Magdalena Zeger
Magdalena Zeger (* üm 1491, † 16.01.1568 in Kolding) weer en kalendermakerske un trouwd med den fysikus un matematikus Thomas Zeger. Öäver ear afkumst is niks nauwers bekend, man see het wul dat kalenderhandwark van earen man leyrd, den eyrsten perfesser vöär matematik an de nye universiteet in Marborg, ümdat see as vrouw sülven ni vorlöyv had en universiteet to besöken.[1]
Waneyr see eksaktement by dat kalenderskryvend med tohöyren prognostiken bygån is, is ni naeger kündig, man wårskynlik het see öäver jåren kalenders vöär Däänmark skreaven. De öäverleaverden eksemplaren van ear kalenders un prognostiken uut de jåren 1561 un 1563 sünt in neddersassisk un drukked in Hamborg. Med ear begun oapenbår ouk almeyn de kalenderdruk dår, ümdat alle anderen bekenden in Hamborg drukkeden kalenders uut later tyd stammet.
Nå den doud van earen man 1544 in Köypenhaven trok see nå Kolding, wårneam see 1568 doudbleyv. Van besünder weatenskopshistoorsk belang is Magdalena Zeger, ümdat see as eyrste vrouw sülvständige publikationen in de astronomy skreyv un upto de eyrsten vrouwen tohöyrt, dee in de natuurweatenskoppen almeyn publiceren.[2]
Literatuurvorwysings bewark
- ↑ Klause-Dieter Herbst. "Die Kalendermacher – Namen, Leumund, sozialer Status". In: Klaus-Dieter Herbst & Werner Greilig [uutg.]. Schreibkalender und ihre Autoren in Mittel-, Ost- und Ostmitteleuropa (1540–1850). Bremen: edition lumière, 2018.
- ↑ Biobibliographisches Handbuch der Kalendermacher von 1550 bis 1750 – Zeger, Magdalena
|
Disse artikel is skreaven in holsteynsk, in de Nysassiske Skryvwyse. |