Nedersaksisch symposium

Et Nedersaksisch symposium is een sinds 2019 de mieste jaoren organiseerde bi'jienkomst waorop lu veurdrachten holen over alerhaande aspekten van tael en kultuur in et Nedersaksischtaelige gebied. De organisatoren bin mit naeme dr. Henk Nijkeuter en dr. Henk Bloemhoff, beidend bestuursleden van Stichting Sasland.

Naor anleiding van elk symposium wodt een Jaorboek Nedersaksisch uutegeven, mit daorin (sommige van) de eholden veurdrachten, verriekt mit illustraties.

Eholen symposia

2019

Et eerste Nedersaksisch symposium, ok et Entjes-symposium enuumd, vun plaese in Zwolle op 13 september 2019. Et was organiseerd rond de honderdste geboortedag van taelkundige en hooglerer Nedersaksisch Hendrik Entjes (1919-2006) en et verschienen van Nedersaksisch in een notendop. Inleiding in de Nedersaksische taal en literatuur (Van Gorcum, 2019). Naor anleiding van et symposium kwaamp end 2020 et Jaorboek Nedersaksisch 1 (2020) uut.

2020

De Mannefestaosie Nedersaksische Literetuur Anno 2021 wodden organiseerd deur Stichting Drents Archief, Stichting Sasland en uutgeveri'je Koninklijke Van Gorcum. Disse mannefestaosie wodden op internet eholen wegens de coronakrisis. Onder meer waren d'r prissentaties in et Duuts deur dr. Helmut Lensing (over Duuts-Nederlaanse kontakten in et kader van de Nedersaksische Beweging) en deur dr. Doreen Brandt, hooglerer Nederduutse literetuur an de Carl von Ossietzky Universität in Ollenborg. Naor anleiding van de mannefestaosie verscheen et Jaorboek Nedersaksisch 2 (2021).

2022

In Assen wodden op 16 september 2022 et darde Nedersaksisch symposium eholen. D'r wodden onder meer een Sallaanse en een Stellingwarver overzetting van et Oldsaksische epos de Heliand eprissenteerd (van respectievelik Jan Nijen Twilhaar en Henk Bloemhoff), plus een ni'je uutgave deur Timothy Sodmann van de Oldsaksische tekst. Naor anleiding van dit symposium verscheen et Jaorboek Nedersaksisch 3 (2022).

2023

Op 14 oktober 2023 ha'j in Assen et vierde Nedersaksisch symposium. Onderzuker an de Vrije Universiteit Redbad Veenbaas prissenteerde zien anwiezings om te mienen dat Bernlef et Oldsaksische epos de Heliand eschreven hef. Henk Nijkeuter gonk in op et te verschienen boek "De blui van 't leeven is maor zo kört van tied". Leven en werk van Jan Naarding (1903-1963). Netwarkster Adrie Hemmink wodden interviewd over heur initiatieven om et Twèents an te jaegen, en bestuursveurzitter van de Overijsselacademie Annet Westerdijk gonk in op wat heur instelling veur et Nedersaksisch kan betiekenen. In een slim vol pergramme kwaamp nog een riege aandere sprekers an et woord; zo kondigde Philomène Bloemhoff een Canon van het Nedersaksisch an.

Dit stok is eschreven in et Stellingwarfs van de Kop van Overiessel.