Arfgoodroute

Den Arfgoodroute is ne fietsroute met wegwiezers deur et oosten van den Achterhook en een stuksken van Duutsland. Den tocht geet bi'jnoa hemoal deur de gemeente Oost Gelre en duurt zo'n betjen 41 kilometer, moar ie könt em ok langer of körter maken. De route kump langes negen belangrieke kultuur-historiese plaetse in de regio.

Verlöp van de route

Den anvang is offisjeel bi'j Arve Kots in Leeuweld, woar ie ok de keesboerderi'je könt bezeuken en een pötjen boerengolf könt spöllen. Op de fietse geet et op Grolle opan, langes et Stadsmuseum, de Stadsboerderi'je, de Holtzageri'je Nahoes en de Grolse vestingwarken. Van doaroet geet et deur netuurpark De Leemputten noar Zwilbrook en ziene St. Franziskuskarke. De route geet wieter deur et Zwillbrocker Venn hen en dan noar Meddo. Doar ku'j ne hele olde boerderi'je bekieken, met ne grachte der nog umhen. Vroagender kump as volgende an de beurte, woar ie de nog warkende korenmölle De Veer Winden könt bezeuken. Et Vroagendervene ku'j alene mit ne ekskursie binnen kommen. Binnendeur langes den Engelsen Schans geet et dan wier noar Arve Kots, woar de route op zien ende löp.