Afon Garw

Den Afon Garw (Engels: River Garw, oawerzat: roewen rivier) is nen rivier in Kumrië den as ongevear 19 km laank is. Zinne welle lig in de heuwels op et noorden van Blaengarw en keump oet in den samnloop met den Afon Ogwr en den Afon Llynfi bie Abercynffig. Et is enen van de dree belangriekste ziedstreume van den Afon Ogwr.

Stroom

Den Afon Garw ontspreenk in Blaengarw en löp deur de döarpkes Pontycymer, Pontygog, Lluest, Braichycymer, Tylagwn, Langeinor en Abergarw. An et eande lig Brynmenyn, woar as den rivier met den Afon Ogwr samen vlöait.

Ziedstreume

In et dal woarnoar as den rivier nöamd is, loopt een antal bekken den rivier in. Hieroonder stoat disse ziedtäkke vanof de welle töt an den samenvlöai met den Afon Ogwr:

Nant Cwm Gwyn
Ffynon Daren Goch
Nant Cwm gweinen
Cwm Nant Hir
Nant Gelli Wern
Nant Forch Wen
Nant Garw Fechan
Nant Lwyn cria
Nant Y Cwrdu
Nant Felin arw
Cae Garw Drehir

Industrie langs den stroom

De effekten van kollenmienen in et dal, zoowa van kleaine familiebedriefkes en gröttere bedrieven, warren vrogger good te zeen. Den rivier wör versmeard töt et zwarte too, woardeur et den bienaam "Black River" (zwarten rivier) kreeg.

Natuur

Vrogger zwummen der zälme en aandere visken. Deur de gröaiende industrie in et dal verdwenen disse. Noe at de kollenmienen dichte zeent, komt ze heanig an wier.

Den Afon Garw löp ok deur Bryngarw Country Park, een natuurpark woar as völle verskillende soorten vöggel zeen worden könt.

Oawerstreumingen

As et veur nen langen tied slim reagent, kan den Afon Garw mangs boeten de oevers goan, ok de döarpe in. Umdet de meeste döarpe heugerop in et dal lignt, keump et neet vake veur, moar de huze dee leager ligt, könt der wa last met kriegen. Een hoes wat bie ne hangbrugge veur keender steund, hebt ze der ofsköawen, umdet et te vake oawerstreumden. De ziedbekken könt ok onverwochts rap oawerstreumen.