Jaorboek Nedersaksisch
Et Jaorboek Nedersaksisch is een ienmaol in et jaor uutkoemend boekwark mit artikels over de Nedersaksische tael, kultuur en schrieveri'je in Nederlaand en Duutslaand. Et verscheen in 2020 veur et eerst en wodt uutegeven deur Stichting Sasland in Oosterwoolde in saemenwarking mit boekenbestellen.nl in Zwaag. In elk jaorboek staon miest de teksten van lezings en veurdrachten die op een an et jaorboek veurofgaond Nedersaksisch symposium eprissenteerd bin. De teksten bin mit kleurenofbieldings verriekt.
Achtergroond
bewark
Et idee van een Nedersaksisch jaorboek ontstun mit naor anleiding van een symposium over de Nedersaksische tael en letterkunde, op 13 september 2019 ehullen in Zwolle. Et Jaorboek Nedersaksisch wil veurzien in de liemte die as ontstaon was nao et votvalen van de Driemaandelijkse Bladen veur tael en volksleven van het oosten van Nederlaand (1901-1931; ni'je riege 1949-2002).
Drievende krachten aachter et Jaorboek Nedersaksisch bin onder aanderen de Stellingwarver taelkundige Henk Bloemhoff en de Drèentse literetuurhistorikus Henk Nijkeuter, respektievelik sikketaoris-ponghoolder en veurzitter van Stichting Sasland. Zij schrieven in heur inleiding tot et eerste diel:
- In de tied van now is Driemaandelijkse Bladen veur sommigen haost een legendarisch tiedschrift wodden [...] Mit et votvalen van een belangrieke basis, we doelen op de ondergang van et Nedersaksisch Instituut, en et feit dat tael- en letterkundige tiedschriften et vandaege-de-dag in et algemien al niet makkelik hebben, het Sasland et ienvooldig zegd niet andurfd om te perberen en begin opni'j een tiedschrift. [...] Een jaorboek, te beginnen mit disse bundeling en mit as vervolg aandere bundels uut symposia, of bundels 'naor anleiding van', liekt oons een alternatief dat redelik goed te doen wezen moet.
Verschenen dielen
bewarkJaorboek Nedersaksisch 1 (2020)
bewarkEt eerste diel in de riege, et Jaorboek Nedersaksisch 1 (2020), kwaamp end 2020 uut en bevat de praoties die ehullen bin op et Nedersaksisch symposium van 13 september 2019 in Zwolle, anevuld mit nog wiedere tael- en letterkundige artikels. Et symposium was organiseerd rond de honderdste geboortedag van taelkundige en hooglerer Nedersaksisch Hendrik Entjes (1919-2006) en et verschienen van Nedersaksisch in een notendop. Inleiding in de Nedersaksische taal en literatuur (Van Gorcum, 2019).
Jaorboek Nedersaksisch 2 (2021)
bewarkEt tweede diel, Jaorboek Nedersaksisch 2 (2021), kwaamp midden 2021 uut en bevat de veurdrachten veur de 'Mannefestaosie Nedersaksische Literetuur Anno 2021' van 12 febrewaori 2021, organiseerd deur Stichting Drents Archief, Stichting Sasland en uutgeveri'je Koninklijke Van Gorcum. Wegens de coronakrisis vun disse mannefestaosie online plaetse. Ok dit diel van et jaorboek wodden anevuld mit akkedemisch oriënteerde artikels over Nedersaksische tael- en letterkunde.
Jaorboek Nedersaksisch 3 (2022)
bewarkEt Jaorboek Nedersaksisch 3 (2022), uutegeven deur Stichting Sasland mit Pumbo.nl, verscheen naor anleiding van et in Assen eholden Nedersaksisch symposium van 16 september 2022. Haoste alle daor eholden lezings en veurdrachten bin in et jaorboek bi'j mekaer ebracht. De lezings en veurdrachten waren van Ingeborg Nienhuis (over heur Grunninger schrieveri'je), Willem Jan Teijema (Stellingwarver gedichten), Dick Schlüter (Twèentse gedichten), Joop Hekkelman (Achterhoekse verhaelen en gedichten), Harrie Scholtmeijer (over et wark van de west-Overiesselse domeneers Pieter Heering en Hermannus Schuurmans), Philomène Bloemhoff (over nog niet uutegeven taelkaorten die bi'j Klaas Heeroma zien Taalatlas van Oost-Nederland en aangrenzende gebieden heuren), Bert Groenewoudt (over archeologische voonsten mit betrekking töt de Germaanse godsdienst in Twente), Arjan Sterken (over 'naolopers', drouwelende overledenen, in Noord-Nedersaksische volksvertellings), Jan Nijen Twilhaar (over zien Sallaanse Heiland-overzetting) en Henk Bloemhoff (over zien Stellingwarver Heliand-overzetting); ok wodden Timothy Sodmann zien neie uutgave van de Oldsaksische Heliand-tekst eprissenteerd. In et jaorboek is wieder nog een stok van Henk Nijkeuter openeumen over Jan Naarding zien Drèentse bewarking van et epos van Reintien de vosse, en een bespreking deur Henk Bloemhoff van Tsead Bruinja zien De eerste bloemlezing van de Nederlandse poëzie (2022).
Bronnen
bewark- Neerlandistiek. Online tijdschrift voor taal- en letterkunde: artikel 'Pas verschenen: Jaorboek Nedersaksisch 1 (2020)' (7 december 2020)
- Webstee van Stichting Sasland
- Uutneudiging veur de 'Mannefestaosie Nedersaksische Literetuur Anno 2021'
- Bloemhoff, Henk, Philomène Bloemhoff-de Bruijn, Jan Nijen Twilhaar, Henk Nijkeuter en Harrie Scholtmeijer (2019), Nedersaksisch in een notendop. Inleiding in de Nedersaksische taal en literatuur, Assen: Koninklijke Van Gorcum BV
- Bloemhoff, Henk en Henk Nijkeuter (2021) (red.), Jaorboek Nedersaksisch 2 (2021), Oosterwoolde; Zwaag: Stichting Sasland i.s.m. boekenbestellen.nl
|
Dit stok is eschreven in et Stellingwarfs van de Kop van Overiessel. |