Polder

Nen polder is n gebeed dat leager ligt asn et umrengende water en woarvan den waterstand kunstmoateg ereageld kan wödden. Polders wodt in et algemean deurkruust mit watergangen. Veur de waterhuusholding is et neuder dat de sloten good deur könt streumen. Um hiervan zeaker te wean wodt de gravens 2 keer per joar bekekken: der wöd bekekken of et water deep genög is en of der geen waterplanten in et water stoat. Eigenoaren van laand grenzend an water bunt verplicht um eure sloten te bekieken.

Poldermölle, let op et verskil in waterstand veur en achter de mölle

Noordoostpolder,in-epolderd tussen 1936 en 1942, underdeel van de zuderzeewarken

Nen polder is ne waterstoatkundege eenheid, dat wil zeggen dat et geen verbinding hef mit et butenwater behalve deur kunstwarken. Ne poldermölle of gemaal (mangs meerdere) reagelt et polderpeil; deur inloaten kan (vers) water wödden binnen eloaten. Nen polder is umrengd deur ne waterkering.

In delen van nen polder kan n hoger peil wödden ereageld, mit behulp van stuwen.

Nederlaand hef rundumme 3 doezend polders. De helfte van et polderoppervlak in Europa ligt in Nederlaand. Der bestoat verskillende soorten. De 3 belangrieksten bunt de dreugmakeri-je, de indieking en de ontginning. Ne dreugmakeri-je is ne inpoldering van open water, bieveurbeeld n meer of plas, dat letterlek is dreug-emaakt. Ne indieking is ne inpoldering van geti-jdengebeed längs de kuste of nen revier. Hierbi-j geet et um n gebeed dat al tiedelek dreugveel en deur indieking veur altied dreuge blif en in kultuur ebrach kan wödden. An de kuste geet et mangsmoal um kwelders, längs den revier um veurmoalege uuterweerden. Ne ofgroaving is in kultuur ebrachten woosten groand, biev. n veurmoaleg brook-, veane-, heide- of duungebeed. Dit hooft genen polder te wean: hier is allenig sproake van as et gebeed veur altied bemalen mot wödden.

Wettensweerdegheden

Nederlaand wöd in binnen- en butenlaand mangs verbunden mit polders. Dit wöd uut-edrökt deur et Engelse gezegde: God created the world, but the Dutch created Holland. alsmet deur et Poldermodel veur ne kenmarkende Nederlandse benoadering van de politiek.

Nedersaksisch

• Algemeen: polder
• Grunnegs: pôlder, poller
• Stellingwarfs: poolder
• Tweants: po(o)lder