warren inericht as kuncentratykamp. Anderen wörden upeheyven en de oaverblyvende jödden musten når en ander kamp hen. Undanks de völle slachtoffers wüsten toch noch 200.000 jödden den oorlog en de kuncentratykampen te oaverleaven. De meyste slachtoffers van de Holocaust hebbet nooit in en kuncentratykamp esetten. Toch blyvet de kampen en kenmarkend symbool vöär de Holocaust.

Med krygsgevangenen uut de Sovjetuny der by musten 13 miljoon lüde hen warken in Düütskland. De grötste grupen dårvan warren sovjetten en polen. Up de romani en jödden nå wörden dee et slimst behandeld. Sovjetten en polen kreagen stöädig te weinig etten en slechte mediske verpleyging, musten lange üren maken en wörden mishandeld döär de upsichters. Hunderddusenden störven. Völle anderen musten in öär eygene land warken. En paar düütske bundgenouten, sou as Slowakye en Hongarye, beslöäten üm de jödden uut te leyveren an Düütskland üm de neet-jödske bevolking te spåren. Ousteuropääske vrouwlüde wörden untvoord üm as seksslaven vöär de düütske suldåten te denen, selvs terwyl as verholdingen tüsken düütske un butenlandske warkers verböäden was. De straffe dårvöär was gevangenskop of de doud.

Untsnapping en underdüken

Nen underdüükbünker wåras jödden sik verstoppeden by den Upstand van Warsjau.

Volgens undersöker Gerlach wüsten in heyl Europa 200.000 jödden sik te verstekken. Weaten wat de düütskers van plan warren was van leavensbelang, mär völle kunden et neet gelöyven. Völle probeerden uut de treinen te springen of te vluchten uut de wyken en kampen. Mär vordblyven en neet trappeerd worden was souwat unmöägelik.

Hülpe of (et uutblyven van) oapenbåre weaderstand van de lokale bevolking was döärslaggeavend, vöäral in Ousteuropa. Dee wat vordestökken satten, musten et hebben van wat neet-jödden öär gavven. Of ne jödde et kunde nåvertellen hüng stark af van of he geld had, gode verstandholding med neet-jödden, der neet-jödsk uutsaggen, de lokale språke good kunde, syn wilskracht en geluk. Underedökkene jödden wörden upespoord med hülpe van lokale kollaboratöörs, dee der ouk wat an verdeenden.

Vöäral in Ousteuropa stünd de doudstraf up et verstoppen van jödden. Dee wat et toch andörvden deaden et vake neet enkel uut goodheid, mär as tuuskemiddel vöär seks of geld. Et küm vake genog vöär dat helpers uutendelik toch de jödden upgavven as de centen up warren. Volgens Gerlach sint sou hunderddusend jödden verråden en ümmekümmen. Anderen probeerden al geheyls neet vord te kummen üm dat se meynden dat et toch gin verskil makeden.

In de meyste versetsgrupen warren heyl wat jödden by, vake in de meyrderheid. Toch warren se neet altyd welkum, vöäral in nationalistiske versetsgrupen. Sommigen brachten ouk jödden ümme. Vöärnamelik in Witrusland, wat en günstig landskop un dichte busken hevt, kunden jödden good by de versetslüde ansluten. Üm en nåby de 20.000 töt 25.000 kümmen der in de Sovjetuny in et gewäär. Noch es 10.000 töt 13.000 jödske neetstryders leavden in familykampen in ousteuropääske busken. De bekendste grupe hyrvan warren de Bielski-partisanen.

Reaktys van andere landen

De nazi's wüsten at wat se deaden stark veroordeyld solde worden döär de internationale gemeynskop. Up 26. juni 1942 küm de BBC med en verslag in alle understönde språken van de deenst, van den Jödske Sociaaldemokratisken Bund un andere versetsgrupen, döäregeaven döär de poolske regeyring-in-ballingskop. Et verslag güng oaver de moord up 700.000 jödden in Polen. In december van 1942 dröäg de Vereynigde Natys ne gesamenlike verklåring uut, wårin as se de stelselmåtige jöddenmoord veroordeylden. De meyste neutrale landen in Europa bleaven Düütskland günstig gesind. Toch wüsten wat jödden vord to kummen når neutrale landen, dee se of upvüngen of anders weinig deaden.

In den oorlog wüst de amerikaanske Jödske Joint Distribution Committee (JDC) 70 miljoon dollar by mekander to leggen. Nå den oorlog groiden dat getal töt 300 miljoon. Et geld was bestemd üm emigranten to helpen un vöär voodsel- un hülppakketten. Nå den oorlog wör der en deyl apart esat vöär oaverleavenden. De Vereynigde Ståten verböäd hülpgeld to stüren når et besette Düütskland, mär de JDC güng der toch med voordan. Tüsken 1939 en '44 wüsten 81.000 europääske jödden vord to kummen med dank an de hülpe van de JDC.

Tweyde hälvde van den oorlog

Meyr moarden

Ruteniske subkarpatiske jödden ståt upesteld vöär de köäring in Auschwitz-Birkenau. Vrouwlüde en kinder links, kearls rechts. En verendeyl wör eköäsen üm te warken, de rest vergasd.

Nå verskillende düütske neaderlågen in 1943 wör et voordan düdeliker at Düütskland den oorlog solde verlesen. Vöärin 1943 wörden 45.000 jödden uut et besatte noorden van Grekenland når Auschwitz, wår se souwat allemål ümmebracht wörden. Nå at Italie achterin 1943 van kante wesselden löät Düütskland dusenden jödden uut Italie en vöärmålig italiaansk besat gebeed in Frankryk, Jugoslavie, Albanie en Grekenland afvoren. Dat lükkeden mär halv. Deportatys vanuut westelik Europa löäpen voordan vakerder vaste nå 1942, ümdat jödden dår vakerder underdöäken en lokale regeyringen teagenwarkeden. De meyste däänske jödden wüsten når Sweyden vord to kummen med hülpe van et däänske verset. Et hülp ouk at Düütskland der in Dänemarken mär halv wark van makeden. In Ousteuropa was et anders: dår güng et uutmoarden van jöddenwyken in 1943 en '44 voordan, de jödden dee as et töt dan to oaverleavd hadden warren do as noch an de böärde. Togelyke wörden Belzec, Sobibor en Treblinka dichte dån.

De grötste moardryge nå 1942 was up hungaarske jödden. Nå den düütsken inval in Hungarye in 1944 hülp de hungaarske regeyring gewillig med üm binnen acht wekke 437.000 jödden når Auschwitz af to voren. Et küm de hongaarske knippe good uut dat der jödske rykdommen to verdeylen warren. En dat der jödden wörden afevoord as dwangarbeiders was ouk günstig, want dan hoovden neet-jödden neet med. Dee wat de köäring oaverleavden musten medhelpen in de bouw un fabryken, üm noch den uutrul van nye gevechtsvleegtüge to versnellen. Et was de nazi's teagen 1943 elükked üm souwat alle jödden et land uut to warken. In 1944 wör dat weaderümme draid, ümdat et warkvolk nöydig was.

Doudenmarsen en bevryding

Kampdokter Klein van Bergen-Belsen steyt in en massagrav nå de bevryding in april 1945.

Do as allieerde trupen voordan meyr uptröäken, deporteerden de SS lüde vanuut baltiske koncentratykampen når kampen in Düütskland en Oustenryk. Swakke en seke gevangenen wörden meysttyds al in et kamp afeskötten. Anderen musten med den trein of loupende, med niks gin etten of völs te weinig. Dee wat et neet bybeynen kunden wörden afeskötten. De verplaatsden musten dårnå weader warken of vöärkummen dat de allieerden öär solden krygen. In oktober en novembere 1944 wörden 90.000 jödden van Budapest når de oustenrykse grense deporteerd. Vanaf midden 1944 wörden gevangenen vanuut Auschwitz deporteerd. De gaskamers wörden untmanteld en vanaf oktober wörden de oaverblyvende 67.000 lüde vanuut Auschwitz up doudenmarsen når et westen hen estüürd.

January 1945 satten meyr as 700.000 lüde in kampen, wårvan eyndarde vöär et ende van den oorlog störv. Üm dissen tyd warren de meyste kampbewoaners sovjetten of poolske börgers, dee arresteerd warren weagens echt of vermodelik verset of ümdat se under den dwangarbeid probeerden uut te kummen. Döär de doudenmarsen küm de tovoor van vöärråden in et gedrang, wårdöär noch meyr lüde störven. By de doudenmarsen wörden jödden neet volgens en systeem ümmebracht, mär toch störven der noch 70.000 töt 100.000 in de lätste månden van den oorlog. Völle oaverleavers van de doudenmarsen kümmen weader in andere kampen torechte, dee in 1945 döär de westerse allieerden vry kümmen. De bevryders vünden höype lyken dee as se med graevmaskines in massagraven musten skuven. Wat oaverleavers kümmen hyr vry, anderen wörden döär et Roude Leyger bevryd up öären weg når et westen.

Doudental

Starvdecyfer van jödske inwoaners per land.

Rund de ses miljoon jödden wörden vermoard. De meyste störven in Ousteuropa, de hälvde dårvan in Polen. Rund de 1,3 miljoon jödden dee under de nazi's eleavd hadden of in eyne van de an Düütskland allieerde ståten, oaverleavden den oorlog. Eyndarde van de jödden wearldwyd en tweydarde van de jödden in Europa wör ümmebracht. Doudentallen verskilden flink per strekke. In wat strekken bleav der nüms oaver. Döärdat wat landen beskarming böäden of hülpen med vordkummen wörden noch es 600.000 jödden eredded. Kinder en öldere lüde hadden noch minder kansen as vulwassenen.

Den doudeliksten tyd van de Holocaust was under Operaty Reinhard, do as de vernetigingskampen lösgüngen. Ungeväär twey miljoon jödden wörden vermoard tüsken määrt 1942 en november 1943. In nen tyd van 100 dage wörden rund de 1,47 miljoon jödden vermoard, tüsken juli en oktober 1942.

Döär lösstånde moardpartyen van de nazi's wörden ouk en grout antal neetjödske börgers en krygsgevangenen vermoard. Gerlach meynt dat et der 6 töt 8 miljoon warren. Gilbert meynt 10 miljoon en et United States Holocaust Memorial Museum segt 11 miljoon. In wat landen, sou as Hongarye, wörden vöär jödden slachtoffer van den oorlog. In Polen was et ne meyrderheid of minstens de hälvde. In andere landen löäten vöäral neet-jödden et leaven, sou as in de Sovjetuny, Frankryk, Grekenland en Jugoslavie.

Nåsleyp en herinnering

Terügkeyr en uutvlucht

Nå den oorlog probeerden völle jödden weaderümme te kummen. Dat was neet altyd suksesvul. Völle kunden öäre familys neet weadervinden. Vake wolden neet-jödden öäre besittingen neet weadergeaven en mangs wörden jödden noch weader anevöllen, sou as by de pogrom van Kielce in 1946. Völle oaverleavenden beslöäten vord te gån. In meyrdere landen wör rapporteerd dat antisemitisme jüüst tonöäm nå den oorlog, vöärnamelik döärdat lüde jödske besittingen neet weader terügge wolden geaven. An et ende van den oorlog warren der minder as 28.000 düütske jödden en 60.000 neet-düütske jödden in Düütskland. Teagen 1947 was et antal jödden in Düütskland egroid töt 250.000 döärdat völle vanuut Ousteuropa hyr upan kümmen nå goodköäring döär de sovjetten. In de vluchtelingenkampen was 25 procent jödsk. Skounwal de meyste oaverleavers ginne beste gesundheid meyr hadden, probeerden se noch ne ård selvbestüür up te setten in de kampen, üm underwys en terügkeyrreygelingen in gode banen te leiden. Völle landen satten neet te wachten up jödske immigranten. Oaverleavers bleaven vake in Düütskland woanen töt den ståt Israel in 1948 egrunded wör. Anderen tröäken når de Vereynigde Ståten hen ümdat dår de immigratywetten supeler wörden.

Dåders vöär et gerecht

Aneklaagden by de Neurenbergprocessen in 1948.

De meyste dåders van den Holocaust sint nooit vervolgd vöär öäre misdåden. Tydens en nå den Tweyden Wearldoorlog wörden in völle landen vermeynde helpers van Düütskland vervolgd, mär neet vanweage öäre bydrage an den Holocaust. Ungeväär twey töt dree procent van de europääske bevolking kreag et vöär de kusen.

De gruweldåden van de nazi's leidden töt de Volkermoordoavereynkumst van Geneve in 1948, mär ümdat hüdige wetten neet oaver dåden in et verleaden künnet gån, had dat gin invlood up de vervolging van de Holocaust-misdöädigers.

In 1945 en '46 vervolgden et Internationale Militäre Tribunaal 23 nazileiders vöär oorlogsagressy, wat volgens de vervolgers de grund van de nazimisdåden was. Toch kreag de stelselmåtige uutroding van jödden ne centrale steade. Düütske lüde vünden de processen van de allieerden up düütsk beset grundgebeed unrechtelik un nen form van wraak; alleyne de Vereynigde Ståten klaagden al 1676 lüde an vöär 462 oorlogsmisdåden. Westdüütskland verhöyrden later sou'n 100.000 lüde en klaagden meyr as 6000 lüde an, vöärnamelik vöär kleine vergrypen. Den höyger eplaatsten organisator Adolf Eichmann wör untvoord un vervolgd in Israel in 1961. In steade van em vervolgen up grund van skrivtelik bewys, beslöäten de israeliske anklagers Holocaust-oaverleavenden teagen em te getügen. Dårmed wör et en publyk spektakel, mär was de wettelikheid van syn proces diskutabel.

Herstelbetalingen

Geskeedkünnigen meynet dat jödden in Düütskland, Oustenryk, Neaderland, Frankryk, Polen en Hongarye sou'n 10 miljard an besit kwytrakeden, ümmerekkend når de waerde van 2022 solde dat sou'n € 160 miljard weasen. De waerde van et wark wat under dwang edån wör is dårby neet mederekkend. Ungeväär 10 procent van allens wat de nazi's van andere landen stöllen was jödsk besit. Medeyne nå den oorlog begünden de oaverleavenden üm terüggave van öäre saken te vrågen. Ouk nå 1990 küm der weader flink wat geld lös, do as et kommunisme in mekander klappeden.

Tüsken 1945 en 2018 betaalden Düütskland sou'n €65 miljard an herstelbetalingen an Holocaust-oaverleavenden un anverwanten. In 1952 beloavden Düütskland Israel 3 miljard Deutschmark (sou'n € 700 miljoon) en noch es DM 450 miljoon (ong. € 90 miljoon) an de Claims Conference. Düütskland betaalden pensionen en andere herstelbetalingen an verskeidene Holocaust-oaverleavenden. Andere landen hebbet geld egeaven vöär afenöämen besit van jödden. De meyste westeuropääske landen hebbet vastgood an jödden terügge geaven nå den oorlog. Kommunistiske landen makeden der nationaal besit van. Polen hevt as ennigste land in de EU nooit terügbetalingswetten anenömmen. De meyste restitutyprogramma's hebbet noch lange neet allens goodemaked van vöär den oorlog. Heyl wat unrorend good is nooit terüggedån når oaverleavenden of öäre nåsaten.

Herdenkingen en geskeedskryving

Gedenkteyken in Berlyn vöär vermoarde jödden.

In de eyrste teentallen jåren nå den oorlog wör de Holocaust vöärnamelik herdacht döär de oaverleavenden en de lüde üm öär hen. Nå den val van et kommunisme in de jåren nå 1990 wör de Holocaust en centraal pünt in et westelike historiske bewüstsyn as symbool van et ultyme menskelike kwåd. Vanaf den tyd küm der ouk in et underwys andacht vöär de Holocaust. Vöärstanders der van meynet, et solde börgerskop verstarken un vöäroordeylen un rassenhaat verminderen. Den Internationale Holocaustherdenking is up den 27. january. Wat landen hebbet nen anderen dag eköäsen. De Holocaust wördt herdacht in gedenksteades, museums en kümt vake in tospråken terugge. Ouk sint der tallouse böker, gedichten, films en toneelstükken oaver emaked. In wat landen is et untkennen van de Holocaust strafbår.

Kommunistiske ståten negeerden et underwarp un swakkeden öäre samenwarking med de nazi's af, ouk nå et kommunisme. In Westdüütskland keyken se sikselv es good in et spegel an in de jåren '70 en '80 van de 20. eywe. Ouk andere landen in Westeuropa deaden dat. De nationale herdenkingen an de Holocaust spreidden sik uut oaver de Europääske Uny, un is nen verbindenden schakel üm samen wark te maken van menskenrechten. Ståten dee as lid van de EU worden willet, müttet disse ideen verplicht oavernemmen. In de Vereynigde Ståten is de herinnering an de Holocaust abstrakter en universeler. Of de herinnering van de Holocaust ouk echt bydrägt an achting vöär menskenrechten wördt wal es betwyfeld. In Israel wördt et mangs gebruked üm geweld teagen palestynen good te küeren.

Volgens heyl wat lüde sint der lessen oaver moraliteit, etyk en polityk uut de Holocaust te trekken, mär up wat vöär wyse sint et de geleyrden neet eyns.

Med dusende böker is der heyl wat oaver de Holocaust eskreaven. Ander pünt van disterye is of de Holocaust en uutwas of logisk gevolg van westelike beskaving is.