Törf (band)

Törf is een Grunninger folkgroep, opericht in meert 1976. 't Is iene van de oldste treditionele meziekgroepen in Nederlaand en de oldste van de pervincie Grunning. Törf gebruukt onder meer teksten van Grunninger dichters as Jan Boer, Jelte Dijkstra, Hans Elema, Lerus Roelofs en Simon van Wattum, en van de Noord-Drèentse dichter Peter van der Velde.

't Geluud van Törf kuj uniek numen, mit een mix van treditionele en neimoedse invloeden en een hiele batterij an instermenten, mangs exotische.

Geschiedenis

Törf wördden as elektrische groep opericht deur Alex Vissering (gitaar en zang), Paul Scholtens (slagwark) en Eddy de Jonge (basgitaar). Toe as een eerste plaatopname niet deurgunk, zolden ze haoste uut menare gaon, mar op det moment kwaamp Henk Scholte (zang) derbij. Een steugien speulde de groep mit nog aandere muzikaanten, zoas Bernard Bröring en Marja Bos (zang).

Een eerste lp wördden in 1979 uutegeven mit as bezetting Eddy de Jonge, Henk Scholte en Sietske Bloemhoff. Dizze leste gunk in 1983 uut de groep. 't Aandere jaor kwaamp Flip Rodenburg derbij, die verscheiden blaosinstermenten speulde, vaak van eigen makelij. Aandere muzikanten die in de loop van de jaoren tachtig bij Törf hebt espeuld, bint Bert Ridderbos (verscheiden snaorinstermenten), Geert Ridderbos (accordeon) en Jos Kwakman (gitaar).

In 1996 verzörgde Törf de filmmeziek veur de documentaire Der Butt und das Meer van Rolf Blank en Véronique Friedmann. Ok in det jaor kreeg de groep de K. ter Laanpries veur lu of organisaoties die heur inezet hebt veur de Grunninger taal en cultuur.

In 't neie millennium kwaamp Marius Greiner (vioele en altvioele) derbij, kwaamp Jos Kwakman der vanneis bij en scheidde Bert Ridderbos dermit uut.

Hudige bezetting

Henk Scholte (zang)
Bert Ridderbos (cittern, gitaren, bouzouki, banjo)
Geert Ridderbos (accordeon, blokfluite)
Eddy de Jonge (basgitaar en gitaar)
Marius Greiner (vioele, mandoline, turkse trom)
Flip Rodenburg (doedelzak, pommer, tin-whistle, zang)
Jos Kwakman (gitaar, darbucca)

Discografie

Kovvie kloar? (lp, 1978)
t Wordt aans (lp, 1980)
t Braide woater (cd, 1993)
Dr is 'n laand (cd, 1996)
Törf speelt Beukema (cd, 1998)
Op Roemte (cd, 2001)
Olipodrigo (cd,2006)
Schoon van de wind (2009)
Dichten (2015)

Lp's in de maande mit aandern

All tosamen in Strackholt (Atelier im Bauernhaus, PL 519, 1980)
'n Wiendeldaore (Universe DLS 96, 1982)
Grunneger Laidjesfestival 1982 (Telstar 19022 TL, 1982)
Midwintertied ('t Grunneger Laid / Nova-Zembla Records NZR 86012, 1986)

Cd's in de maande mit aandern

Het daghet inden oosten/Bagpipes of the low countries (PAN 2025CD, 1995)
Möven seilt up Wind van Helmut Debus (De 5-97, 1997)
Stroatmezikanten veur de Riepe (Riepe Roofless Records, 2007)
Dutch rare folk (2-CD Food for thought FFT 7060157, 2007)

Noast de eigen albums hef Törf bijedreugen an hiel wat albums van collega-muzikaanten.

't Album Törf speelt Beukema kwaamp mit een tekst van rond 1850, eschreven deur J.P. Beukema uut Lains. De tekst bevat onder aandere daansmelodieën die aj rond die tied veul heurden.

Bronnen

Streektaalzang.nl aover Törf

Uutgaonde verwiezings

Webstee van de groep

Dit artikel is eschreven in 't Zuudwest-Drèents.