Thomas Ainsworth
Thomas Ainsworth (22 december 1795, Bolton Le Moors, Verienigd Keuninkriek - 13 febrewaori 1841, Wierden) was een Britse industrieel en de grondlegger van de Twèentse textielindustrie.
Ainsworth warkten een steugien bi'j 't staolbedrief Cockerill in 't Belgische Seraing; ok warkten e in 't westen van Nederlaand. Vanof 1831 voerden e in oost-Nederlaand en Westfaolen opdrachten uut. Een toevallige ontmoeting in Hengelo mit Willem de Clerq, secretaris van de Nederlandsche Handel-Maatschappij (NHM), leidden töt de oprichting van een weefschoele in Goor in 1833, waoroaver Ainsworth de leiding kreeg (töt 1836). An Twèentse wevers wördden in rap tempo eleerd te warken op Calicot-getouwen mit een verbèterde snelspoel. Al vlogge wördden d'r ok weefschoelen lösedaone in Deepn, Eanter en Holten.
De textieltechnicus Ainsworth begunden pruven te nemen mit nog fienere soorten ketoen zoas drokketoen en cambric. De NHM vreug hum een modelweveri'je en vlasspinneri'je te stichten ecombineerd mit een agentschop. Zien keuze völ op de umgeving van 't kruuspunt van de straotweg van Zwolle naor Almelo mit de revier de Regge. In een directievergaderige wördden veur dizze plek een name uuteprakkezeerd: Nijverdal. De bedrievigheid zol uutgruuien töt de tègenwoordige plaatse mit dizze name. De eerste stien veur 't febriek wördden elegd op 14 meie 1836.
Ainsworth kwaamp te wonen in de körtbi'j elegen olde havezate De Eversberg. Daor kwaamp e in 1841 onverdachts uut de tied. Hi'j wördden begraven in Goor, daoraj zien grafmonement - deur de plaatselijke bevolking uut daankberheid op-ericht - nog altied kunt vienden op de olde gemientelijke begraafplaatse an de Laarstraote - Heman Heijermanstraote.
Rifferenties
bewark- Ainsworth en zien graf op www.dodenakkers.nl
- Een brief van Ainsworth op de webstee van 't Nationaal Archief
|
Dit stok is eschreven in 't Zuudwest-Zuud-Drèents van de Drèents-Oaveriesselse grèensstreek. |