Burj Khalifa

wulkenkrabber in Dubai

Den Burj Khalifa (arabisk: برج خليفة‎, arabiske uutspråke: [bʊrd͡ʒ xaˈliːfa], Toren van den Kalyf) is nen wulkenkrabber in Dubai in de Vereynigde Arabiske Emiraten. Med ne tiphöygde van 829,8 meter en dakhöygde van 828 meter (sunder antenne mär med nen spryt van 244 meter) is den Burj Khalifa et höygste gebouw van de wearld, seyd et in 2009 den top kreag. Dårmed sköät et Taipei 101 vöärby, wat dårvöär et höygste gebouw was.

Anvang bewark

Den bouw van den Burj Khalifa begünde in 2004. Vyv jår later, in 2009, stünd de butenkante. Et höyvdraamwark besteyt uut ewåpend beton. En deyl van et stål kümt uut et Palast der Republik in Berlyn, et vöärmålige oustdüütske parlement. Et gebouw güng in 2010 lös as deyl van en gröäter bouwprojekt med name Downtown Dubai. Et is bedoold as pronkstükke vöär en groutskålig untwikkelingsgebeed vöär gemengd gebruuk. De readen vöär et bouwen is dat de regeyring de ekonomy minder afhangelik van öäly wolde maken en üm Dubai meyr internationale bekendheid te geaven. Et gebouw heateden anvangelik Burj Dubai, mär wör as eyrbetöyn ümmenöömd når den leider van Abu Dhabi en president van de Vereynigde Arabiske Emiraten, Kalyf bin Zayed Al Nahyan. Abu Dhabi en de regeyring van de VAE leynden Dubai geld üm öäre skulden af te betalen. Et gebouw bröäk verskeidene höygderekords, sou as 'et höygste gebouw van de wearld'.

Untwarp bewark

Den Burj Khalifa is untwörpen döär Adrian Smith van Skidmore, Owings & Merrill, et bedryv wat ouk de Willis Tower en One World Trade Center untwörp. Hyder Consulting was den uutvoorder, NORR Group Consultants International Limited leidden de architektuur van et projekt. Et untwarp is afleided van de islamitiske bouwstyl uut de streake, wat byvöärbeald ouk terügge is te seen in den Grouten Moskee van Samarra. Et gebouw hevt dree vlöägels, dee as in nen Y-form up mekander anslutet. Dårmed wördt et woan- en hoteluppervlak vergrout. Ne centrale pille med stütpilaren en vlöägels höldt et gebouw oavereande. Dat is afekeaken van de Tower Palace III, med as verskil dat alle upwaertse verplaatsingen in et middenstükke geböäret, behalve wat noudtrappen in de dree vlöägels. Den Burj Khalifa is anekleyded med materiaal wat Dubais heate summertemperaturen teagenhöldt. Et gebouw hevt 57 liften en 8 rultrappen.

Geld bewark

Up en bepaald ougenblik tydens den bouw kümmen de oorsprungelike bouwers van Emaar in geldnoud. Kalyf bin Zayed Al Nahyan, heyrsker van de Vereynigde Arabiske Emiraten, sköät öär geld en hülpe vöär, wårnå as et spül as dank ümmenöömd wör når Burj Khalifa. An et gebouw selv wördt når verholding weinig verdeend, mär des te meyr med alle ümliggende winkels en hotels in Downtown Dubai.

Untvangst bewark

Den Burj Khalifa wördt wearldwyd bewunderd en hevt heyl wat prysen wünnen. Smet up de faam sint de untelbåre klachten van gastarbeiders uut Süüdasie, dee as en grout deyl van et bouwvolk uutmakeden. See hadden et van slechte warkümstandigheiden, laege loanen en et gebruuk üm paspoarten van arbeiders achter te holden töt et wark klår was. In 2011 wör der melding maked van vöäle selvmoarden under butenlandske warkers dee neet vordmöägen.