Bennekum

(döärstüürd vanaf "Bennekom")

Bennekum (Nederlans: Bennekom) is een woengebied in de gemeente Ede (previnsie Gelderland) mit 14.683 (1 jannewaori 2004) inwoeners. Ze gungen der in 't begin vanuut dat de Ouwe kaark of Alexanderkaark uut 't midden van de 14e eeuw stamde, mar in een onderzeuk dat pas uut-evoerd is wiest derop (deur de vonst van tufstenen fundementen) dat 't eerste gebouw werschienlijk al uut de 12e eeuw stamt. Umstreeks 1290 kreeg disse kepel perochiaole zelfstandigheid.

't Herehuus Nergena uut 1731
Nergena niejbouw uut 1954

Bennekum leit an de rand van 't Binnenveld, dat vrogger uut moeras bestung. Langes de weg die noen Dr. Dreeslaan heet stung 't kesteel Nergena dat al in 1340 in historische dokementen eneumd wort en dat haost zeker eigendom was van de Hertog van Gelre. 't Kesteel stung bie 't Rhenense veen en was een belangriek verdejigingswaark tegen de gevechten mit de bisschop van Utrecht en is uuteindelijk verrineweerd. De heerdplaot uut dit kesteel is nog anwezig in 't Bennekumse museum. Laoter is op disse plek 't Heerenhuus Nergena ebouwd, dat sinds 1664 in handen was van 't geslacht Van Eck. In 1810 wort 't deur Samuel Baron van Eck, Heer van Overbeek en Nergena verkocht. Uuteindelijk het de enigste burgemeister van Bennekum, Theodorus Prins, 't ekocht, die 't in 1830 of leut breken. In 1952 is in de stiel van dit huus veur 't toemaolige Rieksinstituut veur 't Rassenonderzeuk van Landbouwgewassen begunnen mit de bouw van een niej gebouw. In 1954 worde 't gebouw in gebruuk eneumen.