Oostnriek

Oostnriek (Duuts: Österreich), voloet Republiek Oostnriek (Republik Österreich), is n laand in Mildn-Uropa. t Laand greanst in t westn an Zwitserlaand en Liechtenstein, in t noordn an Duutslaand en Tsjechie, in t oostn an t Slowaaknlaand en t Hongaarnlaand en in t zuudn an Italiën en Sloveniën. De heufdstad is Weenn. t Laand hef ne öppervlakte van 83.883 veerkaante kilometer en t tealt 9,1 miljoen inwonners. Dat gef ne bevolkingsdichtheid van 109 inwonners/km².

Republik Österreich
Vlagge van Oostnriek	Woapn van Oostnriek
Kaarte van Oostnriek
Informasie
Sproaken	Duuts, regionaal ook: Sloveens, Krowatisch, Hongaars
Heufdstad	Weenn
Regeringsvörm	Federale republiek
Geleuf	Rooms 78% protestants 5%
Laand en inwonners
Oppervlakte	83.883 km²
Inwonners - Dichtheid	9,1 miljoen 109 inw./km²
Koordinaten	47° 30′ N, 14° 0′ O
Oaverig
Volksleed	Land der Berge, Land am Strome
Munteenheid	uro (EUR)
Tiedzone	+1
Nasjonalen feestdag	26 oktober
Web | Kode | Tel.	.at | AUT | 43

Oostnriek

De officiële taal is Duuts, mer regionaal wördt ok Sloveens, Krowaties en Hongaars sprökn. t Grootste deel van de Oostnriekers is rooms (78%). De leu betaalt der as in Nederlaand ok met de uro, umdat t laand lid is van de Uropese Unie.

t Oostnriekse laandschop wördt vuur dreekwart kenmearkd duur t gebargte van de Alpen. n Heugstn bearg van Oostnriek is n Großglockner met 3737 meter heugte. Aandere heuge bearge bint n Wildspitze (3768 m), n Weißkugel (3739 m), n Großvenediger (3674 m), n Hintere Schwärze (3628 m) en n Similaun (3606 m). In t oostn langs de riviere de Donau kenmearkt t laandschop zik duur leaglaand en glooinde heuveln. t Leagste punt lig in de deelstaat Burgenlaand. Hier lig Hedwighof eankeld 114 meter boavn zeenivoo. De twee belangriekste riviern bint de Donau en de Inn. Aandere grote riviern bint de Mur, Salzach, Enns en Drau.

Oostnriek is indeeld in neegn deelstaatn (Bundesländer), hieroonder neumd met biejbeheurnde heufdsteedn.

1. Weenn (Wien) - (Weenn)
2. Burgenlaand (Burgenland) - Eisenstadt
3. Karinthiën (Kärnten) - Klagenfurt
4. Salzburg - Salzburg
5. Neder-Oostnriek (Niederösterreich) - Sankt Pölten
6. Stiermarkn (Steiermark) - Graz
7. Tirool (Tirol) - Innsbruck
8. Vorarlberg - Bregenz
9. Öpper-Oostnriek (Oberösterreich) - Linz

Oetgoande verwiezings

Commons: Oostnriek - plaatjes, filmkes en/of gelüüdsbestanden.