Dartigjöärigen Oorlog

Den Dartigjöärigen Oorlog (1618–1648) was nen kryg wåras de meyste vöärname partyen van Europa sik med bemöden. Deyls was et nen gelöyvsstryd tüsken katoliken un protestanten, mär Frankryk sat der ouk in üm der land an oaver te holden. Den dartigjöärigen oorlog steyt to book as eyne van de längste un doudelikste oorlöge. Tüsken de 4,5 töt 8 miljoon soldåten un börgers kümmen der by ümme, ofwal döär gevechten, döär verhungering of seekdes. In deylen van wat nu Düütskland is störv de hälvde van de bevolking.

Bepålende ougenblikken in den Dartigjöärigen Oorlog. Van links nå rechts: De defenestraty van Praag (23. mei 1618) - Den doud van Gustavus Adolphus by Lützen (16. november 1632) - Neaderlandske oorlogsskeype kort vöär de Slag by Duins (21. oktober 1639) - Den slag üm Rocroi (19. Mei 1643)

Den oorlog beslöög vöäral et Heylige Roumske Ryk, de Spaanske Neaderlanden, Noord-Spanje un Noord-Italie. Veldslage wörden selvs in Afrika un Amerika uutevöchten. Up den Middellandsen Sey un den Gulv van Biskaje güng et der ouk van. Ümdat der sou wyd uut evöchten wör un souvöäle partyen an med deaden, kan et eseen worden as den eyrsten wearldwyden oorlog.

Den dartigjöärigen oorlog vüng an do as de katolike ståten Spanje un Oustenryk de protestantse ståten in et noorden van et Heylige Roumske Ryk innöämen. Dat wördt de Boheymsk-Paltske un Noorddüütsk-Däänske Fase nöömd. Dårup küm Sweyden in et gewäär üm et spül weader protestantsk to krygen (Sweydske Fase). Frankryk sag underwyl nen kans üm Spanje un Oustenryk to verswakken (Franske Fase). Dat lükkeden uutendelik. Den oorlog küm to en ende med de Vreyde van Westfalen.

Verwante oorlöge sint den Tachtigjöärigen Oorlog, den Mantuaansken Upvolgingsoorlog, den Fransk-Spaansken Oorlog, den Torstensonoorlog, den Neaderlandsk-Portugeesken Oorlog un de Portugeeske Herstellingsoorlog.

Anloup (1604-1618)

Feitelik is den Dartigjöärigen deyls ne voordsetting van de dunderye tüsken katoliken un protestanten. Seyd de godsdeenstvreyde van Augsburg (1555) was der en akkoord: cuius regio, eius religio ("wee syn gebeed, den syn gelöyv"). Dat hölde in dat as nen heyrsker byvöärbeald protestant was, al syne underdånen dan ouk. Mär wat up papyr steyt, hoovt neet in et echt to gelden.

Keiserlike bröders Rudolf un Matthias lüsterden når kardinaal Melchior Khlesl un meynden, de kristenen kunden best nöäst mekander leaven, as se mär medvöchten in den Vyvteenjöärigen Oorlog teagen de islamiten van et Ottomaanske Ryk. Dat güng üm et gebeed Transsylvanie in et nudaagse Rumänie. Gouvernöör Giorgio Basta makeden der bestüürlik nen kråm van. Den protestantsken István Bocskai porkeden de transsylvaniske elite up un der bröäk nen upstand uut.

Rudolf gavven dårup de hussiten in Bohemen un Silesie meyr godsdeenstvryheid (juli - augustus 1609), wat em dår pluspunten upleyverden. Matthias satden synen bröder af. Nå at Rudolf uut de tyd was, wör Matthias den nyen keiser van et heyle Heylige Roumske Ryk (1612).

Mär ouk in de düütske streaken streyken de gelöyvigen mekander voordan meyr teagen de höäre in. Et Paltsgråfskop an den Ryn, wat kalvinistisk was, güng en Protestantsk Verbund (1608) an med de lutersken uut Noorddüütskland. Beieren reageerden döär alle katolike vörsten in ne Katolike Liga to verbinden (1609).

Underwyl güng aertshartog Ferdinant et flink an teagen de luteranen in Oustenryk. Do as he acht jår later ouk noch de boheemske hussiten öär de godsdeenstvryheid afnöäm, ha'j et skåp an et dryten. Den Dartigjöärigen Oorlog bröäk uut in mei 1618. Do as Matthias uut de tyd küm in määrt 1619, wör Ferdinant keiser in syn steade. Keiser Ferdinant II wör den vasten vöärman van de katoliken.

Bohemisk-Paltske fase (1618-1622)

Ferdinand II neamt Bohemen weader in

1617–1618

Den slim katoliken Ferdinand wör in juni 1617 köäning van et hussitiske Bohemen. Dår satteden de hussiten neet up to wachten, un in mei 1618 smeyteden se in et praagske kasteel twey van syne afvaerdigden uut et venster, wat nu bekend steyt as de Tweyde Praagske Defenestraty. Dat was et dådwarkelike begin van den Dartigjöärigen Oorlog. De hussiten völlen de keyserlike tropen an by Pilsen un Lomnice nad Lužnicí.

1619

Töt twey mål oaver tröäken bohemiske soldåten in 1619 up Wenen an. Echt beleageren lükkeden neet, mär underweg wüsten se wal wat te winnen. In november röpen de ståten van Bohemen den kalvinistisken paltsgraaf Frederik V töt köäning uut.

Den kalvinistisken heyrser Gabriel Bethlen van Transsylvanie völ in oktober et Slowakye van de Habsburgs binnen. Hee wüst Bratislava in to neamen. Mär Ferdinant II van Habsburg güng en verbund an med Beieren un et luterske Saksen. Bethlen wör underwyl in Slowakye anevöllen döär Polen-Litouwen, wat sik verbünd an den katoliken keiser. Wenen must hee mär vergeaten.

1620–1621

Do as den küürvorst van de Palts köäning van Bohemen wör, was et ineynen seriöös. Et Spaanske Ryk völ den Palts binnen. Den beiersken generaal Johan t'Serclaes van Tilly makeden glad wark van de bohemiske hussiten in den Slag up den Witten Barg in november 1620. De tsjechen un et hussitisme hadden dårnå 300 jår lange neet meyr wat to vertellen. Keiser Ferdinant II wippeden de hussitiske preydikers, gavven de hälvde van de grund an butenlanders, un de bohemiske kanselderye wör når Wenen verhüüsd. Van de 3 miljoon bohemsken verhüüsden der 2,2 miljoon. Neet blouts de godsdeenst wör uutewisked, mär en heyl volk. Dårup tröäken der nen houp düütske lüde hen, wat de geskedenisse van de tsjechiske landen langen tyd bepålden, selvs töt an den Tweyden Wearldoorlog an to. Vöär Hitler was et deyls selvs de anleiding vöär syne Heim ins Reich-politik.

Frederik V makeden dat he weader in syn huusgebeed de Palts küm. Ferdinand II kun in mei 1621 Bratislava weader terüggewinnen van Bethlen. Den must up syne böärde weader vreyde slüten in december 1621. Sou kreag Ferdinand II syne oustenryks-bohemske huuslanden weader un kun hee andere saken in gang setten.

De Neaderlandske Republik helpet de Palts, Boheymen un de protestantse Uny

Köäning Koubs I van Engeland had synen skounsöäne Frederik van de Palts esegd, hee kun mär beater gin köäning van Bohemen worden. Mär syne neave, Maurits van Oranje, den as stadholder van de neaderlandske Republik was, sea em jüüst van: dat mü'j doon, mooi man! Want den wüst at dissen kalvinist up de bohemske troune de habsburgers flink sol upporken. De spaanske habsburgers solden ja de oustenrykske habsburgers helpen, wat öär slim in tweystryd sol smyten as et Twaalvjöärig Bestand in de Neaderlanden et neet sol holden. Maurits hülp Frederik un de protestantske Uny uut Noorddüütskland an soldåten un geld. By de Slag up den Witten Barg kümmen minstens en achtste deyl van de soldåten uut Neaderland of stünden up de neaderlandske lounlyste.

Spanje valt de Republik an un neamt de Palts in

In 1621 löyp et neaderlandske Twaalvjöärig Bestand af. Aertshartog Albrecht van Oustenryk den as landvoogd van de Südelike Neaderlanden was, küm in juli uut de tyd. Spanje dea ne verraskingsoaverval up nen ståtsen vloot by Kaap Sünt-Vincent an de süüdküste van Portugal.

In juli van et jår dervöär had Spanje de Valtellina-pas un et switserske Graubünden der under ekreagen. Dårmed hadden se ne brügge tüsken et eygene hartogdom Milaan-Lombardye un Innsbruck in Oustenryk. Spanje heyrskeden oaver de westelike Middellandse Sey, Sardinie, Köäningryk Sicilie un Süüditalie (Napels), mär ouk oaver Milaan un Lombardye en dårmed ouk de rest van Noorditalie. Tegelyke hadden se dårmed den Pauseliken Ståt in Middenitalie ümsingeld.

Spanje wol de Neaderlandske Republik ouk vanuut Südelik Neaderland anvallen, mär oaver sey lükkeden dat neet. De Republik was to stark up sey un wüst se by Vlaanderen dwars to liggen. Mär nu kunden de spanjaarden ja vanaf de andere kante; de Valtellinapas oaver Oustenryk döär, Düütskland in un sou to voot up de Südelike Neaderlanden an. Spanje stünd dus by anvang van den oorlog noch geheyls neet sou stark. Filips IV makeden dat neet vöäle uut, hee bleyv up oorlog andringen.

Med dat in et achterhöyvd kunde Ferdinand II in Düütskland nen flinken trad maken, want hee had Spanje achter sik. In september 1620 tröäk Spanje vanuut de Südelike Neaderlanden de Palts van Frederik V in, noch vöär at Ferdinand II twey månd later med em afkaarteden in Boheymen. Van Mainz oaver Worms når Spiers an beide syden van de Middenryn, med de vöärname städen Mannheim un Heidelbarge, allens höyrden de Palts. Nå Ferdinand II synen slag wör dissen kalvinistisken ståt der achterhen edån. De lütersken hadden sik der afsydig van ehölden, undanks at se by de Protestantse Uny warren. De kalvinistiske neaderlanders vünden et dårnå wal good med de noorddüütske lütersken.

Nå de oaverwinning up den Witten Barg un up Bethlen saggen ouk Tilly un de keiserlike tropen öären kans. Mär ditmål kümmen de lütersken wal in et gewäär. Tilly wör teagenehölden by Wyslok in april 1622, under Heidelbarge. Mär Tilly slöät sik an by en spaansk leager uut de Südelike Neaderlanden un verslöög ne månd later de lütersken by Bad Wimpfen, up et ousten van Heidelbarge. Wat wyder up et noorden an, in Frankfort, hölde Tilly de lütersken an gendse kante van de Main. Frederik V must synen Palts upgeaven. Hee nöm hak-up når de Neaderlandske Republik, wåras se em den Winterköäning nöömden. Hee had ja mär eynen winter Boheymen ehad. Ferdinand II dea de Palts by Beieren an.

De lütersken völlen in augustus 1622 ouk de Südelike Neaderlanden (et nudaagse Belgie) binnen üm de republik to helpen, mär spaanske soldåten warren öär te stark af by Charleroi. Toch must Spinola der an to passe kummen. Den was jüüst gangs med ne beleagering van Bargen up Zoom. Den keiser un Spanje hadden dårnå ouk in de noorddüütske landen de handen vul an de lütersken.

Noorddüütske/däänske fase (1622-1630)

Ferdinand II synen noorddüütsken veldtocht

In september un november van 1622 verlöären de paltske lütersken noch Heidelbarge un Mannheim. Spanje un de keiserlike soldåten satten öär nå töt in Noorddüütskland. De andere lütersken kunden hartog Christiaan van Brunswyk-Wolfenbüttel neet helpen: dår warren se to klein vöär. Van de beide groute lüterske ståten bemöden sik de mark Brandenburg nargens med un et küürvorstendom Saksen was selvs beste möäge med den keiser. By Stadtlohn kort oaver den pål by Wenters wüst Tilly den Hartog van Brunswyk der under to krygen.

Tüskendöär must Tilly byspringen in Habsburgs Slowakye, ümdat Bethlen Gábor van Transsylvanie in 1620 et spül vannys innöäm un Ferdinand II em dår weader uutdryven must, tüsken 1623 en 1624. Underwyl had Spanje mooi de kans üm de soldåten når de Südelike Neaderlanden hen to stüren. Nå en lang beleg, van augustus 1624 töt juni 1625, wüsten se Breda in to neamen. Up sey by Cádiz wüsten se in november 1625 noch nen anval van köäningryk Engeland un de Republik af to wären.

Do as Tilly Transsylvanie der weader under had, kunde hee voordan med den keiserliken tocht in Noorddüütskland. Beieren dea der neet meyr an med, düs had den keiser hartog Albrecht von Wallenstein aneweysen as vervanger vöär den hartog van Beieren. Den lätsten löät sik noch wal eaven küürvorst maken.

Ferdinand II synen veldtocht in Dänemarken

In den Slag by Dessau up et noorden van Leipzig verslöög Wallenstein de lütersken (april 1626). De dänen, dee as ouk lütersk warren, kümmen ansetten üm to helpen, mär ouk dee kunden et Tilly neet afwinnen. In den slag by Lutter by Hannover in augustus 1626 verslöög hee se.

Mär Bethlen Gábor was noch neet klår med habsburgsk Slowakye un tröäk et vöär ne darde mål binnen. Wallenstein must Dänemarken eaven vergeaten un in Transsylvanie weader glad wark maken. Dit was de lätste keyr at Bethlen Gábor Ferdinand II dwarslea. Summer 1627 kunde Wallenstein weaderümme når Noorddüütskland üm med de dänen af to kaarten. Wallenstein had nu neet enkel Noorddüütskland, de däänske hartogdommen Holsteyn un Sleyswyk, mär selvs et skeereiland Jutland.

De dänen tröäken sik torügge töt de däänske eilanden un öäre höyvdstad Koupenhagen. Wallenstein had ginne vlote un kunde düs neet oaversteaken. Hee probeerden do et hartogdom Pommeren der under te krygen üm et via dee kante to proberen, mär beyt sik kapot up et beleg van Stralsund, van mei töt augustus 1628. De dänen un sweyden hadden dår soldåten liggen dee as se voordan vanaf sey vöärråden kunden brengen. Wallenstein slöät de Vreyde van Lübeck in mei 1629. De dänen solden öäre landen Holsteyn, Sleyswyk un Jutland weaderkrygen, mär musten sik dan neet meyr med et Düütske Ryk bemöden.

Keiser Ferdinand II wol allens wat de noorddüütske lütersken in de 16. eywe inenömmen hadden torügge vöär de Katolike Karke. Noorddüütskland lea der beroded by. Vöäral Wallenstein löät syne tropen leaven van et land, wat daleküm up brandskatten un plünderen. In et heyle Noorddüütskland draiden se de Reformaty weaderümme. Den keiser had med hülpe vanuut Spanje Boheymen, de Palts un de kleine ståten van Noorddüütskland oavermeisterd.

Engelsk-Spaansken Oorlog (1625-1630)

De neaderlandske republik hölde sik in de Kariben wal stånde teagen de spanjaarden, mär had et suur tüsken de spaanske Südelike Neaderlanden un keiserlik Noorddüütskland. De republik must wat, un slöät en verbund med Frankryk. Üm den stüt to beholden must de republik Richelieu medhelpen um franske protestanten to underdrükken in La Rochelle.

Augustus 1627 veröyverden de republik Grolle up de spanjaarden un dårup ouk et bråbantske 's Hertogenbosch (september 1629). Et was düdelik at Spanje neet vöäle plannen meyr med de südelike Neaderlanden uphad.

Sweydsk-fransk verbund (1630-1648)

Sweydske fase (1630-1635)

Sweyden in et gewäär teagen Ferdinand II in Noorddüütskland

Keiser Ferdinand II küm voordan wyder når et noorden hen. To wyd, når et sinne van Dänemarken un Sweyden. Ouk de süüddüütske, katolike Liga meynden, de keiser must mär es händiger an doon. Hee was öär wat to basig, in syn Oustenryksk-Boheymske huusland. De katolike liga löät den keiser dårümme Wallenstein up huus an stüren en gavven em minder soldåten med. En dan hadden dee soldåten sik ouk noch es neet sou netjes gedraegen in de süüddüütske landen. Jüüst up dat ougenblik begünde Sweyden sik der med to bemöden. Dee kreagen flink wat centen toesköäven vanuut Frankryk, wat eleidt wör döär Kardinaal de Richelieu. In january 1630 had Frankryk al de handteykening esat under en geheim verbund med de Neaderlandske Republik un Sweyden.

Juli 1630 güng et sweydske leager by Wolgast an de Oustsey an wal. Et verslöög de keiserlike tropen un kreag der Pommeren in september vulleydig under.

April 1631 warren Brandenburgs Frankfort an den Oder un Landsbarg an de Warthe an de böärde. Sou wör Brandenburg lutersk. Maagdenburg löät Sweyden ouk binnen. Tilly beleagerden de stad vanaf juli 1630 en in september 1631 gavven et sik oaver. Syn leager slachten dårnå 25.000 van de 30.000 inwoaners af. Dat was sou nen harden trad dat heyl Saksen den keiser de rügge to draiden un sik by de lutersken anslöät. Sweyden had ineynen de twey grötste Noorddüütske luterske ståten achter sik ekreagen.

By Werben an de Elbe küm et weader töt nen slag, wårby Tilly en syn leager toch noch flink van sik afbeaten. Mär Gustaaf II, Adolf un de vereynigde lutersken wüsten em kortby Leipzig in de Slag by Breydenveld in september 1631 nen flinken knauw to geaven. De kaarten leaden nu kats anders up tåfel. Sweyden un de lutersken jöägen Tilly dwars döär Düütskland nå töt an et süden van Beieren, wåras Gustaaf II em by Rain an de Lech löät seen wee der baas was. Tilly rakeden swår gewund. In april 1632 küm hee der an uut de tyd.

Sweyden verswakket den habsbürgsken greyp up Frankryk

Sweyden wör in den tyd nen starken krygsmacht. Se hadden Louis de Geer anehaald, nen waalsken neaderlander, un den wüst lecht un makkelik verrydbår gesküt to produceren. Hee haalden den waalsken hougoavend når Sweyden (1627) un löät tüsken 1620 töt 1640 sou'n vyvdusend waalske un lotaringiske ambachtslüde kummen. Dårby had Sweyden gin hüürvolk mär eygen deenstplichtigen in et leager, dee as fanatik nationalistisk warren un druk med öär lüterske gelöyv.

De Neaderlanden hadden in den tyd vöäral de centen in den vloot estöäken, düs geld vöär en leager in et ousten was der neet. Dårümme küm et öär good uut dat Sweyden de katoliken uut Noorddüütskland vorddreyven. In 1632 swöör den hougen adel van de südelike neaderlanden samen. De republyk kunde nu achter Sweyden an üm Röörmund, Sittard, Venlo un Maastricht in to neamen.

In september van dat jår lükkeden et den rap upetrummeden Wallenstein üm de sweyden by Neurenberg in Noordbeieren torügge to hauwen.