Vereynigde Arabiske Emiraten

land in westelik Asie

De Vereynigde Arabiske Emiraten (VAE, arabisk: اَلْإِمَارَات الْعَرَبِيَة الْمُتَحِدَة al-ʾImārāt al-ʿArabīyah al-Muttaḥidah), of kortweg de Emiraten (arabisk: الِْإمَارَات al-ʾImārāt), is en land in westelik Asie (et Middenousten). Et ligt up den ousterende van et arabiske skyreiland un is nåbers med Oman un Saudi-Arabie. Et deylt seygrensen in den Persisken Gulv med Qatar un Iran. De höyvdstad is Abu Dhabi, mär in Dubai woanet de meyste lüde. In 2013 had et land 9,2 miljoon inwoaners, wårvan 1,4 miljoon emirati's un 7,8 miljoon butenlandsk warkvolk. In 2020 stünd et totale antal up 9,9 miljoon.

الْإِمَارَات الْعَرَبِيَة الْمُتَحِدَة (arabisk)
al-ʾImārāt al-ʿArabīyah al-Muttaḥidah
Vlagge van Vereynigde Arabiske Emiraten
Vlagge van Vereynigde Arabiske Emiraten
Woapn van Vereynigde Arabiske Emiraten
Woapn van Vereynigde Arabiske Emiraten
Kaarte van Vereynigde Arabiske Emiraten
Kaarte van Vereynigde Arabiske Emiraten
Informasie
Sproaken Arabisk (officiääl), gulvarabisk, engelsk
Heufdstad Abu Dhabi
Regeringsvörm Federaal islamitisk parlementäär halv-grundwettelik köäningryk
Geleuf Islam
Laand en inwonners
Oppervlakte
- Water
83.600 km²
neet nömenswaerd%
Inwonners
- Dichtheid
9.282.410
121 inw./km²
Koordinaten Koordinaten untbrekket! Help mid.
Oaverig
Volksleed عيشي بلادي

"Īšiy Bilādī"
"Lange leave myn land"

Munteenheid VAE Dirham (AED)
Tiedzone UTC +04:00 (GST)
Web | Kode | Tel. .ae / امارات. | AE | +971

De Vereynigde Arabiske Emiraten sint en köäningryk wårby den köäning eköäsen wördt van söäven emiraten: Abu Dhabi, Ajman, Dubai, Fudjaira, Ras Al Chaima, Sjarja un Umm Al Kuwain. Dee wordet allemål döär nen heyrsker eleided. Med mekander förmet see et den Federalen Höygerråd. Dee keset med mekander nen president un vicepresident uut disse leyden. In warkelikheid is de heyrsker van Abu Dhabi president un de heyrsker van Dubai vicepresident un eyrsten minister.

Et stükke land wat nu de Emiraten is, woanet al meyr as 125.000 jår lüde. Et was altyd handelskrüüspünt van vöäle beskavingen, sou as Mesopotamie, Persie un India.

Et officiäle gelöyv is der de Islam un arabisk de officiäle språke. Se sittet up de up söäven- un acht-nå-grötste öäly- un gasbellen van de wearld. Abu Dhabi's leider Zayed bin Sultan Al Nahyan, den eyrsten president van et land, untwikkelden de Emiraten döär upbrengsten van den öäly in de verpleyging, skolen un weagen to steaken. De Vereynigde Arabiske Emiraten hebbet de meyst diverse ekonomy van alle gulvståten. In de 21. eywe is et land begünnen minder up öäly un gas to löänen un sik meyr to richten up turisme un handel. De regeyring reakent gin inkumstenbelasting, mär der is wal nen bedryvstaks un 5% btw vanaf 2018.

Menskenrechtenorganisaties sou as Amnesty International, Freedom House un Human Rights Watch seet de VAE as undermåts as et up menskenrechten ankümt. Börgers dee kwådspreaket oaver de regeyring wordet vastesat un emarteld. Öäre familys wordet dwarseleagen döär ståtsveiligheidsdeenste un der sint gevallen bekend van edwüngene verdwyningen. Persöönlike vryheden as et recht up by mekander kummen un samenleaven, persvryheid, uutdrükkingsvryheid un gelöyvsvryheid wordt stark beparked.

De VAE wördt eseen as land med middelmåtigen invlood, lyk as byvöärbeald Neaderland, Belgie un Dänemarken. Et is lid van de Vereynigde Naties, Arabiske Liga, Islamitiske Samenwarkingsorganisatie, OPEC, Neet-lieerde beweaging un Samenwarkingsråd van de Gulv (GCC).