Ankum (Dalsen)

Ankum is een buurtschop in de gemiente Dalsen, in de Nederlaandse pervincie Aoveriessel. De buurtschop hef een laandelijk kerakter; ok vien ie der bospartijgies. Op 1 jannewaorie 2018 woonden der op Ankum 94 mèensen.

Een hallenhuusboerderije op Ankum, kenmarkend veur de streek, uut 1877 (foto uut 1966)

Ligging

De mieste bebouwing van Ankum lig an de Vossersteeg en de Ankummer Es. Sinds de 20ste-ieuwse uutbreiding van 't karkdörp Dalsen lig Ankum tegen 't noordwestelijke tippien van Dalsen an.

De buurtschop lig ok kört onder, en miest parallel an, de pervinciaole weg van Zwolle naor Dalsen, de N340 (de Hessenweg). Ten noorden van de N340 löp de Ankummerdiek in de richting van buurtschop De Lichtmis.

In 't dörp Dalsen zölf hej nog een Ankummerstraote, die naor de buurtschop verwis.

Veurzienings

Ankum hef een protestaants-christelijke basisschoele, De Spiegel. Wieder is der een buurthuus waor haoste alle aovenden (daans)cursussen egeven wördt en gezelligheidsaovenden bint. Sinds 1935 is der zomers in 't buurthuus een daansfeest, det nog altied deur dezölfde femilie organiseerd wördt.

Op de Ankummer Es hej een tankstesjon en een autohandel. Ankum hef gien eigen karke.

Veurname huzen

Vroggere havezate en hudige butenplaatse De Ru(i)tenborgh

Butenplaatse De Ruitenborgh in 2010

Havezate De Rutenborgh stund an de Rutenborghweg (Ruitenborghweg) in Ankum, richting de buurtschop Broekhuzen. De name verwis naor de Rute, een uutgestrekt gebied tussen Dalsen en Roevene. Van een verstarkt huus op dizze plekke was veur 't eerst spraoke in 1328 as kestiel Rutenberghe. 't Kestiel was töt det jaor in bezit ewest van de graven van Benthem, die 't verkochten an Johan van Diest, de bisschop van Utrecht. Dizzend gaf 't in lien an Haco van Rutenberg.

Toen de laandheer te bretaol wördden en de veiligheid en 't haandelsverkeer bedreigde, maakte de bisschop van Utrecht rond 1389 't kestiel mit de grond geliek. Der much gien nei kestiel ebouwd wörden (zodet eigenzinnige ridders niet te veule macht zolden kriegen ten opzichte van de bisschop), mar later is det toch gebeurd. In 1442 mus bewoner Frederik van Rutenborgh belaoven det e nooit verschil zol kriegen mit de bisschop; neie grachten much e ok niet anleggen. Töt 1545 bleef De Rutenborgh de zetel van 't adellijke geslacht Van Rutenberg.

De havezate is ofebreuken in de jaoren twintig van de negentiende ieuw. In 1828 wördden der in opdracht van G. Ridderinkhof op dezölfde plekke een neie butenplaatse dalezet, die der nog altied stiet. De grachten bint in 1915 edempt. Vandage de dag wördt huus De Ruitenborgh nog altied particulier bewoond.

Butenplaatse Hofwijk

An de Vossersteeg lig de butenplaatse Hofwijk. 't Huus is der in 1859 neerezet in opdracht van koopman C. Janssen en M.E. Ridderinckhoff. De grote 18de-ieuwse zaandstienen stoepe zol ofkomstig wezen van de ofebreuken havezate De Rutenborgh. Hofwijk is in particulier bezit.

Femiliename Van Ankum

De femiliename Van Ankum giet in Nederlaand in wieduut de mieste gevallen terogge op dizze buurtschop. Ie viendt de name 't miest in de gemiente Dalsen en in umliggende gemientes. In 1947 waren der in Nederlaand 85 mèensen eregistreerd die zo de name hadden; in 2007 waren 't der 50.

Wieder kan de femiliename (Van) Ankum slaon op iene uut 't dörp Ankum in de Duutse dielstaot Nedersaksen.

Verwiezings

Dit artikel is eschreven in 't Zuudwest-Drèents.