Heufdmenu losdoon

De Rottige Meente is een Nederlaans netuurrisservaot, op 'e greens van de perveensies Frieslaand en Overiessel. Et is in de 19e ieuw en 20e ieuw ontstaon deur turfwinning. De naeme betekent lichtkaans "minne gemienschoppelike greide". Et gebied maekt diel uut van de ekelogische heufdstruktuur en is habitatrichtliengebied. Et is in bezit van Staotsbosbeheer.

Mit de Rottige Meente wodde vrogger een veul kleiner gebied in et zuden van Ni'jtriene anduud. Et was gröslaand van een minne kwaliteit. Rond 1900 begon hier de ontginning, die tot in de jaoren vuuftig votzet wodde. Deur et votgreven van et vene kwam et gebied leger te liggen, waordeur de restaanten leegvene driegden te verdreugen.

Om de grote vuurvlinder en de otter te bescharmen wodden in juni 1955 inkelde percelen ankocht. Daornao bin d'r nog verschillende dielen bi'jkommen, onder aandere in deur een ruulverkaeveling. Bi'j et vuuftigjaorig bestaon in 2005 had et risservaot een totaole oppervlakte van omdebi'j 1000 bunders. Petgatten en legakkers herinneren nog an de turfwinning. Et gebied bestaot veerder uut kleine gröslaandjes, trilvenen en veenmosrietlanen. De zeldzeme Gruunknolorchis is d'r te vienen.

Et gebied leit tussen de revierties Kuunder en Lende en wodt deursneden deur de Scheene. Et wodt in et westen begreensd deur de dörpen Munnikeburen, Scharpenzeel en Spange. Midden in et gebied leit Ni'jtriene. In de jaoren vuuuftig wodde dwars deur de Rottige Meente een weg anlegd, van Wolvege naor De Kuunder en de Noordoostpoolder; de hudige N351 (Pieter Stuyvesantweg).