Niebroek

Niebroek (Nederlands: Nijbroek) is n darp in de gemeente Voorst in de Nederlandse provinsie Gelderland. t Ligt tussen de Veluwe en de Iessel an de Niebroekerweterink in de Niebroekerpolder. t Darp hef mit t butengebied derbie zo'n 700 inwoners.

De Niebroekerpolder was nao de ontginning n richterambt. In de Franse tied veranderde t richterambt in n gemeente die op 1 jannewaori 1818 bie de gemeente Voorst edaon is.

Geschiedenisse

In 1328 gaf graaf Reinald III van Gelre toestemming an Johannes Verenbartensoen en Martijn Willems um n grote moerassige wildernisse tussen de Veluwe en de Iessel te ontginnen. Hee gaf daorbie an dat t gebied 'Niebroeck' mos gaon heten. t Natte broekgebied dat veural uut rivierklei bestong wier ontgunnen volgens t verkavelingspatrone van n veenontginning. Niebroek wier n polder deur t anleggen van de Baekendiek, de Veluwsediek, de Kadiek, de Zeediek en de Vloeddiek. Enkele van zuud naor noord stromemde weteringen zörgden veur de ofvoer van kwel- en hemelwater dat kortbie Hattem in de Iessel eloosd wier. De dieken en weteringen zörgden der ok veur dat t gebied toegankelik was.

Kenmarkend bint nog altied kavels die haoks op mekare staon, watergangen en wegen. Boerderiejen gingen langes de an-elegden dieken bouwen, vake op pollen. An de Middendiek, die veural veur de ontsluting an-elegd was, wier n karke ebouwd en ontstong de darpskern van Niebroek. De gronden van de polder bint veurnamelik in gebruuk as gresland veur de melkveeholderieje. De haegen die vrogger massaal an-eplant wieren en as veekering dienden bint nao 1900 grotendeels verdwenen.

De muuite weerd um te bekieken

An de Vloeddiek ten noorden van t darp he'j n uutweteringsslusien van kort nao 1328. t Verkeerden in vervallen staot en wier daorumme nao bouwkundig onderzuuk in 1990 weer helemaole op-eknapt. De natuurstenen duker mit holten valschut is, ezien de laeftied, meugelik uniek in Nederland. t Darpskärksien stamt ok uut de 14e eeuw, in t gebouw bint muurschilderingen beweerd ebleven. n Antal grote negentiende-eeuwse herenboerderiejen rond t darp staon eregistreerd as gemeentelik monument of rieksmonument.

Foto-uutstalling

• 
  Boerderieje De Bijvanck uut 1898
• 
  Niebroek in 1968
• 
  Boerderieje uut 1752 (foto 1967)
• 
  Hervörmde karke

Gemeente Voorst
Heufdplaatse Twelle Darpen Bussloo · Klarenbeek · Niebroek · Terwolde · Teuge · Voorst · Wilp · Wilp-Achterhoek Buurtschappen Appen · Duustervoorde · Gietel · De Karre · Klein Amsterdam · Noord-Empe · Posterenk · Spekhoek · Steenenkamer · De Vechte · De Wiek

Dit artikel is eskreaven in et oustveluwske dialekt van Teuge, in de Algemene Nedersaksiese Schriefwieze.